ສະຫຼອງການສ້າງຕັ້ງສະຖາບັນສາທາລະນະສຸກ ຄົບຮອບ 20 ປີ

261 11 ກ.ຍ. 2019 ຂ່າວໜ້າ​ໜຶ່ງ

    ພິ­ທີ​ສະ­ເຫຼີມ­ສະ­ຫຼອງ​ຄົບ­ຮອບ 20 ປີ ແຫ່ງ​ການ​ເຕີບ​ໃຫຍ່​ຂະ­ຫຍາຍ­ຕົວ​ຂອງ​ວຽກ​ງານ​ອົບ­ຮົມ ແລະ ການ​ຄົ້ນ­ຄວ້າ​ວິ­ທະ­ຍາ­ສາດ​ສາ­ທາ­ລະ­ນະ​ສຸກ​ຢູ່ ສປປ ລາວ ຈັດ​ຂຶ້ນ​ວັນ​ທີ 9 ກັນ­ຍາ 2019 ທີ່​ສະ​ຖາ​ບັນ​ສາ­ທາ­ລະ­ນະ​ສຸກ​ສາດ ແລະ ການ​ແພດ​ເຂດ​ຮ້ອນ ເປັນ​ກຽດ​ເຂົ້າ​ຮ່ວມ​ຂອງ​ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ພ້ອມ​ດ້ວຍ​ຫົວ­ໜ້າ ຮອງ​ຫົວ­ໜ້າ​ສະ​ຖາ​ບັນ ຫົວ­ໜ້າ​ຫ້ອງ­ການ ກົມ ພະ­ນັກ­ງານ​ອາ­ວຸ­ໂສ ຄູ່​ຮ່ວມ​ພັດ­ທະ­ນາ ແລະ ຂະ­ແໜງ­ການ​ກ່ຽວ­ຂ້ອງ.

    ໃນ​ພິ­ທີ ທ່ານ ບຸນ​ກອງ ສີ​ຫາ​ວົງ ໄດ້​ລາຍ​ງານ​ຜົນ­ງານ​ຕະ­ຫຼອດ​ໄລ­ຍະ 20 ປີ­ຜ່ານ­ມາ ສະ​ຖາ​ບັນ​ການ​ແພດ​ເຂດ​ຮ້ອນ​ຟຣັງ​ໂກ​ໂຟ​ນີ ໄດ້​ສ້າງ​ນັກ​ສຶກ​ສາ​ປະ­ລິນ­ຍາ​ໂທ ທີ່​ເປັນ​ທີ່​ຍອມ­ຮັບ​ຈາກ​ສາ­ກົນ​ເພື່ອ​ບັນ­ລຸ​ຕາມ​ຄວາມ​ຕ້ອງ­ການ​ຂອງ​ລັດ­ຖະ­ບານ ທັງ​ນີ້ ກໍ່​ເພື່ອ​ແນ­ໃສ່​ແກ້​ໄຂ​ບັນ­ຫາ​ສຸ­ຂະ­ພາບ ແລະ ການ​ແພດ​ເຂດ​ຮ້ອນ​ທີ່​ເປັນ​ບຸ­ລິ­ມະ­ສິດ​ໃນ​ພາກ​ພື້ນ ນັບ​ແຕ່​ປີ 2000-2018 ສາ­ມາດ​ສ້າງ​ບຸ​ຄະ­ລາ​ກອນ​ໄດ້​ທັງ​ໝົດ 284 ທ່ານ ໃນ​ນັ້ນ ຄົນ​ລາວ​ຈຳ­ນວນ 172 ທ່ານ ຫວຽດ­ນາມ 43 ທ່ານ ກຳ­ປູ­ເຈຍ 17 ທ່ານ ຈີນ 20 ທ່ານ ມາ­ດາ​ກັດ​ສະ­ກາ 29 ທ່ານ ແລະ ຈຳ­ນວນ 3 ທ່ານ​ແມ່ນ​ມາ​ຈາກ​ທະ­ວີບ​ອາ​ຟຣິ​ກາ ບັນ­ດາ​ນັກ​ສຶກ​ສາ​ເຫຼົ່າ​ນີ້​ໄດ້​ກາຍ­ເປັນ​ນັກ​ຄົ້ນ­ຄວ້າ ຫົວ­ໜ້າ​ໂຄງ­ການ ອາ­ຈານ​ສອນ ແລະ ພະ­ນັກ­ງານ.

    ສ່ວນ​ສະ​ຖາ​ບັນ​ສາ­ທາ­ລະ­ນະ​ສຸກ​ສາດ​ໄດ້​ຮັບ­ຜິດ­ຊອບ​ວຽກ​ງານ​ຄຸ້ມ​ຄອງ​ສາ­ທາ­ລະ­ນະ​ສຸກ ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ແລະ ດຳ­ເນີນ​ການ​ຄົ້ນ­ຄວ້າ​ວິ­ທະ­ຍາ­ສາດ​ສາ­ທາ­ລະ­ນະ​ສຸກ ເຊິ່ງ​ຕະ­ຫຼອດ​ໄລ­ຍະ 20 ປີ​ໄດ້​ສ້າງ​ນັກ​ສຶກ​ສາ​ປະ­ລິນ­ຍາ​ໂທ ດ້ານ​ສາ­ທາ­ລະ­ນະ​ສຸກ​ສາດ ໂດຍ​ໃຊ້​ພາ­ສາ​ຝຣັ່ງ​ຈຳ­ນວນ 2 ຮຸ່ນ​ໃຫ້​ຜູ້​ບໍ­ລິ­ຫານ​ສາ­ທາ­ລະ­ນະ​ສຸກ​ຂັ້ນ​ແຂວງ ເມືອງ ເຝິກ­ອົບ­ຮົມ​ໄລ­ຍະ​ສັ້ນ​ດ້ານ​ການ​ຄຸ້ມ​ຄອງ​ສາ­ທາ­ລະ­ນະ​ສຸກ​ໃຫ້​ພະ­ນັກ­ງານ​ຂັ້ນ​ສູນ​ກາງ ແລະ ທ້ອງ­ຖິ່ນ ດ້ານ​ການ​ຄົ້ນ­ຄວ້າ​ວິ­ທະ­ຍາ­ສາດ​ສາ­ທາ­ລະ­ນະ​ສຸກ​ໄດ້​ດຳ­ເນີນ​ການ​ສຳ​ຫຼວດ​ແຫ່ງ​ຊາດ ແລະ ສຳ​ຫຼວດ​ສຸ­ຂະ­ພາບ ນອກ​ນັ້ນ ກໍ​ຄົ້ນ­ຄວ້າ​ວິ­ທະ­ຍາ­ສາດ​ດ້ານ​ສາ­ທາ­ລະ­ນະ​ສຸກ​ທີ່​ກ່ຽວ​ພັນ​ກັບ​ພະ­ຍາດ​ເຂດ​ຮ້ອນ ລະ­ບົບ​ສາ­ທາ­ລະ­ນະ​ສຸກ ໂພ­ຊະ​ນາ​ການ ສາ­ທາ­ລະ­ນະ​ສຸກ​ສາດ ແລະ ອື່ນໆ.

ຂ່າວທີ່ກ່ຽວຂ້ອງ