ເບິ່ງບ້ານເຂົາເອົາບົດຮຽນ 12-09-2019

109 12 ກ.ຍ. 2019 ຫົວຂໍ້ຂ່າວອື່ນໆ

   ມື້­ນີ້ ຂໍ​ຊວນ​ບັນ­ດາ​ທ່ານ​ຜູ້​ອ່ານ​ໄປ​ຮູ້​ກັບ​ມາດ​ຕະ­ການ​ແກ້​ໄຂ​ບັນ­ຫາ ໃຊ້​ແຮງ​ງານ​ເດັກ​ຢູ່​ຫວຽດ­ນາມ ເລື່ອງ​ທາງ​ການ​ມາ​ເລ​ເຊຍ​ສັ່ງ​ຫ້າມ​ກະ­ຈາຍ​ພາບ-ເນື້ອ​ໃນ​ລາ­ມົກ ຜ່ານ​ສື່​ສັງ­ຄົມ​ອອນ​ລາຍ ແລະ ຂ່າວ​ກ່ຽວ​ກັບ​ການ​ຕິດ​ຕັ້ງ​ເຄື່ອງ​ປັບ​ອາ­ກາດ​ສົດ​ໃສ່​ລົດ​ປະ­ຈຳ​ທາງ ທີ່ ສ ເກົາ­ຫຼີ.

   ທີ່ ຫວຽດ­ນາມ: ໃນ​ຕົ້ນ​ເດືອນ​ສິງ­ຫາ​ປີ​ນີ້ ທີ່​ນະ­ຄອນ​ໂຮ່​ຈີ​ມິງ ໄດ້​ຈັດ​ໃຫ້​ມີ​ກອງ​ປະ­ຊຸມ​ສຳ​ມະ​ນາ​ວ່າ​ດ້ວຍ​ການ​ໃຊ້​ແຮງ​ງານ​ເດັກ ໂດຍ​ມີ​ການ​ເຂົ້າ​ຮ່ວມ​ຂອງ​ຊ່ຽວ­ຊານ​ດ້ານ​ແຮງ​ງານ ຈາກ​ອົງ­ການ​ແຮງ​ງານ​ສາ­ກົນ (ໄອ​ໂລ ILO) ກອງ​ປະ­ຊຸມ​ສຳ​ມະ​ນາ​ໄດ້​ເນັ້ນ​ເຖິງ​ຄວາມ​ຈຳ­ເປັນ​ທີ່​ຫວຽດ­ນາມ ຕ້ອງ​ຍົກ​ສູງ​ຄວາມ​ສາ­ມາດ​ໃນ​ການ​ປະ­ຕິ­ບັດ​ພັນ­ທະ​ສາ­ກົນ​ຂອງ​ຕົນ ໃນ​ຂະ­ແໜງ​ແຮງ​ງານ ລວມ​ທັງ​ເປົ້າ​ໝາຍ ລຶ­ບລ້າງ​ການ​ນຳ​ໃຊ້​ແຮງ​ງານ​ແບບ​ບັງ­ຄັບ ແລະ ແຮງ​ງານ​ເດັກ ຊຶ່ງ​ເປັນ​ເງື່ອນ­ໄຂ​ຕົ້ນ­ຕໍ​ຂອງ​ຫວຽດ­ນາມ ໃນ​ການ​ເຊື່ອມ​ຕົວ­ຢ່າງ​ເລິກ­ເຊິ່ງ ແລະ ກວ້າງ­ຂວາງ​ເຂົ້າ​ໃນ​ລະ­ບົບ​ເສດ­ຖະ­ກິດ​ໂລກ ໂດຍ​ສະ­ເພາະ​ແມ່ນ​ລະ­ບົບ​ການ​ຄ້າ​ເສລີ ທ່ານ​ນາງ ວາ​ເລັນ​ຈິ​ນາ ບັກ​ຈູ​ຈີ ຊ່ຽວ­ຊານ ດ້ານ​ແຮງ​ງານ​ຈາກ ອົງ­ການ​ໄອ​ໂລ ມີ​ຄຳ​ເຫັນ​ໃນ​ກອງ​ປະ­ຊຸມ​ນີ້​ວ່າ ມີ​ຄວາມ​ຈຳ­ເປັນ​ທີ່​ຫວຽດ­ນາມ ຕ້ອງ​ປັບ­ປຸງ​ຄວາມ​ໂປ່ງ​ໃສ​ໃນ​ດ້ານ​ນີ້ ເພື່ອ​ກຽມ­ພ້ອມ​ດ້ວຍ​ຂໍ້​ມູນ​ກ່ຽວ​ກັບ​ບັນ­ດາ​ບໍ­ລິ­ສັດ​ການ​ສະ­ໜອງ ແລະ ຊອກ​ຫາ​ແຫຼ່ງ​ແຮງ​ງານ ເຮັດ​ໄດ້​ດັ່ງ­ນີ້​ຈະ​ເປັນ​ປະ­ໂຫຍດ​ຕໍ່​ຫວຽດ­ນາມ ແລະ ສຳ­ລັບ​ບັນ­ດາ​ບໍ­ລິ­ສັດ​ຕ່າງ­ປະ­ເທດ​ທີ່​ຕ້ອງ­ການ​ລົງ­ທຶນ ທີ່​ປອດ​ຈາກ​ການ​ນຳ​ໃຊ້​ແຮງ​ງານ​ເດັກ.

   ທີ່ ມາ​ເລ​ເຊຍ: ຂ່າວ​ໜັງ­ສື­ພິມ​ວຽງ​ຈັນ​ທາມ (17 ມິ­ຖຸ­ນາ 2019) ໄດ້​ເວົ້າ​ເຖິງ​ກ່ຽວ​ກັບ​ຄຳ​ປະ­ກາດ​ເຕືອນ​ຢ່າງ​ເຄັ່ງ­ຂຶມ​ຈາກ​ທາງ​ການ​ມາ​ເລ​ເຊຍ ບໍ່​ໃຫ້​ເຄືອ​ຄ່າຍ​ສື່​ສັງ­ຄົມ​ເຜີຍ­ແຜ່​ຮູບ​ພາບ​ລາ­ມົກ​ອາ­ນາ​ຈານ ຄຳ​ປະ­ກາດ​ເຕືອນ​ທີ່​ອອກ​ມາ​ຈາກ​ປາກ ທ່ານ​ລັດ­ຖະ­ມົນ­ຕີ​ກະ­ຊວງ​ໂທລະ​ຄົມ­ມະ­ນາ­ຄົມ ແລະ ມັນ​ຕີ​ມີ​ເດຍ​ມາ​ເລ​ເຊຍ ມີ​ຂຶ້ນ​ທ່າມ­ກາງ​ມີ​ຄະ​ລິບ ວິ​ດີ​ໂອ ຮູບ​ພາບ​ລາ­ມົກ​ທາງ​ເພດ​ໂຜ່​ອອກ​ມາ ຜ່ານ​ເຄືອ​ຄ່າຍ​ຂ່າວ​ສັງ­ຄົມ​ອອນ​ລາຍ ໃນ​ຄຳ­ເຕືອນ ທ່ານ​ລັດ­ຖະ­ມົນ­ຕີ​ບອກ​ວ່າ ໃຜ​ຍັງ​ດື້​ເຜີຍ­ແຜ່​ຮູບ​ພາບ​ຕ້ອງ​ຫ້າມ​ດັ່ງ­ກ່າວ ຈະ​ໄດ້​ຮັບ​ໂທດ​ຕາມ​ໝວດ 233 ຂອງ​ກົດ­ໝາຍ​ວ່າ​ດ້ວຍ​ໂທລະ​ຄົມ­ມະ­ນາ­ຄົມ ແລະ ມັນ​ຕີ​ມີ​ເດຍ ສະ­ບັບ​ປີ 1998 ຄື ອາດ​ຈະ​ຖືກ​ໂທດ​ຈຳ​ຄຸກ​ສູງ​ສຸດ​ເປັນ​ເວ­ລາ 1 ປີ ແລະ ປັບ​ໃໝ ເປັນ​ເງິນ 50.000 ຣິງ​ກິດ ຫຼື ທັງ​ຖືກ​ຈຳ​ຄຸກ ແລະ ທັງ​ຖືກ​ປັບ​ໃໝ​ໄປ​ພ້ອມໆ​ກັນ ເພື່ອ​ເຮັດ​ໃຫ້​ຂໍ້​ຫ້າມ ໃນ​ກົດ­ໝາຍ​ມີ​ຜົນ​ສັກ­ສິດ ທາງ​ກະ­ຊວງ​ຈະ​ຮ່ວມ​ມື​ກັບ​ເຟດ​ບຸກ ເພື່ອ​ສະ­ກັດ​ກັ້ນ​ບໍ່​ໃຫ້​ມີ​ການ​ເຜີຍ­ແຜ່​ພາບ​ວິ​ດີ​ໂອ​ລາ­ມົກ ເປື່ອຍ​ເຍື່ອຍ​ອີກ​ຕໍ່​ໄປ ຂ່າວ​ໃຫ້​ຮູ້​ຕື່ມ​ວ່າ ທາງ​ການ​ມາ​ເລ​ເຊຍ ໄດ້​ສັ່ງ​ປິດ​ການ­ເຄື່ອນ­ໄຫວ​ຂອງ​ເຄືອ​ຄ່າຍ​ຂ່າວ​ສັງ­ຄົມ​ຊາ​ບາ​ກີ​ນີ 2 ຄອມ ຍ້ອນ​ໄດ້​ເຜີຍ­ແຜ່​ພາບ​ວິ​ດີ​ໂອ​ກິດ­ຈະ­ກຳ​ທາງ​ເພດ​ທີ່​ຂັດ​ຕໍ່​ລະ­ບຽບ​ກົດ­ໝາຍ ແລະ ຄວາມ​ເປັນ​ລະ­ບຽບ​ຮຽບ​ຮ້ອຍ​ຂອງ​ສັງ­ຄົມ ແນວ­ໃດ​ກໍ​ດີ ທາງ​ກະ­ຊວງ​ບອກ​ວ່າ ເຄືອ​ຄ່າຍ ຊາ​ບາ​ກີ​ນີ ຈະ​ໄດ້​ຮັບ​ສິດ​ດຳ­ເນີນ​ງານ​ຄືນ ພາຍ­ຫຼັງ​ໄດ້​ລຶບ​ຮູບ​ພາບ​ວິ​ດີ​ໂອ​ດັ່ງ­ກ່າວ​ທັງ​ໝົດ.

   ທີ່ ສ ເກົາ­ຫຼີ: ຂ່າວ​ຕ່າງ­ປະ­ເທດ​ໃຫ້​ຮູ້​ໃນ​ວັນ​ທີ 4 ເດືອນ​ກັນ­ຍາ​ປີ​ນີ້​ວ່າ ທາງ​ການ​ຂອງ​ນະ­ຄອນ­ຫຼວງ​ເຊ​ອູນ ສ ເກົາ­ຫຼີ ໄດ້​ສຳ­ເລັດ​ການ​ຕິດ​ຕັ້ງ​ເຄື່ອງ ຈັກ​ປັ່ນ​ອາ­ກາດ​ສົດ​ໃສ່​ລົດ​ໂດຍ­ສານ​ສາ­ທາ­ລະ­ນະ ໃນ​ອັດ­ຕາ 97% ຂອງ​ຈຳ­ນວນ​ລົດ​ທັງ​ໝົດ ການ​ຕິດ​ຕັ້ງ​ເຄື່ອງ​ປັ່ນ​ອາ­ກາດ​ສົດ​ນີ້ ຈະ​ຊ່ວຍ​ແກ້​ໄຂ​ບັນ­ຫາ​ມົນ​ລະ​ພິດ​ທາງ​ອາ­ກາດ​ພາຍ​ໃນ​ນະ­ຄອນ­ຫຼວງ ທີ່​ປົນ​ເປື້ອນ​ດ້ວຍ​ຝຸ່ນ​ລະ­ອອງ ທີ່​ເປັນ​ອັນ­ຕະ­ລາຍ​ຕໍ່​ລະ­ບົບ​ຫາຍ­ໃຈ​ຂອງ​ຊາວ​ນະ­ຄອນ­ຫຼວງ.

ຂ່າວທີ່ກ່ຽວຂ້ອງ