ຫຼາຍ​ປະ​ເທດ​ປະ​ເຊີນ​ກັບ​ໄພ​ທຳ​ມະ​ຊາດ

228 10 ກ.ຍ. 2019 ຂ່າວຕ່າງປະເທດ
ຫຼາຍ​ປະ​ເທດ​ປະ​ເຊີນ​ກັບ​ໄພ​ທຳ​ມະ​ຊາດ

     ພາຍຸ ຟາ​ຊາຍ (Faxai) ໄດ້​ພັດ​ຂຶ້ນ​ຝັ່ງ​ໃນ​ເຂດ​ຊີ​ບະ ທາງ​ທິດຕາເວັນອອກ​ຂອງ​ນະຄອນຫຼວງ​ໂຕ​ກຽວ (ປະເທດ​ຍີ່ປຸ່ນ) ໃນ​ຕອນ​ຮຸ່ງ​ເຊົ້າ​ຂອງ​ວັນ​ທີ 9 ກັນຍາ​ນີ້ ຫຼັງ​ຈາກ​ທີ່​ໄດ້​ພັດ​ຜ່ານ​ອ່າວ​ໂຕ​ກຽວ ດ້ວຍ​ກຳລັງ​ແຮງ​ຂອງ​ລົມ​ທີ່ 216​ກມ/ຊົ່ວໂມງ. ເຈົ້າ​ໜ້າທີ່​ຕ້ອງ​ໄດ້​ປະກາດ​ແຈ້ງ​ເຕືອນ​ການ​ອົບ​ພະ​ຍົບ​ແບບ​ບໍ່​ບັງຄັບ​ໄປ​ຍັງ​ປະຊາຊົນ  390.000 ກວ່າ​ຄົນ ພ້ອມ​ທັງ​ແຈ້ງ​ເຕືອນ​ວ່າ ປະລິມານ​ນ້ຳ​ຝົນ ແລະ ກຳລັງ​ແຮງ​ຂອງ​ລົມ ອາດ​ຈະ​ບັນລຸ​ລະດັບ “ສະຖິຕິ”.

    ກ່ອນ​ທີ່​ຈະ​ພັດ​ຂຶ້ນ​ຝັ່ງ​ໃນ​ຍີ່ປຸ່ນ​ນັ້ນ ພາຍຸ​ດັ່ງກ່າວ ໄດ້​ເຮັດ​ໃຫ້​ເກີດ​ການ​ຂາດ​ໄລຍະ​ດ້ານ​ການ​ຄົມມະນາຄົມ ຍ້ອນ​ວ່າ ລົດໄຟ 100 ຂະ​ບວນ ທີ່​ເຊື່ອມ​ຕໍ່​ໂຕ​ກຽວ​ກັບ​ຕົວ​ເມືອງ​ຕ່າງໆ​ໃນ​ເຂດ​ພາກ​ກາງ​ຍີ່ປຸ່ນ ກໍ​ຄື​ການ​ບໍລິການ​ເຮືອ​ຂ້າມ​ຟາກ​ໃນ​ອ່າວ​ໂຕ​ກຽວ ຢຸດຕິ​ການເຄື່ອນໄຫວ​ໃນ​ວັນ​ທີ 8 ສິງຫາ. ໃນ​ຂະນະ​ດຽວ​ກັນ ບໍລິສັດ​ການບິນ​ຕ່າງໆ ກໍ​ຕ້ອງ​ໄດ້​ຍົກເລີກ​ການບິນ​ຫຼາຍ​ຮ້ອຍ​ຖ້ຽວ ໃນ​ວັນ​ທີ 9 ກັນຍາ​ນີ້ ໃນ​ຂະນະ​ທີ່​ທາງ​ດ່ວນ​ຫຼາຍ​ສາຍ ຢູ່​ໃນ​ເຂດ​ແຄມ​ຝັ່ງ​ທະເລ ກໍ​ຕ້ອງ​ໄດ້​ປິດ​ການເຄື່ອນໄຫວ ຢູ່​ໃນ​ເຂດ ກາ​ນາ​ກາ​ວາ (ທິດຕາເວັນຕົກ​ຂອງ​ນະຄອນຫຼວງ​ໂຕ​ກຽວ).

    ທັງ ສ ເກົາຫຼີ ແລະ  ​ສປປ ເກົາຫຼີ ແຈ້ງ​ໃຫ້​ຮູ້ເມື່ອ​ວັນ​ທີ 8 ກັນຍາ​ນີ້​ວ່າ ພວມ​ແກ້​ໄຂ​ຜົນ​ຮ້າຍ​ທີ່​ເກີດ​ຈາກ​ພາຍຸ ລິງ​ລິງ (Lingling) ຫຼັງ​ຈາກ​ທີ່​ໄດ້​ພັດ​ຂຶ້ນ​ຝັ່ງ​ໃນ​ເຂດ​ດັ່ງກ່າວ ເມື່ອ​ກ່ອນ​ໜ້າ​ນີ້ 1 ວັນ. ໄລ່​ມາ​ຮອດ​ຕອນ​ຫົວຄ່ຳ​ຂອງ​ວັນ​ທີ 8 ກັນຍາ ພາຍຸ​ດັ່ງກ່າວ​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ​ແລ້ວ 3 ຄົນ ແລະ ບາດເຈັບ​ອີກ 24 ຄົນ ຢູ່​ໃນ ສ ເກົາຫຼີ. ນອກຈາກ​ນັ້ນແລ້ວ ກໍ​ມີ​ເຮືອນ​ເປ່​ເພ​ປະມານ 3.600 ຫຼັງ ເນື້ອທີ່​ປູກ​ພືດ​ໄດ້​ຮັບ​ຜົນ​ກະທົບ​ກວ່າ 14.000 ເຮັກຕາ ແລະ ມີ​ປະມານ  160.000 ຄອບຄົວ ບໍ່​ມີ​ໄຟຟ້າ​ໃຊ້ ໃນ​ຂະນະ​ທີ່​ການບິນ​ຖືກ​ຍົກເລີກ​ຫຼາຍ​ຮ້ອຍ​ຖ້ຽວ.

    ທີ່ ​ສປປ ເກົາຫຼີ ພາຍຸ ລິງ​ລິງ ກໍ​ໄດ້​ເຮັດ​ໃຫ້​ເກີດ​ຄວາມ​ເສຍ​ຫາຍ​​ບໍ່​ໜ້ອຍ. ຂ່າວສານ​ສູນ​ກາງຂອງ ​ສປປ ເກົາຫຼີ (KCNA) ລາຍ​ງານ​ວ່າ ກະສິກຳ ເປັນ​ຂົງເຂດ​ທີ່​ໄດ້​ຮັບ​ຄວາມ​ເສຍ​ຫາຍ​ໜັກໜ່ວງ​ທີ່​ສຸດ​ຈາກ​ພາຍຸ​ດັ່ງກ່າວ ໂດຍ​ມີ​ເນື້ອທີ່​ການ​ຜະລິດ​ກະສິກຳ ຖືກ​ນ້ຳ​ຖ້ວມ​ອັ່ງ​ກວ່າ 46.000 ເຮັກຕາ. ປັດຈຸບັນ​ນີ້ ວຽກ​ງານ​ແກ້​ໄຂ​ຜົນ​ຮ້າຍ​ຈາກ​ພາຍຸ​ລິງ​ລິງ ພວມ​ໄດ້​ຮັບ​ການ​ຜັນ​ຂະຫຍາຍ​ຢູ່​ໃນ​ທົ່ວ​ປະເທດ.

    ໃນ​ຂະນະ​ດຽວ​ກັນ ເຈົ້າ​ໜ້າທີ່​ຂອງ​ຈີນ ແຈ້ງ​ໃຫ້​ຮູ້​ວ່າ ລາຍ​ງານ​ເບື້ອງ​ຕົ້ນ ມີ​ຜູ້​ເສຍ​ຊີວິດ​ແລ້ວ 1 ຄົນ ແລະ ບາດເຈັບ​ອີກ 29 ຄົນ ຈາກ​ເຫດການ​ແຜ່ນດິນ​ໄຫວ ແທກ​ຄວາມ​ແຮງ​ສັ່ນ​ສະເທືອນ 5,4 ອົງສາ​ຣິກ​ເຕີ ຊຶ່ງ​ເກີດ​ຂຶ້ນ​ຢູ່​ໃນ​ແຂວງ​ເສ​ສວນ ເມື່ອ​ວັນ​ທີ 8 ກັນຍາ​ນີ້. ສູນ​ເຄືອ​ຂ່າຍ​ແຜ່ນດິນ​ໄຫວ​ຂອງ​ຈີນ (CENC) ໃຫ້​ຮູ້​ວ່າ ຈຸດ​ສູນ​ກາງຂອງ​ແຜ່ນດິນ​ໄຫວ​ເທື່ອ​ນີ້ ເກີດ​ຂຶ້ນ​ຢູ່​ເລິກ​ລົງ​ໄປ​ໃຕ້​ດິນ 10​ກມ.

 

ຂ່າວທີ່ກ່ຽວຂ້ອງ