ຂ່າວຫຼ້າສຸດ

ລັດ ອຸດ​ທາ ປຣາ​ເດ​​ສ ຂອງ​ອິນ​ເດຍ ຫ້າມ​ໃຊ້​ຖົງ​ຢາງ​ຢ່າງ​ສິ້ນ​ເຊີງ

210 05 ກ.ຍ. 2019 ຂ່າວຕ່າງປະເທດ
ລັດ ອຸດ​ທາ ປຣາ​ເດ​​ສ ຂອງ​ອິນ​ເດຍ ຫ້າມ​ໃຊ້​ຖົງ​ຢາງ​ຢ່າງ​ສິ້ນ​ເຊີງ

    ສື່ສານ​ໃນ​ທ້ອງຖິ່ນ ລາຍ​ງານ​ວ່າ ນັບ​ແຕ່​ວັນ​ທີ 1 ກັນຍາ​ນີ້​ເປັນຕົ້ນ​ໄປ ອຳນາດ​ການ​ປົກຄອງ ລັດ ອຸດ​ທາ ປຣາ​ເດ​​ສ  (ພາກ​ເໜືອ​ອິນ​ເດຍ) ເລີ່ມ​ນຳ​ໃຊ້​ຄຳ​ສັ່ງ​ຫ້າມ​ຢ່າງ​ສິ້ນ​ເຊີງ ຕໍ່​ການ​ນຳ​ໃຊ້​ຖົງ​ຢາງ​ປະເພດ​ໂປ​ລີ​ເທນ (polythene) ໂດຍ​ທີ່​ກອງ​ກຳລັງ​ຕຳຫຼວດ​ໃນ​ລັດ​ດັ່ງກ່າວ ຈະ​ເປັນ​ຜູ້​ຮັບຜິດຊອບ ໃນ​ການ​ແກ້​ໄຂ​ການ​ລະເມີດ​ຕໍ່​ຄຳ​ສັ່ງ​ຫ້າມ​ນຳ​ໃຊ້​ຖົງ​ຢ່າງ​ຢູ່​ພາຍ​ໃນ​ລັດ​ນີ້.

    ທ່ານ ໂຢ​ກິ ອາ​ດີ​ເທຍ​ນັດ ຜູ້​ວ່າການ​ລັດ​ອຸດ​ທາ ປຣາ​ເດ​​ສ ກ່າວ​ຢືນຢັນ ກ່ອນ​ໜ້າ​ນີ້ ວ່າ​ລັດ​ນີ້ ຈະ​ກາຍເປັນ​ບ່ອນ​ທີ່​ປາສະຈາກ​ຢາງ​ປະເພດ ພລາ​​ສ​ຕິກ ແລະ ໂປ​ລີ​ເທນ. ສ່ວນ​ນາຍົກລັດຖະມົນຕີ ອິນ​ເດຍ ນາ​ເຣນ​ດຣາ ໂມ​ດີ ກໍ​ເຄີຍ​ໄດ້​ຖະແຫຼງ​ໄວ້​ວ່າ ອິນ​ເດຍ​ຈະ​ຢຸດຕິ​ການ​ນຳ​ໃຊ້​ເຄື່ອງ​ຢາງ ປະເພດ​ທີ່​ໃຊ້​ເທື່ອ​ດຽວ​ແລ້ວ​ຖິ້ມ​ໄປ​ນັ້ນ ພາຍ​ໃນ​ປີ 2022.

    ຢາງ​ໂປ​ລີ​ເທນ ຖືກ​ນຳ​ໃຊ້​ທົ່ວ​ໄປ​ຢູ່​ໃນ​ໂລກ ໂດຍ​ມີ​ປະລິມານ​ການ​ນຳ​ໃຊ້​ກວ່າ 60 ລ້ານ​ໂຕນ ໃນ​ແຕ່​ລະ​ປີ. ອິນ​ເດຍ ເປັນ​ປະເທດ​ທີ່​ມີ​ຂີ້​ເຫຍື້ອ​ປະເພດ​ຢາງ ຫຼາຍ​ເປັນ​ດັບ​ທີ 15 ຂອງ​ໂລກ ໂດຍ​ມີ​ເກືອບ 26.000 ໂຕນ​ໃນ​ແຕ່​ລະ​ວັນ.

ຂ່າວທີ່ກ່ຽວຂ້ອງ