ຂ່າວຫຼ້າສຸດ

ອິນ​ໂດ​ເນ​ເຊຍ​ ເປີດ​ກວ້າງ​ການ​ນຳ​ໃຊ້​ລົດຍົນສັນ​ຈອນ​ຕາມ​ປ້າຍ​ໝາຍ​ເລກ​ຄູ່-ຄີກ ຢູ່​ຈາ​ກາ​ຕາ

182 12 ກ.ຍ. 2019 ຂ່າວຕ່າງປະເທດ

    ຫຼັງ​ຈາກ​ທີ່​ໄດ້​ທົດ​ລອງ​ມາ​ເປັນ​ເວລາ 3 ອາທິດ ມາ​ໃນ​ວັນ​ທີ 9 ກັນຍາ​ນີ້ ອຳນາດ​ການ​ປົກຄອງ​ນະຄອນຫຼວງ​ຈາ​ກາ​ຕາ ຂອງ​ອິນ​ໂດ​ເນ​ເຊຍ ກໍ​ໄດ້​ເປີດ​ກວ້າງ​ຢ່າງ​ເປັນ​ທາງ​ການ ໃນ​ການ​ນຳ​ໃຊ້​ຂໍ້​ກຳນົດ​ການ​ສັນຈອນ ຕາມ​ປ້າຍ​ທະບຽນ​ໝາຍ​ເລກ​ຄູ່-ຄີກ ສຳລັບ​ລົດຍົນ​ທີ່​ແລ່ນ​ຕາມ​ຖະໜົນ​ຫຼາຍ​ສາຍ ພາຍ​ໃນ​ນະຄອນຫຼວງ.

    ຂ່າວ​ແຈ້ງວ່າ ລົດຍົນ​ທີ່​ມີ​ປ້າຍ​ທະບຽນ​ໝາຍ​ເລກ​ຄີກ ໄດ້​ຮັບ​ອະນຸຍາດ​ສັນຈອນ​ໃນ​ວັນ​ຄີກ ແລະ​ກົງກັນຂ້າມ ລົດຍົນ​ທີ່​ມີ​ປ້າຍ​ທະບຽນ​ໝາຍ​ເລກ​ຄູ່ ໄດ້​ຮັບ​ອະນຸຍາດ​ສັນຈອນ​ໃນ​ວັນ​ຄູ່ ຕາມ​ຖະໜົນ​ສຳຄັນ 25 ສາຍ ໃນ​ນະຄອນຫຼວງ ຈາ​ກາ​ຕາ ໃນ​ວັນ​ຕ່າງໆ​ພາຍ​ໃນ​ອາທິດ ແຕ່​ເວລາ 6 ໂມງ ຫາ 10 ໂມງ ແລະ​ແຕ່ 16 ໂມງ ຫາ 21 ໂມງ ໂດຍ​ຍົກເວັ້ນ​ບັນດາ​ວັນ​ບຸນ. ກ່ອນ​ໜ້າ​ນັ້ນ ມີ​ຖະໜົນ​ພຽງ 9 ສາຍ ທີ່​ນອນ​ຢູ່​ໃນ​ຂອບ​ເຂດ​ການ​ນຳ​ໃຊ້​ຂໍ້​ກຳນົດ​ດັ່ງກ່າວ.

    ໃນ​ຕອນ​ເຊົ້າ​ຂອງ​ວັນ​ທີ 9 ກັນຍາ​ນີ້ ຕຳຫຼວດ​ໃນ​ນະຄອນຫຼວງ​ຈາ​ກາ​ຕາ ໄດ້​ເລີ່ມ​ດຳເນີນ​ການ​ປັບ​ໃໝ​ຕໍ່​ບັນດາ​ເຈົ້າ​ຂອງ​ຍານພາຫະນະ ທີ່​ລະເມີດ​ກົດໝາຍ​ວ່າ​ດ້ວຍ​ການ​ຄົມມະນາຄົມ​ທາງບົກ. ຕາມ​ນັ້ນແລ້ວ ຜູ້​ທີ່​ລະເມີດ ອາດ​ຈະ​ປະ​ເຊີນ​ກັບ​ລະດັບ​ການ​ປັບ​ໃໝ​ດ້ວຍ​ການ​ຖືກ​ຈຳ​ຄຸກ​ເປັນ​ເວລາ 2 ເດືອນ ຫຼື​ປັບ​ໃໝ​ເປັນ​ເງິນ 500.000 ຣູ​ເປຍ (ເທົ່າ​ກັບ​ປະມານ 35 ໂດ​ລາ​ສະຫະລັດ).

     ເມື່ອ​ປີ 2013 ໃນ​ເວລາ​ທີ່​ປະທານາທິບໍດີ​ອິນ​ໂດ​ເນ​ເຊຍ ໂຈ​ໂກ ວີ​ໂດ​ໂດ ຍັງ​ເປັນ​ເຈົ້າ​ຄອງ​ນະຄອນ​ຈາ​ກາ​ຕາ ນັ້ນ​ໄດ້​ໃຫ້​ນຳ​ໃຊ້​ມາດ​ຕະການ ປ້າຍ​ທະບຽນ​ລົດ​ໝາຍ​ເລກ​ຄູ່ - ຄີກ ເພື່ອ​ຮອງ​ຮັບ​ກັບ​ສະພາບ​ການ​ສັນຈອນ​ແອ​ອັດ ໂດຍ​ເລີ່ມ​ຕົ້ນ​ປະຕິບັດ​ກັບ​ຖະໜົນ 4 ສາຍ ຢູ່​ທາງ​ທິດໃຕ້​ນະຄອນຫຼວງ​ຈາ​ກາ​ຕາ.

ຂ່າວທີ່ກ່ຽວຂ້ອງ