ອິນ​ເດຍ ແລະ ຣັດ​ເຊຍ ວາງ​ແຜນ​ຂາຍ​ລູກ​ສອນ​ໄຟ BrahMos

498 02 ກ.ຍ. 2019 ຂ່າວຕ່າງປະເທດ
ອິນ​ເດຍ ແລະ ຣັດ​ເຊຍ ວາງ​ແຜນ​ຂາຍ​ລູກ​ສອນ​ໄຟ BrahMos

     ສຳນັກ​ຂ່າວສານ TASS ລາຍ​ງານ​ວ່າ ທ່ານ ກູ​ມາ ມິ​ສຣາ ຜູ້ອຳນວຍການ​ຮ່ວມ​ຂອງ​ບໍລິສັດ ຮ່ວມ​ທຸລະ​ກິດ​ການບິນ​ອາ​ວະ​ກາດ BrahMos ຂອງ​ຣັດ​ເຊຍ ກັບ​ອິນ​ເດຍ ແຈ້ງ​ໃຫ້​ຮູ້ເມື່ອ​ບໍ່​ດົນ​ມາ​ນີ້​ວ່າ ບໍລິສັດ​ດັ່ງກ່າວ ອາດ​ຈະ​ລົງ​ນາມ​ສັນຍາ​ຕ່າງໆ ກ່ຽວ​ກັບ​ການ​ສົ່ງ​ມອບ​ລູກ​ສອນ​ໄຟ BrahMos ໃຫ້​ແກ່​ບັນດາ​ປະເທດ​ທີ​ສາມ ພາຍ​ໃນ​ທ້າຍ​ປີ 2019.

     ທ່ານ ກູ​ມາ ມິ​ສຣາ ກ່າວ​ຢູ່​ໃນ​ງານ​ວາງສະແດງ​ການບິນ​ອາ​ວະ​ກາດ​ສາກົນ MAKS-2019 ຢູ່​ທີ່​ເມືອງ ຊູ​ກອບ​ສະ​ກີ ໃນ​ເຂດ​ຊານເມືອງ​ນະຄອນ​ຫຼວງ​​ມົສ​ກູ ຂອງ​ຣັດ​ເຊຍ ວ່າ​ມີ​ປະເທດ​ຈຳນວນ​ໜຶ່ງ ໄດ້​ຍື່ນ​ສະເໜີ​ໃຫ້​ພວກ​ເຮົາ​ສົ່ງ​ມອບ​ລູກ​ສອນ​ໄຟ BrahMos ແລະ ພວກ​ເຮົາ​ກໍ​ໄດ້​ແຈ້ງ​ໄປ​ຍັງ ກະຊວງ​ປ້ອງ​ກັນ​ປະເທດ​ຣັດ​ເຊຍ ແລະ ກະຊວງ​ປ້ອງ​ກັນ​ປະເທດ​ອິນ​ເດຍ ກ່ຽວ​ກັບ​ເລື່ອງ​ນີ້​ແລ້ວ ແລະ ປັດຈຸບັນ​ນີ້​ພວມ​ລໍຖ້າ​ການ​ອະນຸຍາດ​ຂອງ​ທັງ​ສອງ​ກະຊວງ​ດັ່ງກ່າວ ເພື່ອ​ລົງ​ນາມ​ບັນດາ​ສັນຍາ​ນັ້ນ.

    PJ-10 BrahMos ເປັນ​ລູກ​ສອນ​ໄຟ​ເຄື່ອນ​ທີ່​ທີ່​ໄປ​ໄດ້​ໄວ​ກວ່າ​ສຽງ ຊຶ່ງ​ສະມາຄົມ​ການ​ຄົ້ນຄວ້າ ແລະ ຜະລິດ​ເຄື່ອງ​ຈັກ ທີ່​ມີ​ສຳນັກງານ​ຕັ້ງ​ຢູ່​ເມືອງ ເຣ​ອູ​ຕອບ ຂອງ​ຣັດ​ເຊຍ; ແລະ ອົງການ​ຄົ້ນຄວ້າ ແລະ ພັດທະນາ​ດ້ານ​ປ້ອງ​ກັນ​ຊາດ​ຂອງ​ອິນ​ເດຍ ຮ່ວມ​ກັນ​ພັດທະນາ. ຂະໜາດ​ຍິງ​ໄກ​ຂອງ​ລູກ​ສອນ​ໄຟ ເຄື່ອນ​ທີ່ BrahMos ອາດ​ຈະ​ເປີດ​ກວ້າງ​ໄດ້​ເຖິງ 800​ ກມ.

 

ຂ່າວທີ່ກ່ຽວຂ້ອງ