ລັດຖະບານ​ອັງກິດ​ປະ​ລາ​ໄຊ​ໃນ​ການ​ລົງ​ຄະ​ແນນ​ສຽງ​ຢູ່​ໃນ​ສະພາ​ຕ່ຳ

275 05 ກ.ຍ. 2019 ຂ່າວຕ່າງປະເທດ
ລັດຖະບານ​ອັງກິດ​ປະ​ລາ​ໄຊ​ໃນ​ການ​ລົງ​ຄະ​ແນນ​ສຽງ​ຢູ່​ໃນ​ສະພາ​ຕ່ຳ

   ນາຍົກລັດຖະມົນຕີ​ອັງກິດ ໂບ​ຣິ​​ສ ຈອນ​ສັນ ຖະແຫຼງ​ເມື່ອ​ວັນ​ທີ 4 ກັນຍາ​ນີ້​ວ່າ ຈະ​ສະເໜີ​ໃຫ້​ຈັດການ​ເລືອກ​ຕັ້ງ​ກ່ອນ​ກຳນົດ ຫຼັງ​ຈາກ​ທີ່​ໄດ້​ປະສົບ​ກັບ​ຄວາມ​ປະ​ລາ​ໄຊ​ຄັ້ງ​ໃຫຍ່ ກ່ຽວ​ກັບ​ຍຸດ​ທະ​ສາດ Brexit (ອັງກິດ​ຖອນ​ຕົວ​ອອກ​ຈາກ​ສະຫະພາບ​ເອີ​ຣົບ) ຂອງ​ຕົນ ຫຼັງ​ຈາກ​ການ​ລົງ​ຄະແນນ​ສຽງ​ຄັ້ງ​ສຳຄັນ​ຢູ່​ໃນ​ສະພາ​ຕ່ຳ.

    ນາຍົກລັດຖະມົນຕີ ຈອນ​ສັນ ກ່າວ​ຢືນຢັນ​ຢູ່​ໃນ​ສະພາ​ຕ່ຳ​ອັງກິດ ຫຼັງ​ຈາກ​ທີ່​ໄດ້​ມີ​ການ​ລົງ​ຄະແນນ​ສຽງ​ດັ່ງກ່າວ ວ່າ​ທ່ານ​ບໍ່​ຢາກ​ໃຫ້​ມີ​ການ​ເລືອກ​ຕັ້ງ ແຕ່​ຖ້າ​ຫາ​ກວ່າ​ບັນດາ​ສະມາຊິກ​ລັດ​ຖະ​ສະພາ​ຕົກລົງ​ຢຸດຕິ​ການ​ເຈລະຈາ​ກັບ​ສະຫະພາບ​ເອີ​ຣົບ (EU) ແລະ ສືບຕໍ່​ໂຈະ Brexit  ແລ້ວ ການ​ເລືອກ​ຕັ້ງ​ກ່ອນ​ກຳນົດ ເປັນ​ພຽງ​ວິທີ​ດຽວ ເພື່ອ​ແກ້​ໄຂ​ບັນຫາ.

    ການ​ລົງ​ຄະແນນ​ສຽງ ທີ່​ມີ​ຄວາມ​ໝາຍ​ສຳຄັນ​ດັ່ງກ່າວ​ຢູ່​ໃນ​ສະພາ​ຕ່ຳ​ອັງກິດ​ກ່ອນ​ໜ້າ​ນີ້ ໂດຍ​ມີ  328 ສຽງ​ສະໜັບສະໜູນ ແລະ  301 ສຽງ​ຄັດຄ້ານ​ນັ້ນ ບັນດາ​ສະມາຊິກ​ລັດ​ຖະ​ສະພາ ຈະ​ສືບຕໍ່​ມີ​ການ​ລົງ​ຄະແນນ​ສຽງ​ອີກ ໃນ​ວັນ​ທີ 4 ກັນຍາ (ເວລາ​ໃນ​ອັງກິດ) ກ່ຽວ​ກັບ​ຮ່າງ​ກົດໝາຍ​ສະບັບ​ໜຶ່ງ ທີ່​ອາດ​ຈະ​ເຮັດ​ໃຫ້​ນາຍົກລັດຖະມົນຕີ​ອັງກິດ ຕ້ອງ​ໄດ້​ສະເໜີ​ໄປ​ຍັງ EU ໃຫ້​ໂຈະ Brexit ຕື່ມ​ອີກ 3 ເດືອນ ຖ້າ​ຫາ​ກວ່າ​ບໍ່​ບັນລຸ​ຂໍ້​ຕົກລົງ​ສະບັບ​ໜຶ່ງ​ກັບ EU ກ່ອນ​ວັນ​ທີ 19 ຕຸລາ​ໜ້າ​ນີ້. ຕາມ​ແຜນການ​ແລ້ວ ອັງກິດ​ຈະ​ຖອນ​ອອກ​ຈາກ EU ໃນ​ວັນ​ທີ 31 ຕຸລາ 2019.

    ຫຼັງ​ຈາກ​ທີ່​ປະສົບ​ກັບ​ຄວາມ​ປະ​ລາ​ໄຊ ໃນ​ຍຸດ​ທະ​ສາດ​ການ​ຖອນ​ອອກ​ຈາກ EU ແລ້ວ ລັດຖະບານ​ອັງກິດ ກໍ​ໄດ້​ແຈ້ງ​ໃຫ້​ຮູ້​ວ່າ ຈະ​ຈ່າຍ​ເງິນ​ຈາກ​ງົບປະມານ​ເພີ່ມ​ອີກ 2 ຕື້​ປອນ (ເງິນ​ອັງກິດ) ເພື່ອ​ແກ້​ໄຂ​ບັນຫາ​ຕ່າງໆ​ທີ່​ເກີດ​ຈາກ Brexit. ແຈ້ງ​ການ​ນັ້ນ​ລະບຸ​ວ່າ ເງິນ​ຈຳນວນ​ດັ່ງກ່າວ ຈະ​ນຳ​ໃຊ້​ພາຍ​ໃນ​ປີ​ຫຼັງ​ຈາກ​ທີ່​ອັງກິດ​ອອກ​ໄປ​ຈາກ EU ໂດຍ​ໃຊ້​ໃຫ້​ແກ່​ໂຄງການ​ປ້ອງ​ກັນ​ຊາຍ​ແດນ ແລະ ພື້ນຖານ​ໂຄງ​ລ່າງ​ທ່າ​ກຳປັ່ນ.

 

ຂ່າວທີ່ກ່ຽວຂ້ອງ