ສ ອາເມຣິກາ-ຕາລີບັນ ເຫັນດີກ່ຽວກັບຮ່າງຂໍ້ຕົກລົງສັນຕິພາບໃນອາຟະການິດສະຖານ

164 05 ກ.ຍ. 2019 ຂ່າວຕ່າງປະເທດ
ສ ອາເມຣິກາ-ຕາລີບັນ ເຫັນດີກ່ຽວກັບຮ່າງຂໍ້ຕົກລົງສັນຕິພາບໃນອາຟະການິດສະຖານ

   ໃນຮ່າງຂໍ້ຕົກລົງສັນຕິພາບສະບັບໜຶ່ງ ທີ່ໄດ້ຮັບຄວາມເຫັນດີຮ່ວມກັບ ກອງກຳລັງມືປືນ ຕາລີບັນ ນັ້ນ ສ ອາເມຣິກາ ມີແຜນການຖອນທະຫານ 5.000 ຄົນ ອອກໄປຈາກ ອາຟະການິດສະຖານ ແລະ ປິດຖານທັບ 5 ແຫ່ງ ພາຍໃນຮອບເວລາ 135 ວັນ.

    ທ່ານ ຊານເມ ຄາລິນຊາດ ທູດພິເສດຂອງ ສ ອາເມຣິກາ ຮັບຜິດຊອບບັນຫາ ອາຟະການິດສະຖານ ໃຫ້ສຳພາດຂ່າວຜ່ານທາງໂທລະພາບຊ່ອງ Tolo News ເມື່ອວັນທີ 2 ກັນຍານີ້ວ່າ ເພື່ອຕອບແທນຕໍ່ການທີ່ ສ ອາເມຣິກາຖອນທະຫານນັ້ນ ຕາລີບັນ ໃຫ້ສັນຍາວ່າຈະບໍ່ອະນຸຍາດໃຫ້ບັນດາອົງການກໍ່ການຮ້າຍ ເຊັ່ນເຄືອຂ່າຍກໍ່ການຮ້າຍສາກົນ ອາລ ໄກດາ ຫຼືອົງການ ລັດອິດສະລາມ (IS) ສວາຍໃຊ້ອາຟະການິດສະຖານ ເປັນ “ແປ້ນຢັນ” ເພື່ອດຳເນີນການໂຈມຕີໃສ່ ສ ອາເມຣິກາ ແລະ ບັນດາປະເທດພັນທະມິດຂອງ ສ ອາເມຣິກາ.

    ທູດພິເສດຂອງ ສ ອາເມຣິກາ ເວົ້າວ່າ ເປົ້າໝາຍຂອງຮ່າງຂໍ້ຕົກລົງດັ່ງກ່າວ ກໍແມ່ນເພື່ອ ຫຼຸດຜ່ອນຄວາມຮຸນແຮງ ມຸ່ງໄປສູ່ການຢຸດຕິສົງຄາມນອງເລືອດຢູ່ໃນອາຟະການິດສະຖານ ແຕ່ໃນຮ່າງ ຂໍ້ຕົກລົງນັ້ນ ຍັງບໍ່ມີການຕົກລົງກ່ຽວກັບການຢຸດຍິງ ຊຶ່ງເລື່ອງນີ້ແມ່ນຂຶ້ນກັບການເຈລະຈາ ລະຫວ່າງຝ່າຍຕ່າງໆໃນອາຟະການິດສະຖານ.

    ໃນວັນດຽວກັນ ໂຄສົກຂອງປະທານາທິບໍດີອາຟະການິດສະຖານ ເວົ້າວ່າທ່ານ ຊານເມ ຄາລິນຊາດ ໄດ້ແຈ້ງໂດຍຫຍໍ້ຕໍ່ປະທານາທິບໍດີອາຟະການິດສະຖານ ອາສຣາຟ ການີ ກ່ຽວກັບຮ່າງ ຂໍ້ຕົກລົງດັ່ງກ່າວ ໃນລະຫວ່າງທີ່ພົບປະຢູ່ໃນນະຄອນຫຼວງກາບູນ.

    ຂໍ້ມູນດັ່ງກ່າວມີອອກມາ ຫຼັງຈາກການເຈລະຈາຮອບທີ 9 ລະຫວ່າງທ່ານ ຊານເມ ຄາລິນຊາດ ກັບຕົວແທນຂອງຕາລີບັນ ຊຶ່ງຈັດຂຶ້ນທີ່ນະຄອນຫຼວງໂດຮາ ຂອງກາຕາ ແຕ່ວັນທີ 22-31 ສິງຫາທີ່ຜ່ານມາ ເພື່ອຊອກຫາວິທີທາງຢຸດຕິການພິພາດຢູ່ໃນອາຟະການິດສະຖານ  ທີ່ໄດ້ແກ່ຍາວມາ ເປັນເວລາເກືອບ 18 ປີແລ້ວນັ້ນ.

    ປັດຈຸບັນນີ້ ມີທະຫານຂອງ ສ ອາເມຣິກາ ປະມານ 14.000 ຄົນ ປະຈຳການຢູ່ໃນ ອາຟະການິດສະຖານ. ປະທານາທິບໍດີ ສ ອາເມຣິກາ ໂດນາລ ທຣຳ ຖະແຫຼງເມື່ອວັນທີ 29 ສິງຫາຜ່ານມາວ່າ ສ ອາເມຣິກາ ມີແຜນການຖອນທະຫານ ຢູ່ໃນອາຟະການິດສະຖານ ລົງໃຫ້ຍັງເຫຼືອ 8.600 ຄົນ.

 

ຂ່າວທີ່ກ່ຽວຂ້ອງ