ອານຸສອນ ຄວ້າອັນດັບ 1 ແລ່ນຂ້າມຮົ້ວຊີງແຊັມປະເທດໄທ

409 05 ກ.ຍ. 2019 ວົງຈອນກີລາ
ອານຸສອນ ຄວ້າອັນດັບ 1 ແລ່ນຂ້າມຮົ້ວຊີງແຊັມປະເທດໄທ

    ທ້າວ ອາ​ນຸ​ສອນ ໄຊ​ສາ ນັກ​ແລ່ນ​ຂ້າມ​ຮົ້ວ 110 ແມັດ ທີມ​ຊາດ​ລາວ ຄວ້າ​ຫຼຽນ​ຄຳ ລາຍ­ການ​ແລ່ນ​ຂ້າມ​ຮົ້ວ​ຊີງ​ແຊັມ​ປະ­ເທດ​ໄທ ຊີງ​ຂັນ​ພະ​ຣາ​ຊະ​ທານ​ເຈົ້າ​ຊີ­ວິດ​ໄທ ປະ­ຈຳ​ປີ 2019 ວັນ​ທີ 30 ສິງ­ຫາ-2 ກັນ­ຍາ 2019 ຢູ່​ປະ­ເທດ​ໄທ.

    ອາ​ນຸ​ສອນ ລົງ​ແຂ່ງ​ໃນ​ຖາ­ນະ​ຕົວ​ແທນ​ຈາກ​ສະ­ໂມ­ສອນ​ທະ­ຫານ​ອາ­ກາດ​ປະ­ເທດ​ໄທ ແຂ່ງ​ກັບ​ນັກ ກີ­ລາ​ອີກ 7 ຄົນ ເຊິ່ງ​ສາ­ມາດ​ແລ່ນ​ເຂົ້າ​ເສັ້ນ​ໄຊ​ເປັນ​ຄົນ​ທຳ​ອິດ ດ້ວຍ​ເວ­ລາ 14,68 ວິ­ນາ­ທີ ເອົາ​ຊະ­ນະ​ອັນ​ດັບ​ທີ 2 ພຽງ 0,6 ວິ­ນາ­ທີ ແຕ່​ຍັງ​ບໍ່​ແມ່ນ​ເວ­ລາ​ດີ​ສຸດ​ຂອງ ອາ​ນຸ​ສອນ ເພາະ​ເວ­ລາ​ດີ​ສຸດ​ຂອງ​ອາ​ນຸ​ສອນ​ແມ່ນ 14,45 ວິ­ນາ­ທີ ໃນ​ການ​ແຂ່ງ­ຂັນ​ຊີງ​ແຊັມ​ອາ­ຊີ ໃນ​ທ້າຍ​ເດືອນ​ເມ­ສາ ຜ່ານ​ມາ.

    ອາ​ນຸ​ສອນ ເຂົ້າ​ຮ່ວມ​ລາຍ­ການ​ນີ້ ເພາະ​ສະ­ໂມ­ສອນ​ທະ­ຫານ​ອາ­ກາດ​ປະ­ເທດ​ໄທ ຂໍ​ຢືມ​ຕົວ​ຈາກ​ມະ­ຫາ­ວິ­ທະ­ຍາ­ໄລ​ກຸງ​ເທບ​ທົນ​ບູ​ລີ ປັດ­ຈຸ­ບັນ ອາ​ນຸ​ສອນ ໄດ້​ທຶນ​ສຶກ​ສາ​ຕໍ່​ປະ­ລິນ­ຍາ​ໂທ​ຈາກ​ມະ­ຫາ​ວິ​ທະ­ໄລ​ດັ່ງ­ກ່າວ ສາ­ຂາ​ບໍ­ລິ­ຫານ​ທຸ­ລະ​ກິດ ອາ​ນຸ​ສອນ ກໍ​ເລືອກ​ໂອ­ກາດ​ນີ້​ເປັນ​ການ​ທົດ​ລອງ​ຮ່າງ­ກາຍ ກ່ອນ​ເຂົ້າ​ຮ່ວມ​ຊີງ​ແຊັມ​ໂລກ 2019 ຢູ່​ໂດ​ຮາ ປະ­ເທດ​ກາ​ຕ້າ ວັນ​ທີ 27 ກັນ­ຍາ-6 ຕຸ­ລາ 2019 ເຊິ່ງ​ໄລ­ຍະ​ນີ້​ແມ່ນ​ກຳ­ລັງ​ເກັບ​ຕົວ​ເຝິກ­ຊ້ອມ​ຢູ່​ປະ­ເທດ​ໄທ.

ຂ່າວທີ່ກ່ຽວຂ້ອງ