ເບິ່ງບ້ານເຂົາເອົາບົດຮຽນ 05-09-2019

315 05 ກ.ຍ. 2019 ຫົວຂໍ້ຂ່າວອື່ນໆ

    ມື້­ນີ້​ມີ 2 ເລື່ອງ​ມາ​ເລົ່າ​ສູ່​ຟັງ ຄື ເລື່ອງ​ກ່ຽວ​ກັບ​ຄະ­ດີ ທີ່​ເກີດ​ຂຶ້ນ​ຍ້ອນ​ພະ­ຍາດ “ໄວ​ປາກ” ແລະ ຄະ­ດີ​ການ​ປະ­ພຶດ​ແບບ​ແຕກ​ປອກ ທີ່​ເກີດ​ຂຶ້ນ​ຢູ່​ໄທ ແລະ ຢູ່ ນູ​ແວນ​ເຊ​ລັງ (ນິວ​ຊີ​ແລນ) ຕາມ​ລຳ­ດັບ.

    ທີ່ ໄທ: ມີ​ເລື່ອງ​ທີ່​ຄວນ​ຈົດ​ຈຳ​ໄວ້​ເປັນ​ຄະ­ຕິ​ເຕືອນ­ໃຈ ເພື່ອ​ປ້ອງ​ກັນ​ບໍ່​ໃຫ້​ເກີດ​ພະ­ຍາດ “ໄວ​ປາກ” ທີ່​ຈະ​ສ້າງ​ຄວາມ​ລຳ­ບາກ​ໃຫ້​ຕົນ​ເອງ​ຕາມ​ພາຍ­ຫຼັງ ເລື່ອງ​ນີ້​ເກັບ​ມາ​ຈາກ​ໜັງ­ສື­ພິມ The Nation ສະ­ບັບ​ເກົ່າໆ (21 ມີ­ນາ 2017) ເລື່ອງ​ມີ​ຢູ່ ຄົນ​ໂດຍ­ສານ​ທີ່​ເປັນ​ເດັກ​ໄວ​ລຸ້ນ​ອາ­ຍຸ 14 ປີ ໃນ​ຖ້ຽວ​ບິນ​ແຕ່​ສະ­ໜາມ​ບິນ​ສຸ­ວັນ­ນະ​ພູມ ສູ່ ຊຽງ​ຣາຍ ປະ­ເທດ​ໄທ ພະ­ຍາດ “ໄວ​ປາກ” ຂອງ​ເດັກ​ຊາຍ​ຄົນ​ນີ້ ໄດ້​ເຮັດ​ໃຫ້​ຖ້ຽວ​ບິນ​ຊັກ​ຊ້າ​ເປັນ​ເວ­ລາ​ຫຼາຍ​ຊົ່ວ­ໂມງ ມີ​ຜູ້­ໂດຍ­ສານ​ອັ່ງ​ອໍ​ຢູ່​ທັງ​ໃນ​ສະ­ໜາມ​ບິນ​ຕົ້ນ​ທາງ ແລະ ປາຍ­ທາງ ລຳ­ດັບ​ເຫດ­ການ​ມີ​ດັ່ງ­ນີ້: ໃນ​ຂະ­ນະ​ທີ່​ຜູ້­ໂດຍ­ສານ​ທັງ­ຫຼາຍ​ກຳ­ລັງ​ຜ່ານ​ເຄື່ອງ​ກວດ​ເພື່ອ​ຂຶ້ນ​ເຄື່ອງ​ບິນ​ຢູ່​ສະ­ໜາມ​ບິນ​ສຸ­ວັນ­ນະ​ພູມ​ນັ້ນ ເດັກ​ຊາຍ​ຄົນ​ໜຶ່ງ​ຫິ້ວ​ກະ­ເປົາ​ອ່າວ​ໜັກ ພະ­ນັກ­ງານ​ຈີກ​ປີ້​ເລີຍ​ອາ­ສາ​ຊ່ວຍ​ຈົກ​ເອົາ​ປີ້​ຈາກ​ຖົງ​ເດັກ​ຊາຍ​ຄົນ​ນັ້ນ ໃນ​ເວ­ລາ​ນັ້ນ​ເອງ​ເດັກ​ຊາຍ “ໄວ​ປາກ” ໄດ້​ເວົ້າ​ຂຶ້ນ​ວ່າ: “ລະ­ວັງ...ລະ­ວັງ​ແດ່ ຢູ່​ໃນ​ກະ­ເປົາ​ຂ້ອຍ​ນີ້ ມີ​ລູກ​ລະ­ເບີດ​ເນີ!” ພໍ­ໄດ້​ຍິນ​ແນວ​ນັ້ນ ຝ່າຍ​ພະ­ນັກ­ງານ​ກ່ຽວ­ຂ້ອງ ລາຍ​ງານ​ໃຫ້​ຫົວ­ໜ້າ​ຝູງ​ບິນ​ຊາບ ຫົວ­ໜ້າ​ຝູງ​ບິນ​ໄດ້​ອອກ​ປະ­ກາດ​ເຕືອນ​ໄພ​ໃນ​ທົ່ວ​ສະ­ໜາມ​ບິນ​ຢ່າງ​ອັດ­ຕະ­ໂນ­ມັດ ແຖວ​ຜູ້­ໂດຍ­ສານ ເພື່ອ​ຂຶ້ນ​ເຄື່ອງ​ບິນ​ຖືກ​ສັ່ງ​ຢຸດ​ພ້ອມ​ບາດ ຂ່າວ​ບໍ່​ໄດ້​ບອກ​ຊື່​ເດັກ “ໄວ​ປາກ” ຄົນ​ນັ້ນ ເພາະ​ຍັງ​ຢູ່​ໃນ​ໄວ​ເດັກ ແຕ່​ໄດ້​ບອກ​ພຽງ​ວ່າ ທາງ​ການ​ໄດ້​ຕັ້ງ​ຄະ­ດີ​ກັບ​ເດັກ​ຊາຍ​ຄົນ​ນີ້​ເປັນ​ທີ່​ຮຽບ​ຮ້ອຍ​ແລ້ວ ຕາມ​ຢູ່​ທຸກໆ​ສະ­ໜາມ​ບິນ​ໃນ​ໂລກ​ນີ້ ມີ​ກົດ​ເຫຼັກ​ຫ້າມ​ປ່ອຍ​ປະ­ໂຫຍກ​ຄຳ​ເວົ້າ​ທີ່​ແຕະ­ຕ້ອງ​ເຖິງ​ຄວາມ​ປອດ​ໄພ​ຂອງ​ການ­ບິນ​ເດັດ­ຂາດ ບໍ່​ວ່າ​ຈະ​ເປັນ​ການ​ເວົ້າ​ຫຼິ້ນ-ເວົ້າ​ຕະ­ຫຼົກ ຫຼື​ເວົ້າ​ຍ້ອນ​ປາກ​ລັກ​ລັ່ນ​ກໍ​ຕາມ ທັງ​ໝົດ​ຍ່ອມ​ໄດ້​ຮັບ​ໂທດ​ໝົດ​ຕາມ​ກົດ­ໝາຍ​ທັງ​ນັ້ນ.

    ທີ່ ນູ​ແວນ​ເຊ​ລັງ (ນິວ​ຊີ​ແລນ): ໜັງ­ສື­ພິມ The Nation (17 ມັງ­ກອນ 2019) ໃຫ້​ຮູ້​ກ່ຽວ​ກັບ​ການ​ປະ­ພຶດ​ແບບ​ແຕກ​ປອກ​ນອກ​ລະ­ບຽບ ຂອງ​ນັກ​ທ່ອງ​ທ່ຽວ​ອັງ­ກິດ​ຄອບ­ຄົວ​ໜຶ່ງ ທີ່​ໄປ​ທ່ຽວ​ປະ­ເທດ​ນິວ​ຊີ​ແລນ ຈົນ​ເຮັດ​ໃຫ້​ຊາວ​ນິວ​ຊີ​ແລນ​ເບື່ອ​ຂີ້​ໜ້າ ເຫດ­ການ​ໜ້າ​ອັບ­ອາຍ​ຂາຍ­ໜ້າ​ທີ່​ຄົນ​ໃນ​ຄອບ­ຄົວ​ນັກ​ທ່ອງ​ທ່ຽວ​ດັ່ງ­ກ່າວ ກໍ່​ຂຶ້ນ​ທີ່​ເມືອງ​ອອກ​ແລນ (Auckland) ນັ້ນ ລວມ​ມີ​ການ​ຖິ້ມ​ຂີ້​ເຫຍື້ອ​ຊະ­ຊາຍ ການ​ໃຊ້​ຄວາມ​ຮຸນ​ແຮງ ການ​ບໍ່​ຈ່າຍ​ຄ່າ​ອາ­ຫານ ແລະ ນິດ​ໄສ​ອັນ­ທະ­ພານ ສັນ­ດານ​ຫຍາບ​ອື່ນໆ ວິ­ທີ​ການ​ແບບ​ສະ­ຫຼາດ​ແກມ​ໂກງ​ຂອງ​ນັກ​ທ່ອງ​ທ່ຽວ​ຄອບ­ຄົວ​ນີ້ ເພື່ອ​ບໍ່​ໄດ້​ຈ່າຍ​ຄ່າ​ອາ­ຫານ ກໍ​ຄື ເອົາ​ຂອງ​ເປື້ອນ ເສັ້ນ​ຜົມ ແລະ ອື່ນໆ ຖິ້ມ​ໃສ່​ອາ­ຫານ ແລ້ວ​ກໍ​ຖິ້ມ​ໂທດ​ໃສ່​ເຈົ້າ​ຂອງ​ຮ້ານ​ອາ­ຫານ​ວ່າ​ອາ­ຫານ​ເປື້ອນ ພ້ອມ​ທັງ​ບໍ່​ຍອມ​ຈ່າຍ​ເງິນ ເຫດ​ຮ້າຍ​ຄັ້ງ​ນີ້ ໄດ້​ຮ້ອນ​ໄປ​ຮອດ​ຫູ​ເຈົ້າ​ຄອງ​ນະ­ຄອນ ອອກ​ແລນ ຊື່​ທ່ານ ຟິນ​ກ໋ອບ (Phil Goff) ທ່ານ​ເວົ້າ​ວ່າ “ນັກ​ທ່ອງ​ທ່ຽວ​ຈຸ​ນີ້ ບໍ່​ຕ່າງ​ກັບ​ຂີ້​ເຫຍື້ອ ພວກ​ເຂົາ​ແມ່ນ​ປີງ ການ​ປະ­ພຶດ​ຂອງ​ພວກ​ເຂົາ​ແມ່ນ​ອາ​ຊະ​ຍາ​ກຳ ພວກ​ເຂົາ​ຊົ່ວ​ກວ່າ​ໝູ ຂ້າ­ພະ­ເຈົ້າ​ຊິ​ເຂກ​ຫົວ​ພວກ​ເຂົາ​ອອກ​ຈາກ​ປະ­ເທດ​ດຽວ­ນີ້” ຈາກ​ນັ້ນ​ມາ​ບໍ່­ພໍ­ຄາວ ທ່ານ ພີ​ເຕີ ດີ​ວອຍ ຮອງ​ຫົວ­ໜ້າ​ຫ້ອງ­ການ​ກວດ­ກາ​ຄົນ​ເຂົ້າ​ເມືອງ​ກໍ​ແຈ້ງ­ວ່າ ໄດ້​ມີ​ຄຳ​ສັ່ງ​ເນ­ລະ­ເທດ​ຄອບ­ຄົວ​ນັກ​ທ່ອງ​ທ່ຽວ​ອັງ­ກິດ​ດັ່ງ­ກ່າວ​ເປັນ​ທີ່​ຮຽບ​ຮ້ອຍ​ແລ້ວ ຂ່າວ​ໃຫ້​ຮູ້​ຕື່ມ​ວ່າ ຄົນ​ໃນ​ຄອບ­ຄົວ​ນັກ​ທ່ອງ​ທ່ຽວ​ນີ້​ໄດ້​ລັກ​ວັດ­ຖຸ​ຢູ່​ປ້ຳ­ນ້ຳ­ມັນ ມູນ​ຄ່າ​ກວ່າ 30 ໂດ​ລາ​ສະ­ຫະ­ລັດ ນັກ​ທ່ອງ​ທ່ຽວ​ອີກ​ຄົນ​ໜຶ່ງ​ທີ່​ຊື່­ວ່າ ທ້າວ ຈອນ​ສັນ ນັ້ນ ໄດ້​ອວດ​ອ້າງ​ວ່າ ເຂົາ​ມາ​ຈາກ​ຄອບ­ຄົວ​ຜູ້­ດີ ພໍ່­ເຖົ້າ​ຂອງ​ເຂົາ​ເປັນ​ຄົນ​ຮັ່ງ­ມີ​ທີ່​ສຸດ​ລະ­ດັບ​ທີ 10 ຂອງ​ອັງ­ກິດ.

    ທຸກ​ປະ­ເທດ​ຕ້ອງ­ການ​ດຶງ​ດູດ​ນັກ​ທ່ອງ​ທ່ຽວ​ເຂົ້າ​ປະ­ເທດ ແຕ່​ແນ່­ນອນ​ຄົງ​ບໍ່​ແມ່ນ​ນັກ​ທ່ອງ​ທ່ຽວ​ປະ­ເພດ​ທີ່​ກ່າວ​ມາ​ຂ້າງ​ເທິງ​ນີ້​ເດັດ­ຂາດ !.

ຂ່າວທີ່ກ່ຽວຂ້ອງ