ອັງກິດ ລົງທຶນ​ພັດທະນາ​ພາຫະນະ​ການ​ຄົມມະນາຄົມ​ສີຂຽວ

439 02 ກ.ຍ. 2019 ຂ່າວຕ່າງປະເທດ
ອັງກິດ ລົງທຶນ​ພັດທະນາ​ພາຫະນະ​ການ​ຄົມມະນາຄົມ​ສີຂຽວ

    ໃນ​ອະນາຄົດ ອັງກິດ​ຈະ​ນຳ​ໃຊ້​ບັນດາ​ພາຫະນະ​ການ​ຄົມມະນາຄົມ​ທີ່​ເປັນ​ມິດ​ກັບ​ສິ່ງ​ແວດ​ລ້ອມ ​ເຊັ່ນ ຕັກ​ຊີ​ບິນ ​ເຮືອບິນ​ການ​ຄ້າ​ທີ່​ແລ່ນດ້ວຍ​ໄຟຟ້າ ຫຼື​ເຮືອບິນ​ຂົນ​ສົ່ງ​ສິນຄ້າ​ແບບ​ບໍ່​ມີ​ຄົນ​ຂັບ. ​ເພື່ອ​ປະຕິບັດ​ຄາດໝາຍ​ດັ່ງກ່າວ​ໃຫ້​ເປັນຄວາມ​ຈິງ​ນັ້ນ ອັງກິດ​ໄດ້​ປະກາດ​ບ້ວງ​ເງິນ​ລົງທຶນ  370 ລ້ານ​ໂດ​ລາ​ສະຫະລັດ ​ເພື່ອ​ໜູນ​ຊ່ວຍ​ບັນດາ​ໂຄງການ​ຄົ້ນຄວ້າ ​ແລະ ​ພັດທະນາ​ເຕັກ​ໂນ​ໂລ​ຊີ​ໃໝ່ ຊ່ວຍ​ໃຫ້​ບັນດາ​ພາຫະນະ​ການ​ຄົມມະນຄົມ ມີ​ສີຂຽວ​ຫຼາຍ​ຂຶ້ນ ​ແລະ ​ສະອາດ​ກວ່າ​ເກົ່າ.

    ນາຍົກລັດຖະມົນຕີອັງກິດ ​ໂບຣິສ ຈອນ​ສັນ ​ໃຫ້ການ​ຕີ​ລາຄາ​ວ່າ ບ້ວງ​ເງິນ​ລົງທຶນ​ດັ່ງກ່າວ ຈະ​ຊ່ວຍ​ຊຸກຍູ້​ຄວາມ​ຄືບ​ໜ້າ ​ໃນ​ການ​ພັດທະນາ​ເຮືອບິນ​ບັນທຸກ​ຜູ້​ໂດຍສານ​ລຸ້ນ​ໃໝ່ ​​ແລະ ເຮືອບິນ​ຂົນ​ສົ່ງ​ສິນຄ້າ​ທີ່​ເປັນ​ມິດ​ກັບ​ສິ່ງ​ແວດ​ລ້ອມ​. 

    ຫ້ອງ​ວ່າການ​ນາຍົກລັດຖະມົນຕີອັງກິດ ​ແຈ້ງ​ໃຫ້​ຮູ້​ວ່າ​ບ້ວງ​ເງິນ​ລົງທຶນ​ດັ່ງກ່າວ ປະກອບ​ມີ 154 ລ້ານ​ໂດ​ລາ​ສະຫະລັດ​ ທີ່​ເອົາ​ມາ​ຈາກ​ງົບປະມານ ​ແລະ  216 ລ້ານ​ໂດ​ລາ​ສະຫະລັດ ຈາກ​ການ​ປະກອບສ່ວນ​ຂອງ​ບັນດາ​ວິ​ສາ​ຫະກິດ​ໃນ​ອັງກິດ.

    ນອກຈາກ​ໂຄງການ​ດັ່ງກ່າວ​ແລ້ວ ລັດຖະບານ​ອັງກິດ ​ຍັງ​ຈະ​ລົງທຶນ 6,15 ລ້ານ​ໂດ​ລາ​ສະຫະລັດ ​ໃຫ້​ແກ່ 5 ຕາ​ນ່າງ​ການ​ຄົ້ນຄວ້າ​ກ່ຽວ​ກັບ​ການ​ຄົມມະນາຄົມ ​ໂດຍ​ແມ່ນ​ບັນດາ​ມະຫາວິທະຍາ​ໄລ​ຊື່​ດັງ​ໃນ​ອັງກິດ​ເປັນ​ຜູ້​ຮັບຜິດຊອບ.

ຂ່າວທີ່ກ່ຽວຂ້ອງ