ປູເປ້ ມອບເງິນລາງວັນ ຊ່ວຍຜູ້ປະສົບໄພນໍ້າຖ້ວມ

233 10 ກ.ຍ. 2019 ວົງຈອນກີລາ
ປູເປ້ ມອບເງິນລາງວັນ ຊ່ວຍຜູ້ປະສົບໄພນໍ້າຖ້ວມ

    ນາງ ອາ​ລິ​ຍາ ວົງ​ດາ­ລາ ຫຼື ນ້ອງ ປູ​ເປ້ ນັກ​ເທັນ​ນິ​ສ​ເຍົາ­ວະ​ຊົນ​ລາວ ອາ­ຍຸ 14 ປີ ສາ­ມາດ​ເອົາ​ຊະ­ນະ Victoria PROVOST ຈາກ​ສະ­ໂມ­ສອນ TENNIS CLUB DES COURNO ຄວ້າ​ແຊັມ​ເທັນ​ນິ​ສ​ທີ່​ຝຣັ່ງ ລາຍ­ການ Tennis Club Tournament Loupian TC 34 ແຂ່ງ­ຂັນ​ໃນ​ລະ­ຫວ່າງ​ວັນ​ທີ 19 ສິງ­ຫາ – 7 ກັນ­ຍາ 2019 ມື້​ສຸດ​ທ້າຍ ປູ​ເປ້ ຍັງ​ຮັກ­ສາ​ຜົນ­ງານ​ເດັ່ນ ບໍ່​ເສຍ​ເຊັດ​ໃນ​ລາຍ­ການ​ນີ້ ເອົາ​ຊະ­ນະ​ຄູ່​ແຂ່ງ 2-0 ເຊັດ: 6-4 6-3 ຄວ້າ​ແຊັມ​ມາ​ຄອງ ພ້ອມ​ເງິນ​ລາ­ງວັນ 110 ເອີ​ໂຣ ຫຼື ປະ­ມານ 1 ລ້ານ​ກີບ.

    ທ່ານ ພູ­ເຂົາ​ທອງ ພົມ​ມະ​ວົງ ຜູ້​ປົກ­ຄອງ ທັງ​ເປັນ​ຜູ້​ຈັດ­ການ​ສ່ວນ​ຕົວ​ຂອງ​ນ້ອງ ປູ​ເປ້ ກ່າວ​ວ່າ: ເງິນ​ຈຳ­ນວນ​ນີ້​ເຖິງ​ວ່າ​ຈຳ­ນວນ​ບໍ່​ຫຼາຍ ແຕ່​ນ້ອງ ປູ​ເປ້ ກໍ​ໄດ້​ມາ​ດ້ວຍ​ຄວາມ​ອົດ­ທົນ​ພະ­ຍາ­ຍາມ ແລະ ຄວາມ​ພູມ­ໃຈ ພ້ອມ​ບິ​ແບ່ງ​ນ້ຳ­ໃຈ​ຊ່ວຍ­ເຫຼືອ​ພໍ່​ແມ່​ພີ່­ນ້ອງ​ປະ­ຊາ­ຊົນ​ລາວ​ຜູ້​ປະ­ສົບ​ໄພ​ຄັ້ງ​ນີ້ ພ້ອມ​ກັນ​ນີ້ ປູ​ເປ້ ແລະ ຜູ້​ປົກ­ຄອງ ກໍ​ຂໍ​ສະ­ແດງ​ຄວາມ​ຂອບ­ໃຈ​ມາ​ຍັງ​ປະ­ຊາ­ຊົນ​ລາວ ທີ່​ຕິດ­ຕາມ ແລະ ສົ່ງ​ກຳ­ລັງ​ໃຫ້ ປູ​ເປ້ ປະ­ສົບ​ຜົນ­ສຳ­ເລັດ​ໃນ​ການ​ມາ​ເຄື່ອນ​ໄຫວ​ແຂ່ງ­ຂັນ​ຄັ້ງ​ນີ້​ທີ່​ປະ­ເທດ​ຝຣັ່ງ ແລະ ພ້ອມ​ພັດ­ທະ­ນາ​ຕົນ​ເອງ​ຕໍ່​ໄປ ເພື່ອ​ສ້າງ​ຜົນ­ງານ​ໃຫ້​ດີ​ຂຶ້ນ​ເລື້ອຍໆ.

    ການ​ໄດ້​ແຊັມ​ຄັ້ງ​ນີ້ ເປັນ​ແຊັມ​ທີ 2 ຂອງ ປູ​ເປ້ ໃນ​ການ​ແຂ່ງ­ຂັນ​ຢູ່​ປະ­ເທດ​ຝຣັ່ງ ນັບ​ຕັ້ງ­ແຕ່​ວັນ​ທີ 19 ສິງ­ຫາ​ເປັນ­ຕົ້ນ​ມາ ຕໍ່​ຈາກ​ລາຍ­ການ Tennispro Cup ໃນ​ອາ­ທິດ​ຜ່ານ​ມາ ແລະ ໃນ​ວັນ​ທີ 9 ກັນ­ຍາ 2019 ປູ​ເປ້ ຍັງ​ສືບ­ຕໍ່​ແຂ່ງ­ຂັນ​ລາຍ­ການ​ໃໝ່ ຕາມ​ເວ­ລາ​ທ້ອງ​ຖີ່ນ 17:30 ໂມງ ກົງ​ກັບ​ເວ­ລາ​ໃນ​ປະ­ເທດ​ລາວ ປະ­ມານ 23:30 ໂມງ.

ຂ່າວທີ່ກ່ຽວຂ້ອງ