ເຊີນເຂົ້າຮ່ວມແຂ່ງຂັນບານເຕະຍິງ ຮຸ່ນທົ່ວໄປ ປະຈໍາປີ 2019

634 06 ກ.ຍ. 2019 ວົງຈອນກີລາ
ເຊີນເຂົ້າຮ່ວມແຂ່ງຂັນບານເຕະຍິງ ຮຸ່ນທົ່ວໄປ ປະຈໍາປີ 2019

    ເພື່ອ​ເປັນ​ການ​ພັດ­ທະ­ນາ​ກີ­ລາ​ບານ­ເຕະ ໃຫ້​ມີ​ການ­ເຄື່ອນ­ໄຫວ​ເປັນ​ປົກ­ກະ­ຕິ ແລະ ຕໍ່​ເນື່ອງ ທັງ​ປະ­ຕິ­ບັດ​ຕາມ​ແຜນ­ການ​ຈັດ​ແຂ່ງ­ຂັນ ປະ­ຈຳ​ປີ 2019 ໃຫ້​ບັນ­ລຸ​ເປົ້າ​ໝາຍ ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ (ສຕລ) ຈະ​ເປີດ​ແຂ່ງ­ຂັນ​ບານ­ເຕະ​ຍິງ​ຮຸ່ນ​ທົ່ວ​ໄປ ຊີງ​ຂັນ ສຕລ ປະ­ຈຳ​ປີ 2019 ໃນ​ວັນ​ທີ 5 ຕຸ­ລາ 2019 ເຊິ່ງ​ຈະ​ແບ່ງ​ເປັນ 2 ກຸ່ມ ແລ້ວ​ແຂ່ງ­ຂັນ​ແບບ​ພົບ​ກັນ​ໝົດ​ຮອບ​ດຽວ ຄັດ​ເອົາ​ອັນ​ດັບ 1-2 ຂອງ​ແຕ່​ລະ​ກຸ່ມ ຜ່ານ​ເຂົ້າ​ສູ່​ຮອບ​ຮອງ​ຊະ­ນະ​ເລີດ ໂດຍ​ກຳ­ນົດ​ເອົາ 10 ທີມ ແຂ່ງ­ຂັນ 11 ຄົນ.

    ເງື່ອນ­ໄຂ​ນັກ­ກີ­ລາ​ຕ້ອງ​ມີ​ອາ­ຍຸ 16-25 ປີ ເພດ​ຍິງ ສັນ­ຊາດ​ລາວ ແລະ ມີ​ເອ­ກະ­ສານ​ຢັ້ງ­ຢືນ​ຕົວ​ຕົນ​ຖືກ­ຕ້ອງ​ເຊັ່ນ: ປື້ມ​ສຳ­ມະ­ໂນ​ຄົວ ບັດ­ປະ­ຈຳ­ຕົວ ແລະ ພາ​ສ​ປອດ ຈຶ່ງ​ສາ­ມາດ​ລົງ­ທະ­ບຽນ ແລະ ໄດ້​ຮັບ​ອະ­ນຸ­ຍາດ​ໃຫ້​ເຂົ້າ​ຮ່ວມ​ການ​ແຂ່ງ­ຂັນ​ໄດ້ ເຊິ່ງ​ທີມ​ທີ່​ເຂົ້າ​ຮ່ວມ​ແຂ່ງ­ຂັນ​ຈະ​ບໍ່​ໄດ້​ເສຍ​ຄ່າ​ສະ­ໝັກ ແລະ ຈະ​ໄດ້​ຮັບ​ເງິນ​ອຸດ​ໜູນ ທີມ​ລະ 3 ລ້ານ​ກີບ ພ້ອມ​ບານ 10 ໜ່ວຍ ສ່ວນ​ລາ­ງວັນ​ຊະ­ນະ​ເລີດ ຈະ​ໄດ້​ຮັບ​ຂັນ 1 ໜ່ວຍ ຫຼຽນ​ລາ­ງວັນ ພ້ອມ​ເງິນ 15 ລ້ານ​ກີບ ອັນ​ດັບ 2 ແລະ ອັນ​ດັບ 3 ຈະ​ໄດ້​ຮັບ​ຫຼຽນ​ລາ­ງວັນ ພ້ອມ​ເງິນ​ລາ­ງວັນ​ຕາມ​ກົດ​ລະ­ບຽບ.

    ສະ­ນັ້ນ​ຂໍ​ເຊີນ​ບັນ­ດາ​ໂຮງ­ຮຽນ ວິ­ທະ­ຍາ­ໄລ ມະ­ຫາ­ວິ­ທະ­ຍາ­ໄລ ຮ້ານ​ຄ້າ ບໍ­ລິ­ສັດ ອົງ​ການ­ຈັດ­ຕັ້ງ​ພາກ​ລັດ ແລະ ເອ­ກະ​ຊົນ ເຂົ້າ​ຮ່ວມ ເຊິ່ງ​ໄດ້​ເປີດ​ຮັບ​ສະ­ໝັກ​ແຕ່​ວັນ​ທີ 3-20 ກັນ­ຍາ 2019.

ຂ່າວທີ່ກ່ຽວຂ້ອງ