ອາການແກ້ຄວາມຫິວ ການສຶກສາແກ້ຄວາມໂງ່ !

1.209 04 ກ.ຍ. 2019 ນານາສາລະ

    ສ່ວນ​ຕົວ​ຜູ້​ຂຽນ​ເຊື່ອ​ວ່າ ອາ­ຫານ​ບໍ່​ພຽງ​ແກ້­ຄວາມ​ຫິວ​ຢ່າງ​ດຽວ ແຕ່​ການ​ທີ່​ຄົນ​ເຮົາ​ສະ­ຫຼາດ​ເລືອກ​ອາ­ຫານ​ທີ່​ດີ​ມີ​ປະ­ໂຫຍດ ກໍ​ສາ­ມາດ​ເຮັດ​ໃຫ້​ສຸ­ຂະ­ພາບ​ຂອງ​ຄົນ​ເຮົາ​ດີ​ຂຶ້ນ ເຊິ່ງ​ໝາຍ​ເຖິງ​ການ​ເລືອກ​ບໍ­ລິ­ໂພກ​ອາ­ຫານ​ທີ່​ມີ​ຄຸນ­ຄ່າ​ທາງ​ໂພ­ຊະ​ນາ​ການ ຂະ­ນະ​ດຽວ​ກັນ ການ​ຈະ​ມີ​ສຸ­ຂະ­ພາບ​ເຂັ້ມ­ແຂງ ຍັງ​ຕ້ອງ​ອາ­ໄສ​ການ​ອອກ­ກຳ­ລັງ​ກາຍ ຫຼິ້ນ​ກີ­ລາ​ຂອງ​ຄົນ​ໃນ​ສັງ­ຄົມ ໂດຍ​ສະ­ເພາະ ກໍ​ແມ່ນ​ເຍົາ­ວະ​ຊົນ ທີ່­ຢູ່​ໃນ​ໄວ​ຮຽນ ເຊິ່ງ​ຈະ​ກາຍ­ເປັນ​ກຳ­ລັງ​ສຳ­ຄັນ​ຂອງ​ຊາດ.

    ການ​ປູກ­ຝັງ​ນິດ​ໄສ ຫຼື ຄ່າ​ນິ­ຍົມ​ໃນ​ການ​ຮັກ­ສາ​ສຸ­ຂະ­ພາບ ເຊັ່ນ: ຮັກ​ການ​ອອກ­ກຳ­ລັງ​ກາຍ ການ­ຈັດ­ຕັ້ງ​ກ່ຽວ­ຂ້ອງ​ໄດ້​ຈັດ​ອຸ­ປະ­ກອນ​ກີ­ລາ ເດີ່ນ​ອອກ­ກຳ­ລັງ​ກາຍ ເຊັ່ນ: ເດີ່ນ​ເຕະ­ບານ ເດີ່ນ​ເຕະ​ຕໍ້ ເດີ່ນ​ແລ່ນ​ອອກ­ກຳ­ລັງ​ກາຍ​ໃຫ້​ພຽງ­ພໍ ນັ້ນ​ຖື​ເປັນ​ສິ່ງ​ຈຳ­ເປັນ ສ່ວນ­ວ່າ​ເລື່ອງ​ຮ້ານ​ກິນ​ດື່ມ ເຫຼົ້າ​ຢາ​ປາ​ປີ້ງ ສະ­ຖານ​ບັນ­ເທີງ​ນັ້ນ ບໍ່​ເວົ້າ ນັກ­ທຸ­ລະ­ກິດ​ຫົວ​ໄສ​ເຂົາ​ເຮັດ​ຢູ່​ແລ້ວ​ນໍ ! ປະ­ເດັນ​ສຳ­ຄັນ​ຈຶ່ງ​ຢູ່​ທີ່​ວ່າ ເຮົາ​ຈະ​ປູກ­ຝັງ​ຄ່າ​ນິ­ຍົມ ຈິດ​ສຳ­ນຶກ​ໃຫ້​ເຍົາ­ວະ​ຊົນ​ນິ­ຍົມ ແລະ ຮັກ​ການ​ອອກ­ກຳ­ລັງ​ກາຍ​ໄດ້​ແນວ­ໃດ ? ເພາະ­ວ່າ ພວກ​ເຮົາ​ເຄີຍ​ເວົ້າ​ກັນ​ເຖິງ​ຈະ​ສ້າງ​ຄ່າ​ນິ­ຍົມ​ບໍ່​ໃຫ້​ຄົນ​ຂ້າມ​ໄປ​ຊື້​ເຄື່ອງ​ບໍ­ລິ­ໂພກ​ປະ­ເທດ​ອື່ນ​ຍັງ​ແກ້​ກັນ​ຍາກ...!.

    ອາ­ຫານ ແລະ ການ​ອອກ­ກຳ­ລັງ​ກາຍ​ຈຶ່ງ​ເປັນ​ສອງ​ສິ່ງ​ທີ່​ຜູ້​ຕ້ອງ­ການ​ສຸ­ຂະ­ພາບ​ດີ​ຂາດ​ບໍ່​ໄດ້ ເຊິ່ງ​ໂຍງ​ໄຍ​ພົວ­ພັນ​ເຖິງ​ຄວາມ​ອົບ​ອຸ່ນ​ພາຍ​ໃນ​ຄອບ­ຄົວ ບໍ່​ແມ່ນ​ວ່າ​ເຮົາ​ຈະ​ຫຼົງ​ເຫີ່​ຄ່າ​ນິ­ຍົມ​ບໍ­ລິ­ໂພກ​ນິ­ຍົມ​ຈົນ​ບໍ່​ຮູ້­ສຶກ​ໂຕ ເຊິ່ງ​ຫຼາຍ​ຄອບ­ຄົວ​ກໍ​ແຕກ​ແຍກ​ເຖິງ​ຂັ້ນ​ປະ​ຮ້າງ​ກັນ​ຍ້ອນ​ຫຼົງ​ຄິດ​ບໍ່​ຮູ້​ເທົ່າ​ທັນ​ມານ​ຍາ​ຂອງ​ວັດ­ຖຸ ເພາະ​ເຫັນ​ສັງ­ຄົມ​ເຂົາ​ມີ ຕົນ​ເອງ​ກໍ​ຢາກ​ໄດ້ ດັ່ງ­ນັ້ນ ປະ­ເດັນ​ຈຶ່ງ​ຢູ່​ບ່ອນ​ວ່າ ຈະ​ສ້າງ​ຄ່າ​ນິ­ຍົມ​ແນວ­ໃດ !.

    ການ​ສຶກ​ສາ​ແກ້­ຄວາມ​ໂງ່ ເປັນ​ປະ­ເດັນ​ທີ່​ໜ້າ​ຄິດ ຖ້າ​ຕີ​ຄວາມ​ຕາມ​ໂຕ​ອັກ­ສອນ ຄື​ເຮົາ​ຈະ​ຮຽນ​ແນວ­ໃດ​ໃຫ້​ເກີດ​ປັນ­ຍາ​ຮູ້​ແຈ້ງ ຮູ້­ຈັກ​ແຍກ​ແຍະ​ວ່າ​ອັນ​ໃດ​ດີ ແລະ ບໍ່​ດີ ເຊິ່ງ​ຄວນ​ຫຼີກ­ເວັ້ນ​ວິ­ທີ​ແກ້​ບັນ­ຫາ​ແບບ​ເສຍ​ຫຍ້າ​ຖົມ​ຂີ້​ໝາ ແລ້ວ​ກໍ​ລາຍ​ງານ​ດອກ​ໄມ້ ! ໂຮງ­ຮຽນ​ມີ​ຫ້ອງ​ສະ­ໝຸດ ມີ​ໜັງ­ສື ຕຳ­ລາ​ອ່ານ​ຄົ້ນ­ຄວ້າ​ພຽງ­ພໍ ມັນ​ກໍ​ບໍ່​ໜ້າ​ເບື່ອ ບາງ​ຫ້ອງ​ສະ­ໝຸດ ພະ­ນັກ­ງານ​ເຮັດ​ໜ້າ​ບູດ​ບຶ້ງ ຫ້ອງ​ສະ­ໝຸດ​ກໍ​ບໍ່​ຢາກ​ເປີດ​ບໍ­ລິ­ການ ເພາະ​ຖ້າ​ຫົວ­ໜ້າ​ບໍ່​ຢູ່ ຕົນ​ເອງ​ກໍ​ສວຍ­ໂອ­ກາດ​ຂີ້­ຄ້ານ ເຊິ່ງ​ກໍ​ເທົ່າ​ກັບ​ວ່າ​ກິນ​ເງິນ­ເດືອນ​ຂອງ​ລັດ​ເສຍ­ຊື່ໆ

    ການ​ສຶກ​ສາ​ຈະ​ແກ້­ຄວາມ​ໂງ່​ໄດ້ ຄົງ​ຈະ​ຂຶ້ນ​ກັບ​ຜົນ​ຜະ­ລິດ​ອອກ​ມາ​ວ່າ​ຜູ້​ຈົບ​ການ​ສຶກ​ສາ​ຮູ້​ວິ­ເຄາະ ຮູ້​ໄຈ້​ແຍກ​ຄ່າ​ນິ­ຍົມ ສາ­ລະ​ຂອງ​ຊີ­ວິດ ໂດຍ​ບໍ່​ຫຼົງ​ຄວາມ​ມ່ວນ ຄວາມ​ບັນ­ເທີງ​ຄື​ຊີ­ວິດ !.

ຂ່າວທີ່ກ່ຽວຂ້ອງ