ສາທາຈຳປາສັກ ກວດສຸຂະພາບໃຫ້ປະຊາຊົນຜູ້ປະສົບໄພ

137 09 ກ.ຍ. 2019 ຂ່າວໜ້າ​ໜຶ່ງ

    ທ່ານ ວັນ­ນະ​ໄຊ ສັນ​ຕະ­ກຸນ ຮອງ​ຫົວ­ໜ້າ​ພະ​ແນກ​ສາ­ທາ­ລະ­ນະ​ສຸກ ແຂວງ​ຈຳ­ປາ​ສັກ ໃຫ້​ສຳ­ພາດ​ວັນ​ທີ 5 ກັນ­ຍາ 2019 ວ່າ: ຕໍ່​ກັບ​ສະ­ພາບ​ເກີດ​ໄພ­ພິ­ບັດ​ນ້ຳ​ຖ້ວມ​ຢູ່​ແຂວງ​ຈຳ­ປາ​ສັກ ໂດຍ​ອີງ​ຕາມ​ທິດ​ຊີ້​ນຳ​ຂອງ​ລັດ­ຖະ­ບານ ກໍ​ຄື ແຂວງ ສະ­ນັ້ນ ພະ​ແນກ​ສາ­ທາ­ລະ­ນະ​ສຸກ​ແຂວງ ໄດ້​ແຕ່ງ­ຕັ້ງ​ຄະ­ນະ​ກຳ ມະ​ການ​ຂັ້ນ​ພະ​ແນກ ແລະ ໄດ້​ແຈ້ງ​ໃຫ້​ຫ້ອງ­ການ​ສາ­ທາ­ລະ­ນະ​ສຸກ​ເມືອງ ໃນ​ການ​ກະ­ກຽມ​ຄວາມ​ພ້ອມ​ດ້ານ​ຕ່າງໆ​ໃນ​ການ​ຮັບ​ມື​ກັບ​ສະ­ພາບ​ໄພ­ພິ­ບັດ​ນ້ຳ​ຖ້ວມ​ທີ່​ເກີດ​ຂຶ້ນ ໂດຍ​ໄດ້​ແຕ່ງ​ທີມ​ງານ​ແພດ​ໝໍ​ຈາກ​ພະ​ແນກ ສົມ­ທົບ​ກັບ​ເມືອງ​ລົງ​ໄປ​ກວດ​ສຸ­ຂະ­ພາບ​ໃຫ້​ປະ­ຊາ­ຊົນ​ທີ່​ເຄື່ອນ​ຍ້າຍ​ມາ​ຢູ່​ແຕ່​ລະ​ຈຸດ​ພັກ­ຊົ່ວ­ຄາວ​ຕ່າງໆ ເປັນ­ຕົ້ນ ໄດ້​ກວດ ແລະ ປິ່ນ­ປົວ​ສຸ­ຂະ­ພາບ​ຜູ້​ທີ່​ເປັນ­ໄຂ້​ຫວັດ ໄອ ແລະ ພະ­ຍາດ​ອື່ນໆ ຖ້າ​ພົບ​ກໍ­ລະ­ນີ​ຄົນ​ເຈັບ​ທີ່​ເປັນ​ພະ­ຍາດ​ທີ່​ມີ​ອາ­ການ​ຮຸນ​ແຮງ ຈະ​ສົ່ງ​ປິ່ນ­ປົວ​ຢູ່​ໂຮງ­ໝໍ​ແຂວງ ແລະ ເມືອງ​ອີງ​ຕາມ​ສະ­ພາບ​ຂອງ​ຄົນ​ເຈັບ ນອກ​ນັ້ນ ຍັງ​ໄດ້​ກະ­ກຽມ​ເກືອ​ກຼໍ​ບຳ­ບັດ​ນ້ຳ​ເພື່ອ​ຊົມ­ໃຊ້​ຫຼັງ​ນ້ຳ​ບົກ​ແຫ້ງ ພ້ອມ​ທັງ​ໄດ້​ມອບ​ສະ­ບູ ແລະ ເຄື່ອງ­ໃຊ້​ປະ­ຈຳ​ວັນ ເຊັ່ນ: ກະ­ຕຸກ​ນ້ຳ ໂອ​ອາບ­ນ້ຳ ແລະ ຢາ​ປິ່ນ­ປົວ​ພະ­ຍາດ​ຈຳ­ນວນ​ໜຶ່ງ.

    ສຳ­ລັບ​ທິດ​ທາງ​ແຜນ­ການ​ຕໍ່­ໜ້າ​ພາຍ­ຫຼັງ​ນ້ຳ​ບົກ​ແຫ້ງ ຂະ­ແໜງ​ສາ­ທາ­ລະ­ນະ​ສຸກ​ຈະ​ໄດ້​ສົມ­ທົບ​ກັບ​ໜ່ວຍ​ງານ​ກ່ຽວ­ຂ້ອງ ໂດຍ​ສະ­ເພາະ ໜ່ວຍ​ງານ​ອະ­ນາ­ໄມ​ສົ່ງ­ເສີມ​ສຸ­ຂະ­ພາບ ໜ່ວຍ​ງານ​ຄວບ​ຄຸມ­ພະ​ຍາດ​ຕິດ­ຕໍ່ ແລະ ປິ່ນ­ປົວ ເພື່ອ​ໃຫ້​ບໍ­ລິ­ການ​ແກ່​ປະ­ຊາ­ຊົນ ຕິດ­ຕາມ ແລະ ເຝົ້າ​ລະ­ວັງ​ພະ­ຍາດ​ທີ່​ອາດ​ມາ​ກັບ​ນ້ຳ​ໃນ 15 ພະ­ຍາດ ເປັນ­ຕົ້ນ ພະ­ຍາດ​ຕີນ​ຫໍ ຕາ­ແດງ ຖອກ­ທ້ອງ ແລະ​ອື່ນໆ ໄປ​ພ້ອມ​ກັບ​ການ​ຕິດ­ຕາມ​ຂໍ້​ມູນ​ຊົມ­ໃຊ້​ນ້ຳ​ສະ­ອາດ ບໍ່​ບາ​ດານ ແລະ ວິດ­ຖ່າຍ ຖ້າ​ຫາກ​ພົບ​ກໍ­ລະ­ນີ​ເປ່​ເພ​ກໍ​ຈະ​ໄດ້​ນຳ​ລາຍ​ງານ​ຂັ້ນ​ເທິງ​ເພື່ອ​ແກ້​ໄຂ ແລະ ຊ່ວຍ­ເຫຼືອ​ປະ­ຊາ­ຊົນ.

ຂ່າວທີ່ກ່ຽວຂ້ອງ