ອາຣາບີ ຊາ​ອຸ​ດິດ ​ແຕ່ງ​ຕັ້ງ​ລັດຖະມົນຕີ​ພະລັງງານ​ຄົນ​ໃໝ່

178 10 ກ.ຍ. 2019 ຂ່າວຕ່າງປະເທດ
ອາຣາບີ ຊາ​ອຸ​ດິດ ​ແຕ່ງ​ຕັ້ງ​ລັດຖະມົນຕີ​ພະລັງງານ​ຄົນ​ໃໝ່

    ສື່ສານ​ໃນ​ອາ​ຣາ​ບີ ຊາ​ອຸ​ດິດ ລາຍ​ງານ​ເມື່ອ​ວັນ​ທີ 7 ກັນຍາ​ນີ້​ວ່າ ມຸງກຸດ​ລາດ​ຊະ​ກຸມມານ ອັບ​ດູນ​ລາ​ຊິ​​ສ ບິນ ຊານ​ມານ ໄດ້​ຖືກ​ບົ່ງ​ຕົວ​ໃຫ້​ເປັນ​ລັດຖະມົນຕີ​ພະລັງງານ​ຄົນ​ໃໝ່​ຂອງ​ປະເທດ​ນີ້ ໂດຍ​ເຂົ້າ​ແທນ​ທີ່​ທ່ານ ຄາ​ລິດ ອາ​​ລ-ຟາ​ລີ. ສຳນັກ​ຂ່າວສານ SPA ອ້າງ​ຕາມ​ລັດ​ຖະ​ດຳລັດ​ຈາກ​ພະ​ລາຊະ​ວັງ ແຫ່ງ​ອາ​ຣາ​ບີ ຊາ​ອຸ​ດິດ ໃຫ້​ຮູ້​ວ່າ “ທ່ານ ຄາ​ລິດ ອາ​​ລ-ຟາ​ລີ ໄດ້​ຖືກ​ປົດ​ອອກ​ຈາກ​ຕຳແໜ່ງ” ແລະ ມຸງກຸດ​ລາດ​ຊະ​ກຸມມານ ອັບ​ດູນ​ລາ​ຊິ​​ສ ບິນ ຊານ​ມານ ໄດ້​ຖືກ​ບົ່ງ​ຕົວ​ໃຫ້​ເຂົ້າ​ແທນ​ທີ່​ຕຳແໜ່ງ​ດັ່ງກ່າວ.

    ກ່ອນ​ໜ້າ​ນັ້ນ ທ່ານ ອັບ​ດູນ​ລາ​ຊິ​​ສ ບິນ ຊານ​ມານ ກໍ​ໄດ້​ຖືກ​ພົ້ນ​ຈາກ​ຕຳແໜ່ງ​ປະທານ​ກຸ່ມ​ບໍລິສັດ​ນ້ຳມັນ-ແກ​​ັສ ແຫ່ງ​ລັດ Aramco ຂອງ​ອາ​ຣາ​ບີ ຊາ​ອຸ​ດິດ ທ່າມກາງ​ທີ່​ກຸ່ມ​ບໍລິສັດ​ນີ້​ກະກຽມ​ຈັດ​ຈຳໜ່າຍ​ພັນທະບັດ​ອອກ​ສູ່​ປວງ​ຊົນ​ເທື່ອ​ທຳ​ອິດ (IPO). Aramco ມີ​ແຜນການ​ຈັດ​ຈຳໜ່າຍ​ຫຸ້ນ 5% ເທົ່າ​ກັບ​ມູນ​ຄ່າ 100 ຕື້​ໂດ​ລາ​ສະຫະລັດ ກາຍເປັນ​ກໍລະນີ IPO ໃຫຍ່​ທີ່​ສຸດ​ໃນ​ໂລກ.

    ເຖິງ​ຢ່າງໃດ​ກໍ​ຕາມ ລາຄາ​ນ້ຳມັນ​ຕົກຕ່ຳ​ລົງ ໄດ້​ເຮັດ​ໃຫ້ Aramco ພົບ​ກັບ​ຄວາມ​ຫຍຸ້ງຍາກ ເມື່ອ​ບັນດາ​ຜູ້​ລົງທຶນ​ຖົກ​ຖຽງ​ກ່ຽວ​ກັບ​ມູນ​ຄ່າ​ທີ່ແທ້​ຈິງ​ຂອງ​ບໍລິສັດ ທີ່​ຕົວ​ເລກ 2.000 ຕື້​ໂດ​ລາ​ສະຫະລັດ​ຈາກ​ການ​ຄິດໄລ່ ໃນ​ຂະນະ​ທີ່​ແຜນການ IPO ຂອງ Aramco ໃນ​ປີ 2018 ຕ້ອງ​ໄດ້​ໂຈະ​ໄວ້.

    ໃນ​ອີກ​ດ້ານ​ໜຶ່ງ ເມື່ອ​ເດືອນ​ສິງຫາ​ທີ່​ຜ່ານ​ມາ ອາ​ຣາ​ບີ ຊາ​ອຸ​ດິດ ກໍ​ໄດ້​ຕົກລົງ​ສ້າງຕັ້ງ​ກະຊວງ​ອຸດສາຫະກຳ ແລະ​ບໍ່​ແຮ່ ຊຶ່ງ​ແຍກ​ອອກ​ມາ​ຈາກ​ກະຊວງ​ພະລັງງານ.

ຂ່າວທີ່ກ່ຽວຂ້ອງ