ສະພາ​ແຫ່ງ​ຊາດ​ຈໍ​ເຈຍ ຮັບຮອງ​ນາຍົກລັດຖະມົນຕີຄົນ​ໃໝ່

257 10 ກ.ຍ. 2019 ຂ່າວຕ່າງປະເທດ
ສະພາ​ແຫ່ງ​ຊາດ​ຈໍ​ເຈຍ ຮັບຮອງ​ນາຍົກລັດຖະມົນຕີຄົນ​ໃໝ່

    ສະພາ​ແຫ່ງ​ຊາດ​ຈໍ​ເຈຍ ໄດ້​ຮັບຮອງ​ເມື່ອ​ວັນ​ທີ 8 ກັນຍາ​ນີ້ ໃຫ້​ທ່ານ ໂຈກ​ກີ ກາ​ຄາ​ເຣຍ ອະດີດ​ລັດຖະມົນຕີ​ກະຊວງ​ພາຍ​ໃນ ເປັນ​ນາຍົກລັດຖະມົນຕີ​ຜູ້​ໃໝ່​ຂອງ​ຈໍ​ເຈຍ ແທນ​ທ່ານ ມາ​ມູ​ກາ ບາ​ຄະ​ຕັດ​ແຊ ທີ່​ໄດ້​ປະກາດ​ລາ​ອອກ​ຈາກ​ຕຳແໜ່ງ​ໄປ​ຢ່າງ​ບໍ່​ຄາດ​ຝັນ ເມື່ອ​ວັນ​ທີ 2 ກັນຍາ​ທີ່​ຜ່ານ​ມາ ຫຼັງ​ຈາກ​ທີ່​ເຂົາ​ໄດ້​ຮັບ​ການ​ແຕ່ງຕັ້ງ​ໃຫ້​ດຳລົງ​ຕຳແໜ່ງ​ນາຍົກລັດຖະມົນຕີ​ຈໍ​ເຈຍ ມາ​ໄດ້​ກວ່າ 1 ປີ.

    ທ່ານ ໂຈກ​ກີ ກາ​ຄາ​ເຣຍ ອາຍຸ 44 ປີ ສຳເລັດ​ການ​ສຶກ​ສາ​ທີ່​ມະຫາວິທະຍາໄລ​ແຫ່ງ​ຊາດ ​ມົສ​ກູ (ຣັດ​ເຊຍ) ຊຶ່ງ​ເຂົາ​ເຄີຍ​ດຳລົງ​ຕຳແໜ່ງ​ລັດຖະມົນຕີ​ເສດຖະກິດ​ມາ​ແລ້ວ​ເປັນ​ເວລາ 1 ປີ ກ່ອນ​ທີ່​ຈະ​ກາຍເປັນ​ລັດຖະມົນຕີ​ກະຊວງ​ພາຍ​ໃນ ແລະ ເປັນ​ຮອງ​ນາຍົກລັດຖະມົນຕີ ໃນ​ເດືອນ​ພະຈິກ ປີ 2017.

    ໃນ​ເມື່ອ​ກ່ອນ ທ່ານ ໂຈກ​ກີ ກາ​ຄາ​ເຣຍ ເຄີຍ​ເຮັດ​ວຽກ​ຢູ່​ໃນ​ຣັດ​ເຊຍ ໃນ​ຖານະ​ທີ່​ເປັນ​ຜູ້ອຳນວຍການ​ໃຫຍ່​ຂອງ​ບໍລິສັດ​ດ້ານ​ສະບຽງ​ອາຫານ​ແຫ່ງ​ໜຶ່ງ ແລະ ເປັນ​ຜູ້ອຳນວຍການ​ປະຈຳ​ພາກ​ພື້ນ ຂອງ​ບໍລິສັດ​ການບິນ ລຸບ​ທັນ​ຊາ (ຂອງ​ເຢຍ​ລະ​ມັນ) ພ້ອມ​ກັນ​ນັ້ນ​ທ່ານ​ກໍ​ເປັນ​ວິທະຍາກອນ​ໃນ​ບາງ​ຄັ້ງ​ຄາວ ໃນ​ມະຫາວິທະຍາໄລ​ແຫ່ງ​ຊາດ ​ມົສ​ກູ ກ່ອນ​ທີ່​ຈະ​ກັບ​ຄືນ​ໄປ​ໃນ​ຈໍ​ເຈຍ.

ຂ່າວທີ່ກ່ຽວຂ້ອງ