ຜູ້ປະກອບການທ່ອງທ່ຽວລາວ-ເກົາຫຼີ ແລກປ່ຽນການບໍລິການທ່ອງທ່ຽວ

126 10 ກ.ຍ. 2019 ຂ່າວໜ້າ​ໜຶ່ງ

    ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ລາວ ຮ່ວມ​ກັບ​ສູນ​ອາ​ຊຽນ-ເກົາ­ຫຼີ ຈັດ​ສຳ​ມະ​ນາ​ສ້າງ​ຄວາມ​ເຂັ້ມ­ແຂງ​ໃຫ້​ແກ່​ບຸ​ຄະ­ລາ​ກອນ​ທ່ອງ​ທ່ຽວ​ອາ​ຊຽນ-ເກົາ­ຫຼີ ພາຍ​ໃຕ້​ຫົວ­ຂໍ້ “ການ​ອະ­ນຸ​ຮັກ ແລະ ປົກ​ປັກ​ຮັກ­ສາ​ສິ່ງ­ແວ­ດລ້ອມ​ສຳ­ລັບ​ທຸ­ລະ​ກິດ​ຂະ­ໜາດ​ນ້ອຍ-ຂະ­ໜາດ​ກາງ ທີ່​ຕິດ​ພັນ​ກັບ​ການ­ທ່ອງ­ທ່ຽວ” ຂຶ້ນ​ວັນ​ທີ 6 ກັນ­ຍາ 2019 ທີ່​ໂຮງ­ແຮມ​ຄຣາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຮ່ວມ​ຂອງ​ທ່ານ ວັນ​ສີ ກົວ​ມົວ ຫົວ­ໜ້າ​ຫ້ອງ ການ​ກະ­ຊວງ ຖວ​ທ ແລະ ທ່ານ Lee Hyuk ເລ­ຂາ­ທິ­ການ​ໃຫຍ່​ສູນ​ອາ​ຊຽນ-ເກົາ­ຫຼີ ມີ​ບັນ­ດາ​ຜູ້­ຕາງ­ໜ້າ​ຈາກ​ກົມ ກະ­ຊວງ ຖວ​ທ ກະ­ຊວງ​ການ​ຕ່າງ­ປະ­ເທດ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ສູນ​ພັດ­ທະ­ນາ​ການ­ທ່ອງ­ທ່ຽວ ຕະ­ຫຼອດ​ຮອດ​ຜູ້​ປະ­ກອບ​ການ​ດ້ານ​ການ­ທ່ອງ­ທ່ຽວ​ຂອງ​ລາວ ແລະ ສ ເກົາ­ຫຼີ ເຂົ້າ​ຮ່ວມ.

    ການ​ສຳ​ມະ​ນາ​ຄັ້ງ​ນີ້ ເປັນ​ການ​ປະ­ກອບ­ສ່ວນ​ສຳ­ຄັນ​ເຂົ້າ​ໃນ​ການ​ພັດ­ທະ­ນາ​ຄຸນ​ນະ​ພາບ​ການ​ບໍ​ລິ​ການ­ທ່ອງ­ທ່ຽວ​ພາຍ​ໃນ​ຂົງ­ເຂດ​ອາ​ຊຽນ​ເວົ້າ​ລວມ ເວົ້າ​ສະ­ເພາະ​ຢູ່​ລາວ ພ້ອມ​ນັ້ນ ເພື່ອ​ໃຫ້​ບັນ­ດາ​ຜູ້​ປະ­ກອບ​ການ​ດ້ານ​ທຸ­ລະ​ກິດ​ການ­ທ່ອງ­ທ່ຽວ​ຢູ່​ລາວ ແລະ ສ ເກົາ­ຫຼີ ໄດ້​ແລກ­ປ່ຽນ​ບົດ­ຮຽນ​ນຳ​ກັນ​ກ່ຽວ​ກັບ​ວຽກ​ງານ​ການ​ບໍ​ລິ​ການ­ທ່ອງ­ທ່ຽວ ແລະ ອື່ນໆ ເຊິ່ງ​ບັນ­ດາ​ຜູ້​ເຂົ້າ​ຮ່ວມ​ໄດ້​ຮຽນ​ຮູ້​ບົດ­ຮຽນ​ທີ່​ດີ​ຈາກ​ບັນ­ດາ​ປະ­ເທດ​ເພື່ອນ​ມິດ​ອາ​ຊຽນ ຈະ​ທຳ​ຄວາມ​ເຂົ້າ­ໃຈ​ກ່ຽວ​ກັບ​ທ່າ​ອ່ຽງ​ການ​ພັດ­ທະ­ນາ​ການ­ທ່ອງ­ທ່ຽວ​ແບບ​ອະ­ນຸ​ຮັກ​ຂອງ​ອົງ­ການ​ສະ­ຫະ​ປະ­ຊາ​ຊາດ ການ​ຮ່ວມ​ມື​ໃນ​ການ​ສົ່ງ­ເສີມ​ການ­ຈັດ­ຕັ້ງ​ປະ­ຕິ­ບັດ​ທີ່​ດີ ການ­ທ່ອງ­ທ່ຽວ​ແບບ​ອະ­ນຸ​ຮັກ ແລະ ການ​ສ້າງ​ຄວາມ​ເຂັ້ມ­ແຂງ​ໃຫ້​ແກ່​ບຸ​ຄະ­ລາ​ກອນ​ທ່ອງ​ທ່ຽວ​ອາ​ຊຽນ​ໃນ​ການ​ດຶງ​ດູດ​ນັກ​ທ່ອງ​ທ່ຽວ​ຈາກ​ເກົາ­ຫຼີ ພ້ອມ​ນັ້ນ ຍັງ​ໄດ້​ຮັບ​ຮູ້​ກ່ຽວ​ກັບ​ການ​ພົວ­ພັນ​ປະ­ສານ​ງານ​ລະ­ຫວ່າງ​ວິ­ຊາ​ການ​ໃນ​ບັນ­ດາ​ປະ­ເທດ​ອາ​ຊຽນ ແລະ ເກົາ­ຫຼີ.

    ທ່ານ ວັນ​ສີ ກົວ​ມົວ ກ່າວ​ວ່າ: ການ­ທ່ອງ­ທ່ຽວ​ແມ່ນ​ຂະ­ແໜງ​ເສດ­ຖະ­ກິດ​ສຳ­ຄັນ​ໜຶ່ງ ອາ​ຊຽນ​ໄດ້​ພັດ­ທະ­ນາ​ຂອບ​ການ​ຮ່ວມ​ມື​ດ້ານ​ການ­ທ່ອງ­ທ່ຽວ​ຢ່າງ​ເຂັ້ມ­ແຂງ​ເປັນ​ກ້າວໆ​ມາ ສະ­ແດງ​ອອກ​ໃນ​ຕົວ​ເລກ​ນັກ​ທ່ອງ​ທ່ຽວ​ສາ­ກົນ​ເຂົ້າ​ມາ​ທ່ອງ​ທ່ຽວ​ໃນ​ຂົງ­ເຂດ​ອາ​ຊຽນ​ເພີ່ມ​ຂຶ້ນ​ແຕ່​ລະ​ປີ ໃນ​ປີ 2018 ມີ​ນັກ​ທ່ອງ​ທ່ຽວ​ສາ­ກົນ​ມາ​ທ່ຽວ​ອາ​ຊຽນ​ຫຼາຍ​ກວ່າ 129 ລ້ານ​ເທື່ອ​ຄົນ ອັນ​ໄດ້​ປະ­ກອບ­ສ່ວນ​ສຳ­ຄັນ​ເຂົ້າ​ໃນ​ຂົງ­ເຂດ​ການ​ພັດ­ທະ­ນາ​ການ­ທ່ອງ­ທ່ຽວ ພ້ອມ​ນັ້ນ ອຸດ­ສາ­ຫະ­ກຳ​ການ​ທ່ອງ ທ່ຽວ​ມີ​ບົດ­ບາດ​ສຳ­ຄັນ​ຕໍ່​ເສດ­ຖະ­ກິດ​ຂອງ​ອາ​ຊຽນ ເນື່ອງ​ຈາ​ກວ່າ ສະ­ພາບ​ອາ­ກາດ​ທີ່​ເອື້ອ​ອຳ­ນວຍ ຄວາມ​ອຸ­ດົມ­ສົມ­ບູນ​ທາງ​ດ້ານ​ຊັບ­ພະ­ຍາ­ກອນ​ທຳ​ມະ​ຊາດ ມີ​ວັດ­ທະ­ນະ­ທຳ​ຫຼາຍ​ຮູບ​ແບບ ບວກ​ກັບ​ສາຍ​ພົວ­ພັນ​ທີ່​ແໜ້ນ​ແຟ້ນ​ໃນ​ຂົງ­ເຂດ ເຮັດ​ໃຫ້​ອາ​ຊຽນ​ກາຍ­ເປັນ​ຂົງ­ເຂດ​ທີ່​ມີ​ການ​ພັດ­ທະ­ນາ​ສູງ ເມື່ອ​ທຽບ­ໃສ່​ຂົງ­ເຂດ​ອື່ນໆ​ໃນ​ໂລກ  ເຖິງ​ຢ່າງ­ໃດ​ກໍ​ຕາມ ການ​ພັດ­ທະ­ນາ​ການ­ທ່ອງ­ທ່ຽວ​ໃນ​ຂົງ­ເຂດ​ດັ່ງ­ກ່າວ​ຍັງ​ມີ​ຄວາມ​ຕ້ອງ­ການ​ໃຫ້​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ຕໍ່​ເນື່ອງ ໂດຍ​ສະ­ເພາະ​ການ​ສົ່ງ­ເສີມ​ກິດ­ຈະ­ກຳ​ການ­ທ່ອງ­ທ່ຽວ ການ​ຮັກ­ສາ​ຄວາມ​ຍືນ​ຍົງ​ຂອງ​ຊັບ­ພະ­ຍາ­ກອນ​ການ­ທ່ອງ­ທ່ຽວ ການ​ປົກ​ປັກ​ຮັກ­ສາ​ສິ່ງ­ແວ­ດລ້ອມ ແລະ ຊີ­ວະ​ນາໆພັນ ຄວນ​ຈະ​ຕ້ອງ​ໄດ້​ຮັບ​ການ​ເອົາ­ໃຈ­ໃສ່ ໂດຍ​ຜ່ານ​ການ​ຮຽນ​ຮູ້​ຈາກ​ປະ­ສົບ​ການ​ທີ່​ຜ່ານ​ມາ.

ຂ່າວທີ່ກ່ຽວຂ້ອງ