ບໍລິສັດ​ແວ່ນຕາ OCHIS ຜະລິດ​ແວ່ນ​ກັນ​ແດດ​ທີ່​ເຮັດ​ຈາກ​ກາກ​ຂອງ​ກາເຟ

363 02 ກ.ຍ. 2019 ຂ່າວຕ່າງປະເທດ
ບໍລິສັດ​ແວ່ນຕາ OCHIS ຜະລິດ​ແວ່ນ​ກັນ​ແດດ​ທີ່​ເຮັດ​ຈາກ​ກາກ​ຂອງ​ກາເຟ

    ຈາກ​ແນວ​ຄວາມ​ຄິດ​ເພື່ອ​ຊ່ວຍ​ໃຫ້​ລູກ​ຄ້າ ມີ​ໂອກາດ​ໄດ້​ຮັບ​ກິ່ນ​ກາເຟ ໃນ​ເວລາ​ທີ່​ບໍ່​ມີ​ຈອກ​ກາເຟ ຢູ່​ຄຽງ​ຂ້າງ​ນັ້ນ ບໍລິສັດ​ແວ່ນຕາ OCHIS ຂອງ​ອູ​ແກຣນ ໄດ້​ປະຕິບັດ​ແຜນການ​ຂອງ​ຕົນນັ້ນ​ກໍ​ຄື​ ຜະລິດ​ແວ່ນຕາກັນແດດ ຈາກ​ສິ່ງ​ເສດ​ເຫຼືອ (ກາກ) ຂອງ​ກາເຟ.

     ຈາກ​ຄວາມ​ມຸ່ງ​ຫວັງ ໃນ​ການ​ຜະລິດ​ແວ່ນຕາກັນແດດ ທີ່​ທັງ​ເປັນ​ຍຸກ​ຊັ້ນ​ສູງ ທັງ​ເປັນ​ມິດ ກັບ​ສິ່ງແວດລ້ອມ​ນັ້ນ ທ່ານ ມາກ​ຊິມ ຮັບ​ຣີ​ເລນ​ໂກ ຜູ້ອຳນວຍການ​ຝ່າຍ​ບໍລິຫານ (CEO) ຂອງ OCHIS ໄດ້​ຄິດ​ຫາ​ຫຼາຍ​ທາງ​ໃນ​ການ​ຜະລິດ​ແວ່ນຕາ​ຈາກ​ສະ​ໝຸນ​ໄພ​ຕ່າງໆ ກ່ອນ​ທີ່​ຈະ​ຊອກ​ເຫັນ ວັດຖຸ​ດິບ​ຈາກ​ທຳ​ມະ​ຊາດ ນັ້ນ​ກໍ​ຄື​ກາກ ຫຼື​ສິ່ງ​ເສດ​ເຫຼືອ​ຂອງ​ກາເຟ.

    ໃນ​ຄວາມ​ເປັນ​ຈິງ​ແລ້ວ ບັນດາ​ຂະແໜງການ​ຜະລິດ​ສີຂຽວ ໄດ້​ພົບ​ເຫັນ​ກາກ​ກາເຟ ເພື່ອ​ນຳ​ມາ​ຜະລິດ​ຜະລິດ​ຕະ​ພັນ​ຫຼາຍ​ຢ່າງ ເຊັ່ນ​ເຄື່ອງ​ຕົກແຕ່ງ​ພາຍ​ໃນ ຈອກ ນ້ຳ​ມຶກ​ພິມ ແລະ ເຊື້ອ​ໄຟ ຊີວະ​ພາບ.

     ເຖິງ​ຢ່າງໃດ​ກໍ​ຕາມ ທ່ານ ມາກ​ຊິມ ຮັບ​ຣີ​ເລນ​ໂກ ນັບ​ວ່າ​ເປັນ​ຜູ້​ເດີນ​ໜ້າ ໃນ​ການ​ນຳ​ໃຊ້ ວັດຖຸ​ດິບ​ດັ່ງກ່າວ ເພື່ອ​ຜະລິດ​ແວ່ນຕາກັນແດດ. ຜະລິດ​ຕະ​ພັນ​ຂອງ OCHIS ເຮັດ​ໃຫ້​ລູກ​ຄ້າ​ໄດ້​ຮັບ ກິ່ນ​ກາເຟ​ຂົ້ວ​ທີ່​ນຳ​ມາ​ບົດ ຈາກ​ແວ່ນຕາ​ທີ່​ຕົນ​ສວມ​ຢູ່.

    CEO ຂອງ OCHIS ໃຫ້​ຮູ້​ວ່າ ເຫດຜົນ​ປະການ​ທີ​ໜຶ່ງ ທີ່​ເຮັດ​ໃຫ້​ເຂົາ​ເລືອກ​ເອົາ​ກາກ​ກາເຟ ມາ​ເປັນ​ວັດຖຸ​ດິບ​ນັ້ນ ກໍ​ເພາະວ່າ​ສີດຳ​ຂອງ​ກາເຟ ເປັນ​ສີ​ອັນ​ເປັນ​ພື້ນຖານ​ຂອງ​ແວ່ນຕາກັນແດດ ປະເພດ​ຕ່າງໆ. ເຫດຜົນ​ປະການ​ທີ​ສອງ​ກໍ​ແມ່ນ ກາກ​ກາເຟ​ນັ້ນ ສາມາດ​ພົບ​ເຫັນ​ໄດ້ ຢູ່​ໃນ​ທົ່ວ​ທຸກ​ແຫ່ງ​ໃນ​ໂລກ ໂດຍ​ມີ​ບໍ​ລິ​ມາດ​ເຖິງ​ຫຼາຍ​ລ້ານ​ໂຕນ.

    ກ່ອນ​ທີ່​ຈະ​ໄດ້​ມາ ຊຶ່ງ​ຜະລິດ​ຕະ​ພັນ​ໜຶ່ງ​ທີ່ “ສົມບູນ​ແບບ” ກໍ​ຄື​ແວ່ນຕາກັນແດດ OCHIS COFFEE ທີ່​ມີ​ມູນ​ຄ່າ​ປະມານ 78-89 ໂດ​ລາ​ສະຫະລັດ​ນັ້ນ ທ່ານ ມາກ​ຊິມ ຮັບ​ຣີ​ເລນ​ໂກ ຕ້ອງ​ໄດ້​ຖິ້ມ​ແບບ​ຂອງ​ຜະລິດ​ຕະ​ພັນ​ທີ່​ບໍ່​ປະສົບ​ຄວາມ​ສຳເລັດ​ໄປ​ປະມານ 300 ລາຍການ.

    ນັບ​ແຕ່​ເວລາ​ທີ່​ໄດ້​ແນະນຳ ຢູ່​ໃນ​ຕະຫຼາດ​ຮຽກຮ້ອງ​ທຶນ Kickstarter ນັ້ນ OCHIS COFFEE ໄດ້​ດຶງ​ດູດ​ການ​ລົງທຶນ​ໃນ​ປະລິມານ 13.000 ໂດ​ລາ​ສະຫະລັດ ເປັນ​ຕົວ​ເລກ​ທີ່​ເກີນ ຄາດໝາຍ​ທີ່​ວາງ​ອອກ​ມາ​ກໍ​ຄື 10.000 ໂດ​ລາ​ສະຫະລັດ.

 

ຂ່າວທີ່ກ່ຽວຂ້ອງ