ຂ່າວຫຼ້າສຸດ

ຣັດເຊຍ ແລະ UAE ຜັນຂະຫຍາຍຂໍ້ຕົກລົງການຮ່ວມມືດ້ານການສຶກສາ

553 03 ກ.ຍ. 2019 ຂ່າວຕ່າງປະເທດ
ຣັດເຊຍ ແລະ  UAE ຜັນຂະຫຍາຍຂໍ້ຕົກລົງການຮ່ວມມືດ້ານການສຶກສາ

    ເວທີ​ປາ​ໄສ​ສາກົນ “ນະຄອນ​ແຫ່ງ​ການ​ສຶກ​ສາ” ຄັ້ງ​ທີ​ສາມ ແລະ ກອງ​ປະຊຸມ​ໂລກ​ລະດັບ​ສູງ Aqdar - 2019  ໄດ້​ຈັດ​ຂຶ້ນ​ທີ່​ນະຄອນ​ຫຼວງ​​ມົສ​ກູ (ຣັດ​ເຊຍ) ແຕ່​ວັນ​ທີ 28 ສິງຫາ ຮອດ​ວັນ​ທີ 1 ກັນຍາ​ນີ້ ໂດຍ​ຄະນະ​ຈັດ​ຕັ້ງ ແຈ້ງ​ໃຫ້​ຮູ້​ວ່າ ມີ​ຜູ້​ເຂົ້າ​ຊົມ​ປະມານ 130.000 ຄົນ ແລະ ຜູ້​ແທນ 1.000 ຄົນ ຈາກ​ຫຼາຍ​ປະເທດ​ເຂົ້າ​ຮ່ວມ ໃນ​ການເຄື່ອນໄຫວ​ຂອງ​ເວທີ​ປາ​ໄສ ທີ່​ມີ​ເກືອບ 700 ລາຍການ.

    ເຫດການ​ດັ່ງກ່າວ​ຈັດ​ຂຶ້ນ​ດ້ວຍ​ການ​ປະສານ​ສົມທົບ ລະຫວ່າງ​ໂຄງການ ຄາ​ລີ​ຟາ ເອມ​ພາວ​ເວີ​ເມນ ໂປຣ​ແກຣມ (Khalifa Empowerment Program) ຂອງ ສະຫະລັດ ອາ​ຣັບ ເອ​ມີ​ເຣດ  (UAE) ກັບ​ອຳນາດ​ການ​ປົກຄອງ​ນະ​ຄອນ​​ມົສ​ກູ.

    ນີ້​ເປັນ​ເຫດການ​ທີ່​ມີ​ຂະໜາດ​ໃຫຍ່​ໃນ​ໂລກ ໃນ​ຂົງເຂດ​ການ​ສຶກ​ສາ ອັນ​ປະກອບ​ມີ ງານ​ວາງສະແດງ ກອງ​ປະຊຸມ ການ​ສຳ​ມະ​ນາ ເພື່ອ​ແລກປ່ຽນ​ບົດຮຽນ ໃນ​ການ​ຜັນ​ຂະຫຍາຍ​ບັນດາ​ແນວ​ຄວາມ​ຄິດ​ລິ​ເລີ່ມ​ດ້ານ​ການ​ສຶກ​ສາ​ເປີດ ປຶກສາ​ຫາລື​ກ່ຽວ​ກັບ​ບົດບາດ ຂອງ​ຄູ​ອາຈານ ຢູ່​ໃນ​ພື້ນຖານ​ການ​ສຶກ​ສາ​ທີ່​ທັນ​ສະໄໝ ການ​ພັດທະນາ​ຄວາມ​ເກັ່ງ​ກ້າ​ສາມາດ ເຕັກ​ໂນ​ໂລ​ຊີ​ດີ​ຈີ​ຕາ​​ລ ຢູ່​ໃນ​ຂົງເຂດ​ການ​ສຶກ​ສາ.

    ເຈົ້າ​ໜ້າທີ່​ຜູ້​ໜຶ່ງ ຈາກ​ຄະນະ​ຈັດ​ຕັ້ງ​ເຫດການ​ດັ່ງກ່າວ ເວົ້າ​ວ່າ ການ​ສົມທົບ​ຈັດ​ຕັ້ງ ສອງ​ເຫດການ​ກ່ຽວ​ກັບ​ການ​ສຶກ​ສາ​ໄປ​ພ້ອມໆ​ກັນ ຢູ່​ທີ່ມ​​ົສ​ກູ ເປັນ​ຜົນ​ມາ​ຈາກ​ການ​ຜັນ​ຂະຫຍາຍ ຂໍ້​ຕົກລົງ​ການ​ຮ່ວມ​ມື ທີ່​ໄດ້​ລົງ​ນາມ​ເມື່ອ​ປີ 2018 ລະຫວ່າງ​ກອງ​ປະຊຸມ​ຂັ້ນ​ສູງ Aqdar ກັບ​ເວທີ​ປາ​ໄສ​​ມົສ​ກູ “ນະຄອນ​ແຫ່ງ​ການ​ສຶກ​ສາ.” ນີ້​ເປັນ​ເທື່ອ​ທຳ​ອິດ​ທີ່​ກອງ​ປະຊຸມ​ຂັ້ນ​ສູງ Aqdar ຈັດ​ຂຶ້ນ​ຢູ່​ຕ່າງປະເທດ ຫຼັງ​ຈາກ​ທີ່​ໄດ້​ຈັດ​ຂຶ້ນ​ຢູ່​ໃນ  UAE ມາ​ແລ້ວ 2 ເທື່ອ ໃນ​ປີ 2017 ແລະ  2018.

ຂ່າວທີ່ກ່ຽວຂ້ອງ