ຂ່າວຫຼ້າສຸດ

...G7 ໝົດນໍ້າຢາ...

5.368 09 ກ.ຍ. 2019 ນານາສາລະ

    ກອງ​ປະ­ຊຸມ​ສຸດ​ຍອດ​ກຸ່ມ ບັນ­ດາ​ປະ­ເທດ​ອຸດ­ສາ­ຫະ­ກຳ​ພັດ­ທະ­ນາ​ແຖວ​ໜ້າ​ຂອງ​ໂລກ (G7) ທີ່​ຈັດ​ຂຶ້ນ​ຢູ່​ເມືອງ​ບີ​ອາ​ຣິ​ສ (Biarritz) ປະ­ເທດ​ຝຣັ່ງ ໄດ້​ອັດ​ລົງ​ໃນ​ວັນ​ທີ 26 ສິງ­ຫາ 2019 ຖື​ເປັນ​ກອງ​ປະ­ຊຸມ​ຄັ້ງ​ທີ 45 ໂດຍ​ແມ່ນ​ປະ­ເທດ​ຝຣັ່ງ​ເປັນ​ເຈົ້າ­ພາບ ມີ​ຜູ້­ນຳ 7 ຊາດ​ສະ­ມາ­ຊິກ​ເຂົ້າ​ຮ່ວມ ຄື: ກາ​ນາ​ດາ ຝຣັ່ງ ເຢຍ​ລະ​ມັນ ອີ​ຕາ​ລີ ຍີ່­ປຸ່ນ ອັງ­ກິດ ແລະ ສະ­ຫະ­ລັດ​ອາ​ເມ​ຣິ​ກາ.. ມີ​ແຂກ​ຖືກ​ເຊີນ​ຄື​ປະ­ທານ​ສະ­ພາ​ເອີ​ຣົບ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ​ອີ​ຣານ ເຂົ້າ​ຮ່ວມ.

    ວິ­ທະ­ຍຸ​ກະ­ຈາຍ­ສຽງ​ຫວຽດ­ນາມ (VOV WORLD) ສະ­ບັບ​ອອນ​ລາຍ ລົງ​ວັນ​ທີ 28 ສິງ­ຫາ 2019 ໄດ້​ລົງ​ພິມ​ບົດ​ໃນ​ຫົວ­ຂໍ້: ... ການ​ຊອກ​ຫາ​ສຽງ​ເວົ້າ​ລວມ​ຂອງ G7 ແມ່ນ​ນັບ​ມື້​ນັບ​ຍາກ​ຂຶ້ນ... ໄດ້​ຂຽນ​ໄວ້​ບາງ​ຈຸດ​ວ່າ: “... ບັນ­ຫາ​ຄວາມ​ບໍ່​ລົງ​ລອຍ​ກັນ​ໄດ້​ປົກ​ຄຸມ​ກອງ​ປະ­ຊຸມ​ສຸດ​ຍອດ G7 ແຕ່​ທີ່​ແມ່ນ​ວ່າ​ຊິ​ບໍ່​ມີ​ຄວາມ​ຫວັງ ກອງ​ປະ­ຊຸມ​ອັດ​ລົງ​ໂດຍ​ມີ​ຖະ­ແຫຼງ­ການ​ໂດຍ​ຫຍໍ້ ສະ­ແດງ​ໃຫ້​ເຫັນ​ຄວາມ​ພ້ອມ­ພຽງ​ກ່ຽວ​ກັບ​ການ​ປ່ອຍ​ເງິນ 20 ລ້ານ​ໂດ​ລາ ເພື່ອ​ຊ່ວຍ​ດັບ​ໄຟ​ປ່າ Amazon ເຫັນ​ດີ​ຕໍ່​ແຜນ​ອຸ­ປະ­ຖຳ​ການ​ປູກ​ປ່າ​ຄືນ­ໃໝ່​ຂອງ ສປຊ ຕໍ່​ສະ­ພາບ​ການ​ຢູ່​ອູ​ແກຣນ G7 ສະ­ໜັບ­ສະ­ໜູນ​ຝຣັ່ງ ແລະ ເຢຍ​ລະ​ມັນ ຈັດ​ກອງ​ປະ­ຊຸມ​ສຸດ​ຍອດ 4 ປະ­ເທດ Normandy ໃນ​ຂົງ­ເຂດ​ເສດ­ຖະ­ກິດ ສະ­ໜັບ­ສະ­ໜູນ” ການ​ເປີດ​ປະ­ຕູ​ການ​ຄ້າ​ທົ່ວ​ໂລກ ແລະ ຍຸ­ຕິ​ທຳ​ຕາມ​ປົກ­ກະ­ຕິ ຂອງ​ພື້ນ­ຖານ​ເສດ­ຖະ­ກິດ​ໂລກ ຊຸກ­ຍູ້​ການ​ພົບ​ປະ​ເຈລະ­ຈາ​ສອງ​ຝ່າຍ ຄື: ຝຣັ່ງ ແລະ ອາ​ເມ​ຣິ​ກາ ເລື່ອງ​ການ​ເກັບ​ພາ­ສີ​ສິນ­ຄ້າ​ຈາກ​ກຸ່ມ​ບໍ­ລິ­ສັດ​ເຕັກ​ໂນ​ໂລ​ຊີ​ໃຫຍ່ ອາ​ເມ​ຣິ​ກາ?ຍີ່­ປຸ່ນ ເຫັນ​ດີ​ເປັນ​ເອ­ກະ​ພາບ​ໃນ​ຫຼັກ­ການ​ກ່ຽວ​ກັບ​ແຫຼ່ງ​ຂໍ້​ຕົກ­ລົງ​ການ​ຄ້າ...” ອີງ​ຕາມ​ແຫຼ່ງ​ຂ່າວ​ຈາກ​ຕ່າງ­ປະ­ເທດ​ໃຫ້​ຮູ້​ວ່າ: ໃນ​ກອງ​ປະ­ຊຸມ​ຄັ້ງ​ນີ້ ປະ­ທາ­ນາ­ທິ­ບໍ­ດີ ທຣຳ ຍັງ​ສືບ­ຕໍ່​ສະ­ເໜີ​ຮຽນ​ເຊີນ​ທ່ານ ປູ​ຕິນ ປະ­ທາ­ນາ­ທິ­ບໍ­ດີ ຣັດ​ເຊຍ ເຂົ້າ​ຮ່ວມ​ກອງ​ປະ­ຊຸມ​ສຸດ​ຍອດ G7 ໃນ​ປີ 2020 ເຊິ່ງ​ແມ່ນ​ອາ​ເມ​ຣິ​ກາ​ເປັນ​ເຈົ້າ­ພາບ.

    G7 ໄດ້​ຮັບ​ການ​ສ້າງ­ຕັ້ງ​ຂຶ້ນ​ມາ​ແຕ່​ປີ 1975 ໂດຍ​ແມ່ນ​ປະ­ເທດ​ທຶນ​ນິ­ຍົມ​ຝ່າຍ​ຕາ­ເວັນ­ຕົກ​ເປັນ​ເຈົ້າ​ການ ແນ­ໃສ່​ຮັບ​ມື​ວິ​ກິດ​ການ​ພະ­ນັກ­ງານ ຣັດ​ເຊຍ ເຂົ້າ​ກຸ່ມ​ນີ້​ໃນ​ປີ 1997 ເວ­ລາ​ນັ້ນ​ເອີ້ນ​ວ່າ G8 ແລະ ມາ​ຮອດ​ເດືອນ​ມີ­ນາ 2014 ອາ​ເມ​ຣິ​ກາ ໄດ້​ພັກ​ດັນ​ໃຫ້​ຣັດ​ເຊຍ​ອອກ​ຈາກ​ກຸ່ມ ໂດຍ​ສ້າງ​ຂໍ້​ອ້າງ​ບັນ­ຫາ​ວິ​ກິດ​ການ​ຢູ່​ອູ​ແກຣນ ກໍ​ຄື ບັນ­ຫາ​ແຄວ້ນ Cpimea.

    ໂຄ­ສົກ​ວັງ​ແກຣມ​ແລັງ ຖະ­ແຫຼງ​ວ່າ: “... ຣັດ​ເຊຍ ບໍ່​ໄດ້​ຟ້າວ​ຟັ່ງ​ກັບ​ຄືນ G8 ເພາະ​ບັນ­ຫາ​ແຕກ​ຕ່າງ​ກັນ​ອາດ​ຈະ​ຖືກ​ແກ້​ໄຂ​ໄດ້​ດີ​ກວ່າ​ໃນ G20 ເພາະ​ໃນ​ກອງ​ປະ­ຊຸມ G20 ຜ່ານ​ມາ​ໃນ​ເດືອນ​ມິ­ຖຸ­ນາ 2019 ທີ່​ໂອ­ຊາ​ກາ ຍີ່­ປຸ່ນ ໄດ້​ສ້າງ​ປາ­ກົດ­ການ​ທີ່​ດີ­ງາມ​ໃນ​ຖະ­ແຫຼງ­ການ​ທີ່​ບັນ­ລຸ​ໄດ້​ຢ່າງ​ເປັນ​ເອ­ກະ­ສັນ​ສູງ ຕໍ່​ບັນ­ຫາ​ເລັ່ງ​ດ່ວນ​ໃນ​ໂລກ ຄື: ເສດ­ຖະ­ກິດ ການ​ຍັບ​ມໍ່​ເຂົ້າ­ກັນ​ຂອງ​ໄລ­ຍະ​ຫ່າງ​ທາງ​ການ​ຄ້າ ແລະ ສະ­ພາບ​ປ່ຽນ­ແປງ​ດິນ​ຟ້າ​ອາ­ກາດ ສ່ວນ​ປະ­ທາ­ນາ­ທິ­ບໍ­ດີ​ປູ​ຕິນ ກໍ​ເຄີຍ​ປະ­ກາດ​ວ່າ: ຣັດ​ເຊຍ ກຽມ­ພ້ອມ​ຮ່ວມ​ມື​ກັບ​ທຸກ​ປະ­ເທດ ກໍ​ຄື ທຸກ​ກຸ່ມ ສະ­ນັ້ນ ການ​ເລືອກ­ເຟັ້ນ​ຂອງ​ຣັດ​ເຊຍ ໃນ​ຍາມ​ນີ້​ແມ່ນ​ຈະ­ແຈ້ງ​ທີ່​ສຸດ ນັ້ນ​ຄື ຣັດ​ເຊຍ ບໍ່​ຟ້າວ​ຟັ່ງ​ກັບ​ສູ່ G8.

    ສັງ​ລວມ​ໄດ້​ວ່າ: ຮອດ​ຍາມ​ນີ້ G7 ບໍ່​ມີ​ນ້ຳ​ຢາ​ຫຍັງ ທີ່​ຈະ​ເຮັດ​ຟືນ​ເຮັດ​ໄຟ​ຄື​ຜ່ານ​ມາ​ໄດ້ ມີ​ແຕ່​ຄອງ​ຄອຍ​ເບິ່ງ​ກອງ​ປະ­ຊຸມ​ສຸດ​ຍອດ ຄັ້ງ​ທີ 46  ໃນ​ປີ 2020 ທີ່​ອາ​ເມ​ຣິ​ກາ ເປັນ​ເຈົ້າ­ພາບ​ນັ້ນ ຈະ​ແກ້​ບັນ­ຫາ​ເສດ­ຖະ­ກິດ​ໂລກ​ຫຍັງ​ໄດ້​ແດ່? 

ສະ­ເໜີ​ແລກ­ປ່ຽນ.

ຂ່າວທີ່ກ່ຽວຂ້ອງ