ຟີ​ລິບ​ປິນ ຂ້າ​ທຳລາຍ​ໝູ​ຫຼາຍ​ພັນ​ໂຕ ຍ້ອນ​ພະຍາດ​ອະຫິວາ​ໝູ​ສາຍ​ພັນ​ອາ​ຟະຣິກກາ

140 12 ກ.ຍ. 2019 ຂ່າວຕ່າງປະເທດ
ຟີ​ລິບ​ປິນ ຂ້າ​ທຳລາຍ​ໝູ​ຫຼາຍ​ພັນ​ໂຕ ຍ້ອນ​ພະຍາດ​ອະຫິວາ​ໝູ​ສາຍ​ພັນ​ອາ​ຟະຣິກກາ

    ກະຊວງ​ກະສິກຳ​ຂອງ​ຟີ​ລິບ​ປິນ ແຈ້ງ​ໃຫ້​ຮູ້ເມື່ອ​ວັນ​ທີ 9 ກັນຍາ​ນີ້​ວ່າ ພະຍາດ​ອະຫິ​ວາ​ໝູ​ສາຍ​ພັນ​ອາ​ຟະ​ຣິກ​ກາ ເປັນ​ສາເຫດ​ເຮັດ​ໃຫ້​ໝູ​ຢູ່​ໃນ​ຢ່າງ​ໜ້ອຍ 7 ບ້ານ ໃກ້​ກັບ​ນະຄອນຫຼວງ​ມາ​ນີ​ລາ ຕາຍ​ໄປ​ຍ້ອນ​ເກີດ​ການ​ລະບາດ​ຂອງ​ພະຍາດ​ດັ່ງກ່າວ.

    ທ່ານ ວິນ​ລຽມ ດາ ລັດຖະມົນຕີ​ກະຊວງ​ກະສິກຳ​ຂອງ​ຟີ​ລິບ​ປິນ ເວົ້າ​ວ່າ ມີ​ເຖິງ 14/20 ຂອງ​ຕົວຢ່າງ​ການ​ກວດ​ພະຍາດ ທີ່​ເອົາ​ມາ​ຈາກ​ເຂດ​ທີ່​ມີ​ໝູ​ຕາຍ ໄດ້​ໃຫ້​ຜົນ​ເປັນ​ບວກ​ກັບ​ພະຍາດ​ອະຫິ​ວາ​ໝູ​ສາຍ​ພັນ​ອາ​ຟະ​ຣິກ​ກາ ແຕ່​ກໍ​ຍັງ​ຕ້ອງການ​ຜົນ​ກວດ​ອື່ນໆ​ຕື່ມ​ອີກ. ມີ​ໝູ  7.400 ກວ່າ​ໂຕ ໄດ້​ຖືກ​ຂ້າ​ທຳລາຍ​ຖິ້ມ​ແລ້ວ ແລະ​ບັນດາ​ບ້ານ​ທີ່​ມີ​ການລະບາດພະຍາດ​ດັ່ງກ່າວ ກໍ​ໄດ້​ຮັບ​ການ​ແຍກ​ບໍລິເວນ ເພື່ອ​ຈຳກັດ ແລະ​ຂ້າ​ເຊື້ອ​ພະຍາດ.

    ຂ່າວ​ແຈ້ງວ່າ ລັດຖະບານ​ຟີ​ລິບ​ປິນ ຈະ​ສ້າງຕັ້ງ​ອົງການ​ລະຫວ່າງ​ຂະແໜງການ​ຂຶ້ນ​ມາ ເພື່ອ​ປະສານ​ສົມທົບ ໃນ​ການ​ສະກັດ​ກັ້ນ ແລະ​ຕ້ານ​ການ​ແພ່​ລາມ​ຂອງ​ພະຍາດ​ອະຫິ​ວາ​ໝູ​ສາຍ​ພັນ​ອາ​ຟະ​ຣິກ​ກາ ທີ່​ຈະ​ເປັນ​ຜົນ​ກະທົບ​ຕໍ່​ຂະແໜງການ​ລ້ຽງສັດ.

    ກ່ອນ​ໜ້າ​ນີ້ ເມື່ອ​ຕົ້ນ​ເດືອນ​ສິງຫາ​ທີ່​ຜ່ານ​ມາ ຟີ​ລິບ​ປິນ​ໄດ້​ເປີດ​ກວ້າງ​ຄຳ​ສັ່ງ​ຫ້າມ​ຊົ່ວຄາວ ໃນ​ການເຄື່ອນໄຫວ​ນຳ​ເຂົ້າ ແຈກ​ຢາຍ ແລະ​ຂາຍ ບັນດາ​ຜະລິດ​ຕະ​ພັນ​ຈາກ​ຊີ້ນ​ໝູ ຈາກ 16 ຂຶ້ນ​ເປັນ 20 ປະເທດ ແລະ​ເຂດ​ແຄວ້ນ ທີ່​ໄດ້​ຮັບ​ຜົນ​ກະທົບ​ຈາກ​ໄວ​​ຣັສ​ອະຫິ​ວາ​ໝູ​ສາຍ​ພັນ​ອາ​ຟະ​ຣິກ​ກາ. ກະຊວງ​ກະສິກຳ​ຂອງ​ຟີ​ລິ​ປິນ ໄດ້​ປະຕິບັດ​ຄຳ​ສັ່ງ​ຫ້າມ​ດັ່ງກ່າວ ນັບ​ແຕ່​ເດືອນ​ກັນຍາ ປີ 2018 ເປັນຕົ້ນ​ມາ ຄື​ກັບ​ວ່າ​ເປັນ​ມາດ​ຕະການ​ປ້ອງ​ກັນ​ຄວາມ​ສ່ຽງ​ອັນຕະລາຍ​ຂອງ​ພະຍາດ​ດັ່ງກ່າວ ທີ່​ຈະ​ແຊກ​ຊຶມ​ເຂົ້າ​ໄປ​ໃນ​ຟີ​ລິບ​ປິນ.

ຂ່າວທີ່ກ່ຽວຂ້ອງ