ເບິ່ງບ້ານເຂົາເອົາບົດຮຽນ 04-09-2019

270 04 ກ.ຍ. 2019 ຫົວຂໍ້ຂ່າວອື່ນໆ

    ພົບ​ກັນ​ຕາມ​ເຄີຍ​ກັບ​ຄໍ​ລຳ “ເບິ່ງ​ບ້ານ​ເຂົາ ເອົາ​ບົດ­ຮຽນ” ເຊິ່ງ​ເຮັດ​ໜ້າ­ທີ່​ສັງ​ລວມ​ເອົາ​ທັງ​ບົດ­ຮຽນ​ທີ່​ອາດ​ສາ­ມາດ​ນຳ​ໃຊ້ ແລະ ບົດ­ຮຽນ​ທີ່​ຄວນ​ຫຼີກ​ລ່ຽງ ບັນ­ດາ​ບົດ­ຮຽນ​ທີ່​ສັນ​ຫາ​ມາ​ເລົ່າ​ນັ້ນ​ກວມ ເອົາ​ມາດ​ຕະ­ການ​ດ້ານ​ກົດ­ໝາຍ ລະ­ບຽບ​ການ ນະ­ໂຍ­ບາຍ ແນວ­ທາງ​ທີ່​ພົວ­ພັນ​ກັບ​ການ​ຄຸ້ມ​ຄອງ​ລັດ ຄຸ້ມ​ຄອງ​ສັງ­ຄົມ​ຢູ່​ບັນ­ດາ​ປະ­ເທດ​ເປົ້າ​ໝາຍ​ຕ່າງໆ.

    ສຳ­ລັບ​ວັນ​ນີ້ ມີ​ເລື່ອງ​ກົດ­ໝາຍ​ຟີ​ລິບ​ປິນ ທີ່​ກຳ­ນົດ​ໃຫ້​ພົນ­ລະ­ເມືອງ​ທຸກ​ຄົນ​ຮ້ອງ­ເພງ​ຊາດ​ດ້ວຍ ຄວາມ​ຕັ້ງ­ໃຈ ແລະ ຮ້ອງ​ໃຫ້​ໄດ້​ສຸດ ບໍ່​ແມ່ນ​ພຽງ​ແຕ່​ເຮັດ​ປາກ​ມຸບໆ​ມິບໆພໍ​ເປັນ​ຮີດ ແລະ ປິດ​ທ້າຍ ກັບ​ຂ່າວ​ຄຳ​ຮຽກ­ຮ້ອງ​ຂອງ​ຜູ້­ນຳ​ສູງ​ສຸດ​ຂອງ ສປ ຈີນ ໃຫ້​ພັກ​ຕິດ­ຕາມ ຄຸ້ມ​ຄອງ ສະ​ຖາ​ບັນ​ການ​ສຶກ​ສາ​ຊັ້ນ​ສູງ ໃນ​ທົ່ວ​ປະ­ເທດ ເຄັ່ງ​ຄັດ​ຂຶ້ນ​ຕື່ມ.

    ທີ່ ຟີ​ລິບ​ປິນ: ໃນ​ທ້າຍ​ເດືອນ​ມິ­ຖຸ­ນາ ປີ 2017 ສະ­ພາ​ຜູ້​ແທນ​ລາ­ຊະ​ດອນ​ຟີ​ລິບ​ປິນ ໄດ້​ປັບ­ປຸງ​ກົດ­ໝາຍ​ວ່າ​ດ້ວຍ​ທຸງ­ຊາດ ແລະ ສັນ­ຍະ­ລັກ​ອື່ນໆ​ຂອງ​ຊາດ ທີ່​ທຸກ​ຄົນ​ຕ້ອງ​ເຄົາ­ລົບ ໃນ​ນັ້ນ ມີ​ມາດ­ຕາ​ທີ່​ກຳ­ນົດ​ໃຫ້​ພົນ­ລະ­ເມືອງ​ທຸກ​ຄົນ ຮ້ອງ­ເພງ​ຊາດ​ດ້ວຍ​ຄວາມ​ຕັ້ງ­ໃຈ ຮ້ອງ​ເຕັມ​ຫຼອດ​ຄໍ ແລະ ວາງ­ທ່າ​ທີ​ສະ­ຫງ່າ ເຂັ້ມ­ແຂງ ຂໍ້​ກຳ­ນົດ​ຍັງ​ໄດ້​ວາງ​ໂທດ​ປັບ​ໃໝ ສຳ­ລັບ​ຜູ້​ລະ­ເມີດ​ເປັນ​ຈຳ­ນວນ​ເງິນ​ລະ­ຫວ່າງ 50.000-100.000 ເປ​ໂຊ (1 ໂດ​ລາ​ສະ­ຫະ­ລັດ​ແລກ​ໄດ້​ປະ­ມານ 50 ປາຍ​ເປ​ໂຊ​ກວ່າໆ) ນອກ­ຈາກ​ເສຍ​ເງິນ​ຄ່າ​ປັບ​ໃໝ​ແລ້ວ ຜູ້​ລະ­ເມີດ​ຍັງ​ຈະ​ໄດ້​ຮັບ​ໃບ​ຕັກ­ເຕືອນ​ໃຫ້​ຫຼາບ​ໃຫ້​ຈື່ ຢ່າ​ດື້​ເຮັດ​ອີກ​ຄື­ເກົ່າ ໃນ​ກໍ­ລະ­ນີ​ຍັງ​ດື້​ລະ­ເມີດ​ຊ້ຳ​ອີກ ຜູ້­ກ່ຽວ​ກໍ​ຈະ​ຖືກ​ປະ­ຈານ​ດ້ວຍ​ການ​ປະ­ກາດ​ຊື່​ໃນ​ໜັງ­ສື­ພິມ​ໃຫ້​ທົ່ວ​ສັງ­ຄົມ​ຮູ້ ການ​ຮ້ອງ­ເພງ​ຊາດ ຟີ​ລິບ​ປິນ ໄດ້​ມີ​ການ​ກຳ­ນົດ​ໄວ້​ຢ່າງ​ຈະ­ແຈ້ງ ຄື​ຕ້ອງ​ຮ້ອງ​ໃຫ້​ຖືກ­ຕ້ອງ​ຕາມ​ເນື້ອ​ໃນ ຮ້ອງ​ດ້ວຍ​ຄວາມ​ໄວ-ຊ້າ ຕາມ​ການ​ກຳ­ນົດ​ຈັງ­ຫວະ​ເຄາະ 100-120 ຄັ້ງ​ຕໍ່ 1 ນາ­ທີ ຊາວ​ຟີ​ລິບ​ປິນ ທຸກ​ຄົນ​ຕ້ອງ​ຢຶດ​ໝັ້ນ​ໃນ​ຄວາມ​ສຳ­ຄັນ​ຂອງ​ເພງ​ຊາດ ເພາະ​ມັນ​ສະ­ແດງ​ອອກ​ເຖິງ​ອຸ­ດົມ​ການ ຄວາມ​ຟັກ​ໄຟ່ ຄວາມ​ມຸ່ງ​ມາດ ກໍ​ຄື ຈິດ​ວິນ​ຍານ​ແຫ່ງ​ຄວາມ​ຮັກ​ຊາດ

    ທີ່ ສປ ຈີນ: ເມື່ອ​ເກືອບ 3 ປີ ກ່ອນ​ໜ້າ​ນີ້ (ໜັງ­ສື­ພິມ The Nation 10 ທັນ­ວາ 2016) ໄດ້​ລາຍ​ງານ​ໃຫ້​ຊາບ​ກ່ຽວ​ກັບ​ຄຳ​ຮຽກ­ຮ້ອງ​ຂອງ​ທ່ານ ສີ ຈິ້ນ​ຜິງ ເລ­ຂາ­ທິ­ການ​ໃຫຍ່ ພັກ​ກອມ​ມູ​ນິດ​ຈີນ ປະ­ທານ​ປະ­ເທດ ສປ ຈີນ ໃຫ້​ພັກ​ກອມ​ມູ​ນິດ ເອົາ​ມາດ​ຕະ­ການ​ຄຸ້ມ​ຄອງ​ສະ​ຖາ​ບັນ​ການ​ສຶກ​ສາ​ຊັ້ນ​ສູງ​ທັງ​ໝົດ ດ້ານ​ອຸ­ດົມ​ການ-ການ­ເມືອງ​ແນວ​ຄິດ ໂດຍ​ທ່ານ​ໄດ້​ເນັ້ນ​ວ່າ ບັນ­ດາ​ສະ​ຖາ​ບັນ​ການ​ສຶກ​ສາ​ຊັ້ນ​ສູງ ຕ້ອງ​ປະ­ຕິ­ບັດ​ຕາມ​ກົດ​ລະ­ບຽບ​ຂອງ​ພັກ​ກອມ​ມູ​ນິດ​ຈີນ ສ້າງ​ຄວາມ​ເຂັ້ມ­ແຂງ ແລະ ສົ່ງ­ເສີມ​ລະ­ບອບ​ສັງ­ຄົມ​ນິ­ຍົມ ຕາມ​ສີ­ສັນ​ຂອງ​ຈີນ ຂ່າວ​ດຽວ​ກັນ​ນີ້ ບອກ​ວ່າ ໃນ​ຕົ້ນ​ປີ 2016 ບັນ­ດາ​ອາ­ຈານ​ມະ­ຫາ­ວິ­ທະ­ຍາ­ໄລ​ຈຳ­ນວນ​ໜຶ່ງ ໄດ້​ມີ​ຈົດ­ໝາຍ​ທີ່​ສະ­ແດງ​ຄວາມ​ກັງ­ວົນ​ໃຈ ໂດຍ​ໄດ້​ບອກ​ວ່າ ບັນ­ດາ​ນັກ​ສຶກ​ສາ​ໃນ​ຂະ­ແໜງ​ວິ­ຊາ​ເສດ­ຖະ­ກິດ​ໄດ້​ຖືກ​ລ້າງ​ສະ­ໝອງ ດ້ວຍ​ທິດ​ສະ​ດີ​ຂອງ​ຝ່າຍ​ຕາ­ເວັນ­ຕົກ ພ້ອມ​ທັງ​ໄດ້​ຮຽກ­ຮ້ອງ​ໃຫ້​ເພີ່ມ​ການ​ສິດ­ສອນ​ລັດ­ທິ​ມາກ ໃນ​ຄຳ​ຮຽກ­ຮ້ອງ​ດັ່ງ­ກ່າວ ທ່ານ ສີ ຈິ້ນ​ຜິງ ຍັງ​ໄດ້​ເວົ້າ​ວ່າ “ຄູ​ຄື​ວິ­ສະ­ວະ­ກອນ​ຂອງ​ມະ­ນຸດ­ຊາດ ທີ່​ເຮັດ​ໜ້າ­ທີ່​ອັນ​ສັກ­ກະ​ລະ​ບູ­ຊາ”.

ຂ່າວທີ່ກ່ຽວຂ້ອງ