ສົ່ງທີມແພດ ລົງຊ່ວຍຜູ້ປະສົບໄພນ້ຳຖ້ວມຢູ່ແຂວງສາລະວັນ

107 10 ກ.ຍ. 2019 ຂ່າວໜ້າ​ໜຶ່ງ

    ວັນ​ທີ 8 ກັນ­ຍາ 2019 ທີ່​ກະ­ຊວງ​ສາ­ທາ­ລະ­ນະ​ສຸກ ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ທ່ານ ຄຳ​ພອນ ພຸດ​ທະ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ພ້ອມ​ດ້ວຍ​ຄະ­ນະ​ກົມ ໄດ້​ຈັດ​ພິ­ທີ​ສົ່ງ​ທີມ​ງານ​ວິ­ຊາ​ການ​ແພດ​ຂອງ​ກະ­ຊວງ​ສາ­ທາ­ລະ­ນະ​ສຸກ ​ພ້ອມ​ຢາ​ທີ່​ຈຳ­ເປັນ ແລະ ມຸ້ງ​ຍ້ອມ​ຢາ​ຈຳ­ນວນ​ໜຶ່ງ​ລົງ​ໄປ​ແຂວງ​ສາ­ລະ​ວັນ ເພື່ອ​ໄປ​ຊ່ວຍ­ເຫຼືອ​ກວດ​ສຸ­ຂະ­ພາບ​ໃຫ້​ປະ­ຊາ­ຊົນ​ຜູ້​ປະ­ສົບ​ຈາກ​ໄພ­ພິ­ບັດ​ນ້ຳ​ຖ້ວມ​ພາຍ­ຫຼັງ​ນ້ຳ​ໄດ້​ບົກ​ແຫ້ງ​ລົງ.

    ທີມ​ງານ​ວິ­ຊາ​ການ​ທີ່​ລົງ​ໄປ​ແຂວງ​ສາ­ລະ​ວັນ​ຄັ້ງ​ນີ້ ຈະ​ໄດ້​ໄປ​ຊ່ວຍ​ສະ­ໜັບ­ສະ­ໜູນ​ທີມ​ແພດ​ຂອງ​ແຂວງ ສາ­ລະ​ວັນ ໃນ​ການ​ເບິ່ງ­ແຍງ​ສຸ­ຂະ­ພາບ​ຂອງ​ຜູ້​ປະ­ສົບ​ໄພ​ນ້ຳ​ຖ້ວມ​ທີ່​ມາ​ອາ­ໄສ​ຢູ່​ຈຸດ​ພັກ​ເຊົາ​ຊົ່ວ­ຄາວ​ຕ່າງໆ ໂດຍ​ສະ­ເພາະ​ຢູ່​ເມືອງ​ຄົງ​ເຊ​ໂດນ ເພາະ​ເປັນ​ເມືອງ​ທີ່​ໄດ້​ຮັບ​ຜົນ​ກະ­ທົບ​ໜັກ​ກ່ອນ­ໝູ່​ໃນ​ບັນ­ດາ​ເມືອງ​ທີ່​ຖືກ​ນ້ຳ​ຖ້ວມ​ຂອງ​ແຂວງ​ສາ­ລະ​ວັນ ປະ​ເມີນ​ບັນ­ຫາ​ທີ່​ຈະ​ມີ​ຜົນ​ກະ­ທົບ​ຕໍ່​ສຸ­ຂະ­ພາບ​ຂອງ​ປະ­ຊາ­ຊົນ​ຢູ່​ເຂດ​ນ້ຳ​ຖ້ວມ ຍ້ອນ​ພະ­ຍາດ​ທີ່​ຈະ​ເກີດ​ຂຶ້ນ​ໄລ­ຍະ​ນ້ຳ​ຖ້ວມ ແລະ ພາຍ­ຫຼັງ​ນ້ຳ​ຖ້ວມ ເພື່ອ​ຊອກ​ຫາ​ວິ­ທີ​ແກ້​ໃຫ້​ທ່ວງ​ທັນ​ເວ­ລາ ປະ​ເມີນ​ຄວາມ​ເສຍ​ຫາຍ​ຂອງ​ໂຮງ­ໝໍ​ເມືອງ ແລະ ສຸກ­ສາ­ລາ​ຕ່າງໆ​ທີ່​ຖືກ​ນ້ຳ​ຖ້ວມ ເພື່ອ​ຫາ​ວິ­ທີ​ແກ້​ໄຂ​ໃຫ້​ບັນ­ດາ​ສະ­ຖານ­ທີ່​ບໍ­ລິ­ການ​ສຸ­ຂະ­ພາບ​ດັ່ງ­ກ່າວ​ ສາ­ມາດ​ກັບ​ມາ​ບໍ­ລິ­ການ​ສຸ­ຂະ­ພາບ​ຂອງ​ປະ­ຊາ­ຊົນ​ໃຫ້​ໄດ້​ໂດຍ​ໄວ.

ຂ່າວທີ່ກ່ຽວຂ້ອງ