ຂ່າວຫຼ້າສຸດ

ກູ​ບາ​ ຕອບ​ໂຕ້​ຕໍ່​ມາດ​ຕະການ​ປິດ​ລ້ອມ​ຂອງ ສ ອາ​ເມຣິກາ

235 10 ກ.ຍ. 2019 ຂ່າວຕ່າງປະເທດ
ກູ​ບາ​ ຕອບ​ໂຕ້​ຕໍ່​ມາດ​ຕະການ​ປິດ​ລ້ອມ​ຂອງ ສ ອາ​ເມຣິກາ

    ທ່ານ ບຣູ​ໂນ ໂຣດ​ຣີ​ເກ​​ສ ລັດຖະມົນຕີ​ການ​ຕ່າງປະເທດ​ກູ​ບາ ກ່າວ​ຜ່ານ​ສື່​ສັງຄົມ Twitter ເມື່ອ​ວັນ​ທີ 7 ກັນຍາ​ທີ່​ຜ່ານ​ມາ ໂດຍ​ໄດ້​ກ່າວ​ຫາ​ທາງ​ການ ສ ອາ​ເມ​ຣິ​ກາ ວ່າ​ພວມ​ເວົ້າ​ຂີ້​ຕົວະ​ຢ່າງ​ເປີກ​ແປນ ແນໃສ່​ແກ້​ຕົວ​ໃຫ້​ແກ່​ການ​ຜັນ​ຂະຫຍາຍ​ບັນດາ​ມາດ​ຕະການ​ປິດ​ລ້ອມ​ໃໝ່ ເພື່ອ​ຮັດ​ເຄັ່ງ​ການ​ປິດ​ລ້ອມ ຕ້ານ​ກັບ​ກູ​ບາ.

    ລັດຖະມົນຕີ​ການ​ຕ່າງປະເທດ​ກູ​ບາ ຖະແຫຼງ​ຄື​ດັ່ງກ່າວ ຫຼັງ​ຈາກ​ທີ່​ກະຊວງ​ການ​ເງິນ ສ ອາ​ເມ​ຣິ​ກາ ປະຕິບັດ​ການ​ຈຳກັດ​ໃໝ່​ຕໍ່​ການເຄື່ອນໄຫວ​ຂອງ​ຊາວ​ກູ​ບາ​ສົ່ງ​ເງິນ​ກັບ​ຄືນ​ປະເທດ ຈາກ ສ ອາ​ເມ​ຣິ​ກາ ໄປ​ຍັງ​ກູ​ບາ ໂດຍ​ທ່ານ​ໄດ້​ຢືນຢັນ​ວ່າ ມາດ​ຕະການ​ເຫຼົ່ານັ້ນ ຈະ​ບໍ່​ສາມາດ​ບັງຄັບ​ຈິດໃຈ​ຂອງ​ປະຊາຊົນ​ກູ​ບາ​ໃຫ້​ອ່ອນ​ຍອມ​ໄດ້ ແລະ​ບັບ​ມື້​ນັບ​ຈະ​ເພີ່ມ​ການ​ຄັດຄ້ານ​ໃນ​ທົ່ວ​ໂລກ ເພື່ອ​ຕ້ານ​ກັບ​ການ​ປິດ​ລ້ອມ ທີ່​ໄດ້ແກ່​ຍາວ​ມາ​ເປັນ​ເວລາ​ເກືອບ 6 ທົດ​ສະ​ວັດ​ແລ້ວ​ນັ້ນ.

    ມາດ​ຕະການ​ດັ່ງກ່າວ ທີ່​ໄດ້​ແຈ້ງ​ເຕືອນ​ອອກ​ມາ​ຕັ້ງແຕ່​ເດືອນ​ເມສາ​ທີ່​ຜ່ານ​ມາ ໄດ້​ເປີດ​ກວ້າງ​ການ​ຫ້າມ​ສົ່ງ​ເງິນ​ກັບ​ປະເທດ ນັບ​ແຕ່ “ເຈົ້າ​ໜ້າທີ່​ທີ່​ຖືກ​ຫ້າມ​ຂອງ​ລັດຖະບານ​ກູ​ບາ” ຫຼື “ສະມາຊິກ​ພັກ​ກອມ​ມູ​ນິດ​ກູ​ບາ” ມາ​ບັດ​ນີ້​ໄດ້​ລວມ​ໄປ​ເຖິງ​ຍາດຕິ​ພີ່ນ້ອງ​ຂອງ​ເຂົາເຈົ້າ ຊຶ່ງ​ເປັນ​ສິ່ງ​ທີ່​ກູ​ບາ​ເຫັນ​ວ່າ ໃນ​ຄວາມ​ເປັນ​ຈິງ​ແລ້ວ​ແມ່ນ​ແນໃສ່​ໃຜ​ກໍ​ຕາມ ທີ່​ດຳລົງ​ຊີວິດ​ຢູ່​ໃນ​ກູ​ບາ.

ຂ່າວທີ່ກ່ຽວຂ້ອງ