ເກີດ​ເຫດການ​ໂຈມ​ຕີ​ຄົນ​ຕ່າງ​ປະ​ເທດ ຢູ່​ໃນ​ອາ​ຟະ​ຣິກ​ກາ​ໃຕ້

160 05 ກ.ຍ. 2019 ຂ່າວຕ່າງປະເທດ
ເກີດ​ເຫດການ​ໂຈມ​ຕີ​ຄົນ​ຕ່າງ​ປະ​ເທດ ຢູ່​ໃນ​ອາ​ຟະ​ຣິກ​ກາ​ໃຕ້

    ປະທານາທິບໍດີ ໄຊ​ຣິນ ຣາ​ມາ​ໂຟ​ຊາ ຜູ້ນຳ​ຂອງ​ອາ​ຟະ​ຣິກ​ກາ​ໃຕ້ ມີ​ຄຳ​ຖະແຫຼງ​ອອກ​ມາ​ເມື່ອ​ວັນ​ທີ 3 ກັນຍາ​ນີ້ ໂດຍ​ໄດ້​ກ່າວ​ປະນາມ​ຕໍ່​ການ​ໂຈມ​ຕີ ທີ່​ມຸ່ງ​ເປົ້າ​ໃສ່​ຄົນ​ຕ່າງປະເທດ ຢູ່​ໃນ​ບາງ​ທ້ອງຖິ່ນ​ຂອງ​ອາ​ຟະ​ຣິກ​ກາ​ໃຕ້ ໃນ​ໄລຍະ​ເວລາ​ອາທິດ​ກວ່າ​ທີ່​ຜ່ານ​ມາ ພ້ອມ​ກັນ​ນັ້ນ​ທ່ານ​ກໍ​ໄດ້​ສະເໜີ​ໃຫ້​ກອງ​ກຳລັງ​ທີ່​ກ່ຽວຂ້ອງ ເລັ່ງ​ສະກັດ​ກັ້ນ​ເຫດການ​ຮຸນ​ແຮງ​ທີ່​ເກີດ​ຂຶ້ນ​ນັ້ນ.

    ຖະແຫຼງການ​ຂອງ​ປະທານາທິບໍດີ ຣາ​ມາ​ໂຟ​ຊາ ມີ​ອອກ​ມາ​ທ່າມກາງ​ທີ່​ກະແສ​ຄວາມ​ຮຸນ​ແຮງ ໂດຍ​ມຸ່ງ​ເປົ້າ​ໃສ່​ຄົນ​ຕ່າງປະເທດ ຢູ່​ໃນ​ແຂວງ ເກົາ​ເຕງ ຊຶ່ງ​ມີ​ນະຄອນຫຼວງ ເປຣ​ຕໍ​ເຣຍ ແລະ ນະຄອນ ໂຈ​ຮັນ​ແນ​​ັສ​ເບີກ ຕັ້ງ​ຢູ່​ນັ້ນ​ນັບ​ມື້​ນັບ​ຮ້າຍ​ແຮງ​ຂຶ້ນ.

   ຮ້ານ​ຄ້າ​ຫຼາຍ​ແຫ່ງ​ທີ່​ຄອບ​ຄອງ​ໂດຍ​ຄົນ​ຕ່າງປະເທດ ໄດ້​ຖືກ​ຈູດ​ທຳລາຍ ແລະ ຖືກ​ປຸ້ນ​ຈີ້. ນອກຈາກ​ນັ້ນແລ້ວ ພວກ​ກໍ່​ເຫດ​ຮຸນ​ແຮງ ຍັງ​ຈູດ​ລົດຍົນ ກໍ​ຄື​ໂຈມ​ຕີ​ຄົນ​ຕ່າງປະເທດ ທີ່​ພວມ​ດຳລົງ​ຊີວິດ​ຢູ່​ໃນ​ຕົວ​ເມືອງ​ທັງ​ສອງ​ແຫ່ງ​ດັ່ງກ່າວ. ກະແສ​ຄວາມ​ຮຸນ​ແຮງ​ເພີ່ມ​ທະວີ​ຂຶ້ນ​ສູ່​ຈຸດ​ສຸດ​ຍອດ ເມື່ອ​ມີ​ຜູ້​ຖືກ​ໄຟ​ເຜົາ​ເສຍ​ຊີວິດ 2 ຄົນ ໃນ​ຄ່ຳ​ຄືນ​ຂອງ​ວັນ​ທີ 2 ກັນຍາ​ທີ່​ຜ່ານ​ມາ ຊຶ່ງ​ມີ​ຂຶ້ນ​ຢູ່​ໃນ​ເຮືອນ​ຫຼັງ​ໜຶ່ງ ໃນ​ນະຄອນ ໂຈ​ຮັນ​ແນ​​ັສ​ເບີກ ຫຼັງ​ຈາກ​ທີ່​ພວກ​ກໍ່​ຄວາມ​ຮຸນ​ແຮງ ຈູດ​ທີ່ຢູ່​ອາ​ໃສ​ຢູ່​ທີ່​ນັ້ນ. ໃນ​ເວລາ​ຕໍ່​ມາ ເຈົ້າ​ໜ້າທີ່​ຕຳຫຼວດ​ໃນ​ທ້ອງຖິ່ນ ໄດ້​ຈັບ​ກຸມ 25 ຄົນ​ທີ່​ຖືກ​ສົງ​ໃສ​ເປັນ​ຜູ້​ກໍ່​ເຫດ​ດັ່ງກ່າວ.

    ກ່ອນ​ໜ້າ​ນັ້ນ ເມື່ອ​ວັນ​ທີ 26 ສິງຫາ​ທີ່​ຜ່ານ​ມາ ສະມາຄົມ​ການ​ຂົນສົ່ງ​ທາງບົກ​ຂອງ​ອາ​ຟະ​ຣິກ​ກາ​ໃຕ້ ໄດ້​ຮຽກຮ້ອງ​ໄປ​ຍັງ​ລັດຖະບານ​ປະເທດ​ນີ້ ໃຫ້​ປະຕິບັດ​ມາດ​ຕະການ​ສຸກ​ເສີນ ເພື່ອ​ສະກັດ​ກັ້ນ​ການ​ໂຈມ​ຕີ ຊຶ່ງ​ແນໃສ່​ຄົນ​ຂັບ​ລົດ​ຂົນສົ່ງ​ທີ່​ຖື​ສັນຊາດ​ຕ່າງປະເທດ ທ່າມກາງ​ທີ່​ມີ​ຄົນ​ຂັບ​ລົດ​ຊາວ​ຕ່າງປະເທດ 200 ກວ່າ​ຄົນ ໄດ້​ຖືກ​ຂ້າ​ຕາຍ​ຢູ່​ໃນ​ອາ​ຟະ​ຣິກ​ກາ​ໃຕ້ ນັບ​ແຕ່​ເດືອນ​ມີນາ ປີ 2018 ເປັນຕົ້ນ​ມາ.

    ສູນ​ຍ້າຍ​ຖິ່ນ​ຖານ ແລະ ສັງຄົມ ທະວີບ​ອາ​ຟະ​ຣິກ​ກາ (ACMS) ໃຫ້​ຮູ້​ວ່າ ກະແສ​ຄວາມ​ຮຸນ​ແຮງ ທີ່​ແນ​ເປົ້າ​ໃສ່​ຄົນ​ຕ່າງປະເທດ​ຢູ່​ໃນ​ອາ​ຟະ​ຣິກ​ກາ​ໃຕ້ ຂຶ້ນ​ສູ່​ຈຸດ​ສູງ​ເມື່ອ​ປີ 2008 ໂດຍ​ມີ​ຜູ້​ເສຍ​ຊີວິດ 100 ກວ່າ​ຄົນ ແລະ ໃນ​ປີ 2015 ມີ​ຜູ້​ເສຍ​ຊີວິດ 60 ກວ່າ​ຄົນ.

    ຕົວ​ເລກ​ສະຖິຕິ​ທີ່​ບໍ່​ເປັນ​ທາງ​ການ ຊີ້​ໃຫ້​ເຫັນ​ວ່າ ປັດຈຸບັນ​ນີ້ ມີ​ຄົນ​ຕ່າງປະເທດ​ປະມານ 3,5 ລ້ານ​ຄົນ ພວມ​ດຳລົງ​ຊີວິດ ແລະ ເຮັດ​ວຽກ ຢູ່​ໃນ​ອາ​ຟະ​ຣິກ​ກາ​ໃຕ້ ຊຶ່ງ​ເປັນ​ປະເທດ​ທີ່​ມີ​ປະຊາກອນ 56 ລ້ານ​ຄົນ​ນັ້ນ.

ຂ່າວທີ່ກ່ຽວຂ້ອງ