ຂ່າວຫຼ້າສຸດ

ຜູ້ນຳຣັດ​ເຊຍ ​ແລະ​ ອູ​ແກຣນປຶກສາ​ຫາລື​ກ່ຽວ​ກັບ​ການ​ເຈລະຈາ​ສັນຕິພາບ

232 10 ກ.ຍ. 2019 ຂ່າວຕ່າງປະເທດ
ຜູ້ນຳຣັດ​ເຊຍ ​ແລະ​ ອູ​ແກຣນປຶກສາ​ຫາລື​ກ່ຽວ​ກັບ​ການ​ເຈລະຈາ​ສັນຕິພາບ

    ປະທານາທິບໍດີ​ຣັດ​ເຊຍ ວາ​ລາ​ດີ​ເມຍ ປູ​ຕິນ ແລະ​ປະທານາທິບໍດີ​ອູ​ແກຣນ ໂວ​ໂລ​ດີ​ເມຍ ເຊ​ເລນ​ສະ​ກີ ໄດ້​ປຶກສາ​ຫາລື​ນຳ​ກັນ​ເມື່ອ​ວັນ​ທີ 7 ກັນຍາ​ນີ້ ກ່ຽວ​ກັບ​ການຈັດຕັ້ງ​ການ​ເຈລະຈາ​ສັນຕິພາບ​ເທື່ອ​ໃໝ່ ຫຼັງ​ຈາກ​ທີ່​ສອງ​ປະເທດ​ໄດ້​ດຳເນີນ​ການ​ແລກປ່ຽນ​ນັກໂທດ ຊຶ່ງ​ເປັນ​ການເຄື່ອນໄຫວ​ອັນ​ເປັນ​ບາດ​ລ້ຽວ ໃນ​ການ​ພົວພັນ​ທາງ​ດ້ານ​ການ​ທູດ​ລະຫວ່າງ​ສອງ​ຝ່າຍ.

    ຫ້ອງ​ວ່າການ​ປະທານາທິບໍດີ​ຂອງ​ຣັດ​ເຊຍ ແລະ ອູ​ແກຣນ ຕ່າງ​ກໍ​ໄດ້​ມີ​ແຈ້ງ​ການ​ອອກ​ມາ​ເມື່ອ​ວັນ​ທີ 8 ກັນຍາ​ນີ້​ວ່າ ປະທານາທິບໍດີ ປູ​ຕິນ ແລະ​ປະທານາທິບໍດີ ເຊ​ເລນ​ສະ​ກີ ໄດ້​ສົນທະນາ​ກັນ​ຜ່ານ​ທາງ​ໂທລະສັບ ໃນ​ວັນ​ທີ 7 ກັນຍາ ຫຼັງ​ຈາກ​ທີ່​ໄດ້​ມີ​ການ​ແລກປ່ຽນ​ນັກໂທດ​ຈຳນວນ 70 ຄົນ.

    ແຈ້ງ​ການ​ດັ່ງກ່າວ ຊີ້​ແຈງ​ວ່າ ປະທານາທິບໍດີ​ທັງ​ສອງ ໄດ້​ເຫັນ​ດີ​ເປັນ​ເອກະສັນ​ກັນ ທີ່​ຈະ​ດຳເນີນ​ການ​ປຶກສາ​ຫາລື ໃນ​ອະນາຄົດ​ອັນ​ໃກ້ ກ່ຽວ​ກັບ​ການຈັດຕັ້ງ​ກອງ​ປະຊຸມ​ສຸດ​ຍອດ ໃນ​ຮູບ​ແບບ ນໍ​ມັນ​ດີ (Normandy) ໂດຍ​ມີ​ການ​ເຂົ້າ​ຮ່ວມ​ຂອງ​ທັງ​ຝຣັ່ງ ແລະ​ເຢຍ​ລະ​ມັນ.

    ກ່ຽວ​ກັບ​ການ​ແລກປ່ຽນ​ນັກໂທດ​ນັ້ນ ປະ​ທາງ​ນາ​ທິ​ບໍດີ ເຊ​ເລນ​ສະ​ກີ ແຈ້ງ​ໃຫ້​ຮູ້​ວ່າ ນັບ​ແຕ່​ເວລາ​ຄ່ຳ​ຄືນ​ຂອງ​ວັນ​ທີ 7 ກັນຍາ​ນີ້​ເປັນຕົ້ນ​ໄປ ຈະ​ເລີ່ມ​ການ​ແລກປ່ຽນ​ນັກໂທດ​ລະຫວ່າງ​ອູ​ແກຣນ ກັບ​ຣັດ​ເຊຍ. ສ່ວນ​ຕົວ​ເລກ​ທີ່​ຊັດ​ເຈນ ຂອງ​ຜູ້​ທີ່​ຈະ​ເຂົ້າ​ຮ່ວມ​ໃນ​ການ​ແລກປ່ຽນ ແມ່ນ​ຍັງ​ບໍ່​ທັນ​ໄດ້​ຮັບ​ການ​ປະກາດ ແຕ່​ວ່າ​ທ່ານ ເຊ​ເລນ​ສະ​ກີ ເວົ້າ​ວ່າ ເອກະສານ​ຈະ​ໄດ້​ຮັບ​ການຈັດຕັ້ງ​ຕາມ​ຮູບ​ການ 35 ປ່ຽນ 35 ຫຼື 42 ປ່ຽນ 40. ປະທານ​ນາ​ທິ​ບໍດີ ເຊ​ເລນ​ສະ​ກີ ໃຫ້​ຮູ້​ວ່າ ນັກໂທດ​ທັງ​ໝົດ ທີ່​ຈະ​ໄດ້​ແລກປ່ຽນ​ກັນ​ໃນ​ເທື່ອ​ນີ້ ໄດ້​ຖືກ​ສົ່ງ​ໄປ​ຍັງ​ຈຸດ​ແລກປ່ຽນ​ກ່ອນ​ເວລາ 18 ໂມງ ຂອງ​ວັນ​ທີ 6 ກັນຍາ.

    ກ່ອນ​ໜ້າ​ນັ້ນ ປະທານາທິບໍດີ ເຊ​ເລນ​ສະ​ກີ ໄດ້​ລົງ​ນາມ​ຄຳ​ສັ່ງ​ອະໄພໂທດ​ໃຫ້​ແກ່​ພົນລະເມືອງ​ຣັດ​ເຊຍ 12 ຄົນ ທີ່​ພວມ​ຖືກ​ປະຕິບັດ​ໂທດ​ຢູ່​ໃນ​ອູ​ແກຣນ. ມີ​ນັກໂທດ​ຊາວ​ຣັດ​ເຊຍ​ພຽງ​ຄົນ​ດຽວ ກໍ​ຄື ຮຸ​ສລານ ກັດ​ຊີ​ແອບ (ຖືກ​ຈັບ​ໃນ​ປີ 2015) ຊຶ່ງ​ຖືກ​ກັກ​ຂັງ​ຢ່າງ​ເຂັ້ມ​ງວດ ແລະ ​ບໍ່​ໄດ້​ຮັບ​ການ​ປ່ອຍ​ຕົວ ໂດຍສານ​ໃນ​ອູ​ແກຣນ​ໄດ້​ຕັດສິນ​ໃຫ້​ຖືກ​ຈຳ​ຄຸກ​ເປັນ​ເວລາ 15 ປີ ແລະ ​ເບິ່ງ​ຄື​ວ່າ ທາງ​ການ​ອູ​ແກຣນ​ບໍ່​ຢາກ​ປ່ອຍ​ຕົວ​ນັກໂທດ​ຄົນ​ນີ້.

 

ຂ່າວທີ່ກ່ຽວຂ້ອງ