ຄະນະຜູ້ແທນກຳປູເຈຍ ຢ້ຽມຢາມເຮັດວຽກ ທີ່ ສປປ ລາວ

161 10 ກ.ຍ. 2019 ຂ່າວໜ້າ​ໜຶ່ງ

    ວັນ​ທີ 6 ກັນ­ຍາ 2019 ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແຫ່ງ ສປປ ລາວ ໄດ້​ຕ້ອນ­ຮັບ​ການ​ຢ້ຽມ­ຢາມ​ເຮັດ​ວຽກ​ຂອງ​ຄະ­ນະ​ຜູ້​ແທນ​ກຳ­ປູ­ເຈຍ ນຳ​ໂດຍ​ທ່ານ ປຣາກ ໂຊ​ຄົນ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແລະ ຮ່ວມ​ມື​ສາ­ກົນ ແຫ່ງ ຣາ​ຊະ​ອາ­ນາ­ຈັກ​ກຳ­ປູ­ເຈຍ.

    ຈຸດ­ປະ­ສົງ​ຂອງ​ການ​ຢ້ຽມ­ຢາມ ແລະ ເຮັດ​ວຽກ​ຂອງ​ຄະ­ນະ​ຜູ້​ແທນ​ກຳ­ປູ­ເຈຍ​ໃນ​ຄັ້ງ​ນີ້ ແມ່ນ​ເພື່ອ​ປຶກ­ສາ​ຫາ­ລື ແລະ ແລກ­ປ່ຽນ​ຄຳ​ຄິດ​ຄຳ​ເຫັນ​ກ່ຽວ​ກັບ​ການ​ກະ­ກຽມ​ໃຫ້​ແກ່​ການ​ຢ້ຽມ­ຢາມ​ຢ່າງ​ເປັນ​ທາງ​ການ ຢູ່​ຣາ​ຊະ​ອາ­ນາ­ຈັກ​ກຳ­ປູ­ເຈຍ ຂອງ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ ໃນ​ໄວໆ​ນີ້ ພ້ອມ​ກັນ​ນີ້ ທັງ​ສອງ​ຝ່າຍ​ໄດ້​ສືບ­ຕໍ່​ປະ­ຕິ­ບັດ​ຕາມ​ການ​ຕົກ­ລົງ​ຂອງ​ສອງ​ນາ­ຍົກ­ລັດ­ຖະ­ມົນ­ຕີ ລາວ ແລະ ກຳ­ປູ­ເຈຍ ກ່ຽວ​ກັບ​ຮ່າງ​ຂໍ້​ກຳ­ນົດ​ວ່າ​ດ້ວຍ​ການ​ສະ­ເໜີ​ຂໍ​ໃຫ້​ລັດ­ຖະ­ບານ​ຝຣັ່ງ​ສົ່ງ​ຊ່ຽວ­ຊານ​ມາ​ຊ່ວຍ​ຖ່າຍ​ທອດ​ແຜນ­ທີ່ ແລະ ສະ­ໜອງ​ເອ­ກະ­ສານ​ທາງ​ການ ແລະ ແຜນ­ທີ່ ທີ່​ກ່ຽວ­ຂ້ອງ​ໃຫ້​ລາວ ແລະ ກຳ­ປູ­ເຈຍ ເພື່ອ​ເປັນ​ບ່ອນ​ອີງ​ໃຫ້​ແກ່​ການ​ແກ້​ໄຂ​ບັນ­ຫາ​ຊາຍ​ແດນ​ທີ່​ຄົງ​ຄ້າງ ເຊິ່ງ​ທັງ​ສອງ​ຝ່າຍ​ຍັງ​ບໍ່​ທັນ​ໄດ້​ສຳ​ຫຼວດ ແລະ ປັກ​ຫຼັກ​ໝາຍ​ຊາຍ​ແດນ​ຮ່ວມ​ກັນ​ນັ້ນ​ໃຫ້​ສຳ­ເລັດ​ໂດຍ​ໄວ ເພື່ອ​ສ້າງ​ຊາຍ​ແດນ ລະ­ຫວ່າງ ສອງ​ປະ­ເທດ​ໃຫ້​ເປັນ​ຊາຍ​ແດນ​ແຫ່ງ​ສັນ­ຕິ­ພາບ ມິດ­ຕະ­ພາບ ແລະ ຮ່ວມ​ມື​ພັດ­ທະ­ນາ​ຢ່າງ​ຍືນ​ຍົງ.

    ໃນ​ລະ­ຫວ່າງ​ກອງ​ປະ­ຊຸມ​ປຶກ­ສາ​ຫາ­ລື​ຮ່າງ​ຂໍ້​ກຳ­ນົດ​ຮ່ວມ (TOR) ທັງ​ສອງ​ຝ່າຍ​ໄດ້​ຕີ​ລາ­ຄາ​ສູງ​ຕໍ່​ຜົນ­ສຳ­ເລັດ​ໃນ​ຂອບ​ການ​ຮ່ວມ​ມື​ດ້ານ​ຕ່າງໆ​ໃນ​ໄລ­ຍະ​ຜ່ານ​ມາ ພ້ອມ​ທັງ​ໄດ້​ແລກ­ປ່ຽນ​ທັດ­ສະ­ນະ​ຂອງ​ຕົນ​ກ່ຽວ​ກັບ​ຮ່າງ​ຂໍ້​ກຳ­ນົດ​ດັ່ງ­ກ່າວ​ຢ່າງ​ສ້າງ­ສັນ ກົງ​ໄປ​ກົງ​ມາ ແລະ ໄດ້​ເອ­ກະ​ພາບ​ກັນ​ທາງ​ດ້ານ​ຫຼັກ­ການ​ພື້ນ­ຖານ ເພື່ອ​ຈະ​ໄດ້​ລາຍ​ງານ​ຜົນ​ການ​ປຶກ­ສາ​ຫາ­ລື​ຄັ້ງ​ນີ້​ໃຫ້​ແກ່​ຂັ້ນ​ເທິງ​ຂອງ​ຕົນ ແລະ ຈະ​ສືບ­ຕໍ່​ປຶກ­ສາ​ຫາ­ລື​ລາຍ​ລະ­ອຽດ​ຮ່ວມ​ກັນ​ຕໍ່​ໄປ ເພື່ອ​ໃຫ້​ສາ­ມາດ​ບັນ­ລຸ​ຂໍ້​ກຳ­ນົດ​ຮ່ວມ​ດັ່ງ­ກ່າວ​ໂດຍ​ໄວ ແລະ ຈະ​ໄດ້​ນຳ​ສະ­ເໜີ​ຕໍ່​ລັດ­ຖະ­ບານ​ຝຣັ່ງ​ຕໍ່​ໄປ.

    ກ່ອນ​ກອງ​ປະ­ຊຸມ ທ່ານ ປຣາກ ໂຊ​ຄົນ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແລະ ຮ່ວມ​ມື​ສາ­ກົນ ແຫ່ງ ຣາ​ຊະ​ອາ­ນາ­ຈັກ​ກຳ­ປູ­ເຈຍ ໄດ້​ນຳ­ພາ​ຄະ­ນະ​ເຂົ້າ​ຢ້ຽມ​ຄຳ­ນັບ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ເຊິ່ງ​ໃນ​ໂອ­ກາດ​ການ​ຢ້ຽມ​ຄຳ­ນັບ​ເຕັມ​ໄປ​ດ້ວຍ​ບັນ­ຍາ­ກາດ​ແຫ່ງ​ໄມ­ຕີ​ຈິດ ມິດ­ຕະ­ພາບ ແລະ ຄວາມ​ເຂົ້າ​ອົກ​ເຂົ້າ­ໃຈ​ເຊິ່ງ​ກັນ ແລະ ກັນ​ເປັນ​ຢ່າງ​ດີ.

ຂ່າວທີ່ກ່ຽວຂ້ອງ