ພະຍາດ​ໄຂ້ເລືອດອອກ​ຍັງ​ຈະ​ສືບຕໍ່​ແຜ່​ລະບາດ​ຢູ່​ຟີ​ລິບ​ປິນ

158 05 ກ.ຍ. 2019 ຂ່າວຕ່າງປະເທດ
ພະຍາດ​ໄຂ້ເລືອດອອກ​ຍັງ​ຈະ​ສືບຕໍ່​ແຜ່​ລະບາດ​ຢູ່​ຟີ​ລິບ​ປິນ

    ຂ່າວ​ຕ່າງປະເທດ ລາຍ​ງານ​ວ່າ ເມື່ອ ວັນ​ທີ 2 ກັນຍາ​ນີ້ ທ່ານ ກາ​​ຟ​ເຣ ກາ​ລາ​ປາ​ຊີ ຜູ້​ຊ່ຽວຊານ​ຂອງ​ອົງການ​ອະນາໄມ​ໂລກ (WHO) ໄດ້​ໃຫ້​ສຳພາດ​ຕໍ່​ສື່​ມວນ​ຊົນ​ວ່າ ໃນ​ຂະນະ​ທີ່​ຟີ​ລິບ​ປິນ ເຂົ້າ​ສູ່​ລະດູຝົນ​ທີ່​ມີ​ຝົນຕົກ​ຫຼາຍ​ຂຶ້ນ​ນັ້ນ ພະຍາດ​ໄຂ້ເລືອດອອກ ຈະ​ສືບຕໍ່​ແຜ່​ລະບາດ​ຢູ່​ປະເທດ​ນີ້​ໄປ​ອີກ 1 ຫາ 3 ເດືອນ.

    ກະຊວງ​ສາທາລະນະ​ສຸກ​ຟີ​ລິບ​ປິນ ເປີດເຜີຍ​ຂໍ້​ມູນ​ສະຖິຕິ​ວ່າ ມາ​ຮອດ​ວັນ​ທີ 10 ສິງຫາ​ຜ່ານ​ມາ ທົ່ວ​ປະເທດ​ນີ້ ມີ​ຜູ້​ເປັນ​ພະຍາດ​ໄຂ້ເລືອດອອກ​ຫຼາຍ​ກວ່າ 208.000 ຄົນ ໃນ​ນີ້ ເສຍ​ຊີວິດ​ແລ້ວ 882 ຄົນ. ວັນ​ທີ 6 ສິງຫາ​ຜ່ານ​ມາ ກະຊວງ​ສາທາລະນະ​ສຸກ​ຟີ​ລິບ​ປິນ ໄດ້​ປະກາດ​ວ່າ ທົ່ວ​ປະເທດ​ໄດ້​ເຂົ້າ​ສູ່​ສະພາບ​ທີ່​ພະຍາດ​ໄຂ້ເລືອດອອກ​ແຜ່​ລະບາດ​ຮຸນ​ແຮງ​ຂຶ້ນ.
     ທ່ານ ກາ​​ຟ​ເຣ ກາ​ລາ​ປາ​ຊີ ກ່າວ​ຕື່ມ​ວ່າ ມີ​ຫຼາຍ​ສາເຫດ​ທີ່​ພາໃຫ້​ອັດຕາ​ການ​ຕາຍ​ຍ້ອນ​ພະຍາດ​ໄຂ້ເລືອດອອກ​ຢູ່​ຟີ​ລິບ​ປິນ ມີ​ລະດັບ​ສູງ ດ້ານ​ໜຶ່ງ​ແມ່ນ​ຍ້ອນ​ຄົນ​ເຈັບ​ຈຳນວນ​ຫຼາຍ​ໄດ້​ຮັບ​ການບົ່ງມະຕິ​ຫຼ້າ​ຊ້າ ຈຶ່ງ​ພາໃຫ້​ປິ່ນປົວ​ບໍ່​ທັນ ແລະ​ອີກ​ດ້ານ​ໜຶ່ງ ໂຮງໝໍ ແລະ ຄລີ​ນິກ​ຢູ່​ຂັ້ນ​ຮາກ​ຖານ​ຂອງ​ຟີ​ລິບ​ປິນ​ຫຼາຍ​ແຫ່ງ ຂາດ​ເງື່ອນໄຂ​ທີ່​ຈຳເປັນ ຈຶ່ງ​ບໍ່​ສາມາດ​ກວດ​ຫາ ແລະ ບົ່ງມະຕິ​ພະຍາດ​ໄຂ້ເລືອດອອກ​ໄດ້​ຢ່າງ​ວ່ອງໄວ​ທັນ​ເວລາ.

ຂ່າວທີ່ກ່ຽວຂ້ອງ