ຂໍ້​ຕົກລົງ​ຫຼາຍ​ຮ້ອຍ​ສະບັບ​ໄດ້​ຮັບ​ການ​ລົງນາມ​ຢູ່​ໃນ EEF

190 10 ກ.ຍ. 2019 ຂ່າວຕ່າງປະເທດ
ຂໍ້​ຕົກລົງ​ຫຼາຍ​ຮ້ອຍ​ສະບັບ​ໄດ້​ຮັບ​ການ​ລົງນາມ​ຢູ່​ໃນ EEF

     ທ່ານ ຢູ​ຣີ ທຣຸດ​ເນບ ຮອງ​ນາຍົກລັດຖະມົນຕີ​ຣັດ​ເຊຍ ທັງ​ເປັນ​ຜູ້​ແທນ​ພິເສດ​ຂອງ​ປະທານາທິບໍດີ​ຣັດ​ເຊຍ ປະຈຳ​ເຂດ​ຕາເວັນ​ອອກ​ໄກ​ຂອງ​ຣັດ​ເຊຍ ກ່າວ​ຢູ່​ໃນ​ກອງ​ປະຊຸມ​ຖະແຫຼງ ຂ່າວ ເມື່ອ​ວັນ​ທີ 6 ກັນຍາ​ທີ່​ຜ່ານ​ມາ ເປັນ​ການ​ສະຫຼຸບ​ເວທີ​ປາ​ໄສ​ເສດຖະກິດ​ທິດຕາເວັນອອກ 2019 (EEF-2019) ຄັ້ງ​ທີ 5 ຊຶ່ງ​ຈັດ​ຂຶ້ນ​ທີ່​ນະຄອນ ວາ​ລາ​ດີວ​​ົສ​ຕົກ (ຣັດ​ເຊຍ) ນັ້ນ​ວ່າ  EEF-2019 ໄດ້​ດຶງ​ດູດ​ຜູ້​ເຂົ້າ​ຮ່ວມ 8.500 ກວ່າ​ຄົນ ທີ່​ມາ​ຈາກ​ກວ່າ 65 ປະເທດ​ໃນ​ໂລກ (ໃນ​ນັ້ນ​ມີ​ຕົວ​ແທນ​ຈາກ​ສື່​ມວນ​ຊົນ​ຕ່າງໆ 1.300 ຄົນ) ໂດຍ​ໄດ້​ມີ​ການ​ລົງ​ນາມ​ສັນຍາ​ກວ່າ 270 ສະບັບ ລວມ​ມູນ​ຄ່າ  3.400 ຕື້​ຣຸບ (ເທົ່າ​ກັບ​ປະມານ 47 ຕື້​ໂດ​ລາ​ສະຫະລັດ).

    ພາຍ​ໃຕ້​ຫົວຂໍ້​ທີ່​ວ່າ “ຕາເວັນ​ອອກ​ໄກ - ຂອບ​ຟ້າ​ແຫ່ງ​ການ​ພັດທະນາ” ນັ້ນ ວາລະ​ການ​ດຳເນີນ​ງານ​ຂອງ EEF-2019 ຖືກ​ແບ່ງ​ອອກ​ເປັນ​ສີ່​ສ່ວນ ອັນ​ປະກອບ​ດ້ວຍ “ບັນດາ​ວິທີ​ການ​ແກ້​ໄຂ​ໃໝ່ ເພື່ອ​ຊຸກຍູ້​ຈັງຫວະ​ຄວາມ​ເຕີບ​ໂຕ​ທາງ​ດ້ານ​ເສດຖະກິດ” ເປັນ​ການ​ປຶກສາ​ຫາລື​ບັນດາ​ມາດ​ຕະການ​ທີ່​ຈຳເປັນ ເພື່ອ​ພັດທະນາ​ເຂດ​ຕາເວັນ​ອອກ​ໄກ ແລະ ຍົກ​ສູງ​ກຳລັງ​ຄວາມ​ດຶງ​ດູດ​ດ້ານ​ການ​ລົງທຶນ​ຂອງ​ພາກ​ພື້ນ; “ອຳນວຍ​ຄວາມ​ສະດວກ​ໃຫ້​ແກ່​ວິ​ສາ​ຫະ​ກິດ” ດ້ວຍ​ການ​ປຶກສາ​ຫາລື​ເຖິງ​ບັນຫາ​ການ​ສ້າງ​ໂອກາດ​ການ​ລົງທຶນ​ໃໝ່​ຢູ່​ໃນ​ເຂດ​ຕາເວັນ​ອອກ​ໄກ ໃນ​ນັ້ນ​ມີ​ບັນຫາ​ການ​ປົກ​ປ້ອງ​ສິດທິ​ຂອງ​ຜູ້​ລົງທຶນ ການ​ເຮັດ​ສຳເລັດ​ດ້ານ​ກົດໝາຍ ການ​ພັດທະນາ​ວິ​ສາ​ຫະ​ກິດ​ຂະໜາດ​ກາງ ແລະ ນ້ອຍ ການ​ຫັນ​ການ​ຄຸ້ມ​ຄອງ​ລັດ​ເປັນ​ດີ​ຈີ​ຕາ​​ລ ແລະ ບັນດາ​ມາດ​ຕະການ​ຊ່ວຍເຫຼືອ ໃນ​ຂົງເຂດ​ເປ​ໂຕຣ​ເຄ​ມີ ແລະ ການ​ທອງ​ທ່ຽວ; “ເຂດ​ຕາເວັນ​ອອກ​ໄກ-ອາຊີ​ປາ​ຊີ​ຟິກ: ພັດທະນາ​ໂອກາດ​ການ​ຮ່ວມ​ມື” ໂດຍ​ເວົ້າ​ເຖິງ​ການ​ພົວພັນ​ຮ່ວມ​ມື​ດ້ານ​ຕ່າງໆ​ລະຫວ່າງ​ຣັດ​ເຊຍ ກັບ​ບັນດາ​ປະເທດ​ໃນ​ເຂດ​ອາຊີ-ປາ​ຊີ​ຟິກ; ແລະ  “ວິທີ​ການ​ແກ້​ໄຂ​ຕ່າງໆ ເພື່ອ​ຍົກ​ສູງ​ຄຸນ​ນະ​ພາບ​ຊີວິດ” ໂດຍ​ສຸມ​ໃສ່​ການ​ປຶກສາ​ຫາລື​ບັນຫາ​ການ​ຍົກ​ສູງ​ຄຸນ​ນະ​ພາບ​ດ້ານ​ການ​ສຶກ​ສາ ການ​ດຶງ​ດູດ​ການ​ລົງທຶນ​ຂອງ​ພາກ​ເອກະ​ຊົນ ເຂົ້າ​ໃນ​ຂົງເຂດ​ສັງຄົມ​ຂອງ​ພາກ​ພື້ນ ການ​ພັດທະນາ​ສິ່ງແວດລ້ອມ​ໃນ​ຕົວ​ເມືອງ ແລະ ການ​ກໍ່ສ້າງ​ຕົວ​ເມືອງ​ໃນ​ອະນາຄົດ.

    ເມື່ອ​ຕີ​ລາຄາ​ກ່ຽວ​ກັບ​ບົດບາດ​ຂອງ EEF ນັ້ນ ວົງ​ການ​ຊ່ຽວຊານ​ຂອງ​ຣັດ​ເຊຍ ໃຫ້ການ​ຢືນຢັນ​ວ່າ ໃນ​ດ້ານ​ພູມ​ສາດ​ແລ້ວ ຣັດ​ເຊຍ​ຕ້ອງ​ໄດ້​ມີ​ການ​ພົວພັນ​ທັງ​ກັບ​ຝ່າຍ​ຕາເວັນຕົກ ແລະ ຕາເວັນ​ອອກ. ການ​ທີ່​ຣັດ​ເຊຍ ຈັດ EEF ນີ້​ເປັນ​ການ​ຊ່ວຍ​ໃຫ້​ປະເທດ​ນີ້ ແກ້​ໄຂ​ການ​ຮ່ວມ​ມື​ກັບ​ບັນດາ​ປະເທດ​ພວມ​ພັດທະນາ​ໄວ ຢູ່​ໃນ​ພາກ​ພື້ນ​ອາຊີ-ປາ​ຊີ​ຟິກ ໂດຍ​ຜ່ານ​ນັ້ນ ກໍ​ເປັນ​ການ​ຊຸກຍູ້​ການ​ພັດທະນາ​ເຂດ​ຕາເວັນ​ອອກ​ໄກ ທີ່​ອຸດົມສົມບູນ​ໄປ​ດ້ວຍ​ຊັບພະຍາກອນ​ທຳ​ມະ​ຊາດ ແຕ່​ຍັງ​ບໍ່​ທັນ​ໄດ້​ຮັບ​ການ​ຂຸດ​ຄົ້ນ.

    ໃນ​ຂະນະ​ດຽວ​ກັນ ທ່ານ ແຊກ​ເກ ກາ​ຕີ​ຣິນ ປະທານ​ຫ້ອງການ​ການ​ຄ້າ ແລະ ອຸດສາຫະກຳ​ຣັດ​ເຊຍ ເວົ້າ​ວ່າ ໃນ​ຮອບ​ຫ້າ​ປີ​ທີ່​ຜ່ານ​ມາ ຢູ່​ໃນ​ເຂດ​ຕາເວັນ​ອອກ​ໄກ ສ້າງຕັ້ງ​ເຂດ​ໃຫ້​ບຸລິມະສິດ​ໃນ​ການ​ພັດທະນາ​ຂຶ້ນ​ມາ​ໄດ້ 20 ເຂດ ມີ​ທ່າ​ກຳປັ່ນ​ເສລີ 5 ແຫ່ງ ມີ​ໂຄງການ​ລົງທຶນ​ປະມານ 1.800 ໂຄງການ ດ້ວຍ​ຍອດ​ການ​ລົງທຶນ​ເກືອບ 3.800 ຕື້​ຣຸບ (ເງິນ​ຣັດ​ເຊຍ) ທີ່​ພວມ​ປະຕິບັດ​ຢູ່ ແລະ ມີ​ວິ​ສາ​ຫະ​ກິດ​ໃໝ່ ກວ່າ 200 ແຫ່ງ ໄດ້​ຮັບ​ການ​ສ້າງຕັ້ງ ແລະ ເຂົ້າ​ສູ່​ການເຄື່ອນໄຫວ.

 

ຂ່າວທີ່ກ່ຽວຂ້ອງ