ພາຍຸ ໂດຣຽນ ພັດຂຶ້ນຝັ່ງ ບາຮາມາສ

423 03 ກ.ຍ. 2019 ຂ່າວຕ່າງປະເທດ
ພາຍຸ ໂດຣຽນ ພັດຂຶ້ນຝັ່ງ ບາຮາມາສ

    ພາຍຸ ໂດ​ຣຽນ (Dorian) ໄດ້​ພັດ​ຂຶ້ນ​ຝັ່ງ​ທາງ​ທິດເໜືອ​ປະເທດ​ເກາະດອນ​ບາ​ຮາ​ມາ​​ສ ເມື່ອ​ວັນ​ທີ 1 ກັນຍາ​ນີ້ ດ້ວຍ​ກຳລັງ​ແຮງ​ຂອງ​ລົມ​ສູງ​ເຖິງ 295​ກມ/ຊົ່ວໂມງ ແລະ​ອາດ​ສູງ​ເຖິງ 340​ກມ/ຊົ່ວໂມງ ກາຍເປັນ​ພາຍຸ​ແຮງ​ສຸດ​ໃນ​ປະຫວັດສາດ ທີ່​ໄດ້​ເກີດ​ຂຶ້ນ​ຢູ່​ໃນ​ເຂດ​ດັ່ງກ່າວ.

    ສູນ​ພາຍຸ​ແຫ່ງ​ຊາດ ສ ອາ​ເມ​ຣິ​ກາ (NHC) ໃຫ້​ຮູ້​ວ່າ ພາຍຸ ໂດ​ຣຽນ ໄດ້​ພັດ​ຂຶ້ນ​ຝັ່ງ 2 ເທື່ອ ໃນ​ເກາະ​ອາ​ບາ​ໂກ ຂອງ​ບາ​ຮາ​ມາ​​ສ ແລະ​ຖືກ​ຈັດ​ຢູ່​ໃນ​ອັນ​ດັບ​ແຮງ​ທີ່​ສຸດ ຄື​ທີ່​ລະດັບ 5 ຂອງ​ການ​ຈັດ​ອັນ​ດັບ​ທີ່​ປະກອບ​ມີ 5 ລະດັບ​ນັ້ນ.

    ສື່ສານ​ໃນ​ບາ​ຮາ​ມາ​​ສ ລາຍ​ງານ​ວ່າ ປັດຈຸບັນ​ນີ້ ໝູ່​ເກາະ ບາ​ຮາ​ມາ​​ສ ໄດ້​ຈົມ​ຢູ່​ໃນ​ນ້ຳ ໃນ​ຂະນະ​ທີ່​ໂຮງແຮມ  Island Breezes ຢູ່​ໃນ​ເມືອງ ມາ​​ສ ຮາ​ບູ ຊຶ່ງ​ເປັນ​ສູນ​ການ​ຄ້າ​ຂອງ ອາ​ບາ​ໂກ ໄດ້​ຖືກ​ລົມ​ແຮງ​ພັດ​ເອົາ​ສ່ວນ​ຫຼັງຄາ​ໄປ ເຮັດ​ໃຫ້​ຫຼາຍ​ຄົນ​ຕ້ອງ​ສະເໜີ​ຄວາມ​ຊ່ວຍເຫຼືອ. ໃນ​ຂະນະ​ດຽວ​ກັນ ກະແສ​ໄຟຟ້າ​ກໍ​ຖືກ​ຕັດຂາດ​ເປັນ​ບໍລິເວນ​ກວ້າງ ຢູ່​ເທິງ​ເກາະ​ອາ​ບາ​ໂກ.

    ສ່ວນ​ທີ່​ນະຄອນຫຼວງ​ວໍ​ຊິງ​​ຕັນ ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ໄດ້​ພົບ​ປະ​ກັບ​ການ​ນຳ​ຂອງ​ອົງການ​ຮອງ​ຮັບ​ພາວະ​ສຸກ​ເສີນ​ສ່ວນ​ກາງ ພ້ອມ​ທັງ​ປະກາດ​ວ່າ ສະພາບ​ການ​ໃນ​ເວລາ​ນີ້ ມີ​ຄວາມ​ອັນຕະລາຍ​ເປັນ​ຢ່າງ​ຍິ່ງ. ປະທານາທິບໍດີ ທຣຳ ແຈ້ງ​ເຕືອນ​ວ່າ ມີ​ຄວາມ​ເປັນ​ໄປ​ໄດ້​ຫຼາຍ​ທີ່​ພາຍຸ​ໂດ​ຣຽນ  ຈະ​ເປັນ​ຜົນ​ກະທົບ​ຕໍ່​ເຂດ​ແຄມ​ຝັ່ງ​ທະເລ​ທິດ ຕາເວັນ​ອອກ​ຂອງ ສ ອາ​ເມ​ຣິ​ກາ ນັບ​ແຕ່​ລັດ ຟລໍ​ຣີ​ດາ ໄປ​ຮອດ ຄາ​ໂຣ​ໄລ​ນາ​ເໜືອ ໃນ​ນັ້ນ​ມີ​ບາງ​ແຫ່ງ​ຈະ​ມີ​ຄວາມ​ຮ້າຍ​ແຮງ​ຫຼາຍ​ທີ່​ສຸດ.

    ກອງ​ກຳລັງ​ທະຫານ​ປ້ອງ​ກັນ​ແຫ່ງ​ຊາດ​ໃນ​ລັດ ຟລໍ​ຣີ​ດາ ແຈ້ງ​ໃຫ້​ຮູ້​ວ່າ ໄດ້​ລະດົມ​ເຈົ້າ​ໜ້າທີ່​ປະມານ 2.000 ຄົນ ເຂົ້າ​ຮ່ວມ​ການ​ປະຕິບັດ​ງານ ໃນ​ຂະນະ​ທີ່​ໃຫ້​ອີກ 2.000 ຄົນ ຢູ່​ໃນ​ພາວະ​ກຽມພ້ອມ​ຊ່ວຍເຫຼືອ ເພື່ອ​ຮອງ​ຮັບ​ພາຍຸ​ດັ່ງກ່າວ. ໃນ​ຂະນະ​ດຽວ​ກັນ ເຈົ້າ​ໜ້າທີ່​ໃນ​ບາງ​ເຂດ ຂອງ​ລັດ ຟລໍ​ຣີ​ດາ ກໍ​ໄດ້​ປະກາດ​ຄຳ​ສັ່ງ​ອົບ​ພະ​ຍົບ​ແບບ​ບັງຄັບ ໂດຍ​ສະເພາະ​ກໍ​ແມ່ນ​ຜູ້​ທີ່ ອາ​ໃສ​ຢູ່​ໃນ​ເຮືອນ​ເຄື່ອນ​ທີ່ ຢູ່​ໃນ​ເຂດ​ດິນ​ຕ່ຳ.

ຂ່າວທີ່ກ່ຽວຂ້ອງ