ສ ອາ​ເມຣິກາ ອອກດຳລັດ​ໃໝ່​ກ່ຽວ​ກັບ​ການ​ຕ້ານ​ການ​ກໍ່​ການ​ຮ້າຍ

171 12 ກ.ຍ. 2019 ຂ່າວຕ່າງປະເທດ
ສ ອາ​ເມຣິກາ ອອກດຳລັດ​ໃໝ່​ກ່ຽວ​ກັບ​ການ​ຕ້ານ​ການ​ກໍ່​ການ​ຮ້າຍ

    ວັນ​ທີ 10 ກັນຍາ​ນີ້ ອຳນາດ​ການ​ປົກຄອງ ສ ອາ​ເມ​ຣິ​ກາ ພາຍ​ໃຕ້​ການ​ນຳພາ​ຂອງ​ປະທານາທິບໍດີ ໂດ​ນາ​​ລ ທຣຳ ໄດ້​ປະກາດ​ດຳລັດ​ໃໝ່​ສະບັບ​ໜຶ່ງ​ກ່ຽວ​ກັບ​ການ​ປະຕິບັດ​ກົດໝາຍ ຊຶ່ງ​ເປັນ​ການ​ອະນຸຍາດ​ໃຫ້ ສ ອາ​ເມ​ຣິ​ກາ ປິດ​ລ້ອມ​ຕໍ່​ຫົວໜ້າ​ຂອງ​ບັນດາ​ອົງການ​ກໍ່​ການ​ຮ້າຍ ໂດຍ​ທີ່​ບໍ່​ຈຳເປັນ​ຕ້ອງ​ກ່າວ​ຫາ​ວ່າ​ມີ​ການ​ກະທຳ​ກໍ່​ການ​ຮ້າຍ​ຕົວ​ຈິງ.

    ໃນ​ແຈ້ງ​ການ​ສະບັບ​ໜຶ່ງ ທີ່​ມີ​ອອກ​ມາ​ພ້ອມ​ກັບ​ດຳລັດ​ນັ້ນ ປະທານາທິບໍດີ ທຣຳ ຢືນຢັນ​ວ່າ ບັນດາ​ອົງການ​ການ​ເງິນ​ຂອງ​ຕ່າງປະເທດ ໄດ້​ຮັບ​ການ​ແຈ້ງ​ເຕືອນ​ແລ້ວ ກ່ຽວ​ກັບ​ຄວາມ​ສ່ຽງ​ຖືກ​ປິດ​ລ້ອມ ຖ້າ​ຫາ​ກວ່າ​ປະຕິບັດ ແລະ​ສ້າງ​ເງື່ອນໄຂ​ດ້ວຍ​ຄວາມ​ຕັ້ງໃຈ ຕໍ່​ການ​ແລກປ່ຽນ​ທີ່​ສຳຄັນ​ໃດໆ​ກໍ​ຕາມ ກັບ​ບັນດາ​ເປົ້າ​ໝາຍ​ກໍ່​ການ​ຮ້າຍ.

    ທ່ານ ໄມ ພອມ​ພຽວ ລັດຖະມົນຕີ​ການ​ຕ່າງປະເທດ ສ ອາ​ເມ​ຣິ​ກາ ເວົ້າ​ວ່າ ດຳລັດ​ດັ່ງກ່າວ ເປັນ​ການ​ຊ່ວຍ​ກະຊວງ​ການ​ຕ່າງປະເທດ ແລະ​ກະຊວງ​ການ​ເງິນ ສ ອາ​ເມ​ຣິ​ກາ ໃນ​ການ​ປະຕິບັດ​ມາດ​ຕະການ​ປິດ​ລ້ອມ​ຢ່າງ​ໄດ້ຜົນ ແລະ​ຄົບ​ຖ້ວນ​ກວ່າ​ເກົ່າ ຕໍ່​ບັນດາ​ບຸກຄົນ ແລະ​ອົງ​ປະກອບ ທີ່​ເຂົ້າ​ຮ່ວມ​ໃນ​ການ​ຝຶກ​ຊ້ອມ​ກ່ຽວ​ກັບ​ການ​ກໍ່​ການ​ຮ້າຍ ແລະ​ມີ​ສິດ​ອຳນາດ​ໃໝ່​ເພີ່ມ​ເຕີມ ເພື່ອ​ປິດ​ລ້ອມ​ຕໍ່​ບັນດາ​ອົງການ​ການ​ເງິນ​ຂອງ​ຕ່າງປະເທດ ທີ່​ຮ່ວມ​ມື​ກັບ​ບັນດາ​ເປົ້າ​ໝາຍ​ກໍ່​ການ​ຮ້າຍ​ດ້ວຍ​ຄວາມ​ຕັ້ງໃຈ.

    ໄປ​ພ້ອມໆ​ກັບ​ການ​ແຈ້ງ​ການ​ກ່ຽວ​ກັບ​ດຳລັດ​ໃໝ່​ດັ່ງກ່າວ ກະຊວງ​ການ​ເງິນ ສ ອາ​ເມ​ຣິ​ກາ ກໍ​ໄດ້​ແຈ້ງ​ໃຫ້​ຮູ້​ເຖິງ​ຄຳ​ສັ່ງ​ປິດ​ລ້ອມ​ໃໝ່​ຕໍ່ 10 ກວ່າ​ຄົນ ທີ່​ເປັນ​ຫົວໜ້າ ບຸກຄົນ ຕະຫຼອດ​ຮອດ​ອົງ​ປະກອບ ທີ່​ຮ່ວມ​ກຸ່ມ​ກັບ​ບັນດາ​ກຸ່ມ​ກໍ່​ການ​ຮ້າຍ​ທີ່​ໄດ້​ຮັບ​ການ​​​ກຳນົດ ໃນ​ນັ້ນ​ມີ​ອົງການ ລັດ​ອິ​ສລາມ (IS). ທີ່​ໜ້າ​ໃສ່ໃຈ​ກໍ​ຄື​ວ່າ ກອງ​ກຳລັງ​ທະຫານ​ປ້ອງ​ກັນ​ການ​ປະຕິວັດ​ອິ​ສລາມ ອີ​ຣານ ກໍ​ຖືກ​ຈັດ​ເຂົ້າ​ໃນ​ບັນຊີ​ລາຍ​ຊື່​ດັ່ງກ່າວ​ດ້ວຍ.

    ດຳລັດ​ໃໝ່​ດັ່ງກ່າວ ຖືກ​ນຳ​ອອກ​ມາ 1 ມື້ກ່ອນ​ທີ່ ສ ອາ​ເມ​ຣິ​ກາ ລະນຶກ​ຄົບຮອບ 18 ປີ ທີ່​ເກີດ​ເຫດການ​ໂຈມ​ຕີ​ກໍ່​ການ​ຮ້າຍ​ນອງ​ເລືອດ ເມື່ອ​ວັນ​ທີ 11 ກັນຍາ ປີ 2001. ເຫດການ​ໂຈມ​ຕີ​ກໍ່​ການ​ຮ້າຍ​ຄັ້ງ​ນັ້ນ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ​ເກືອບ 3.000 ຄົນ.

ຂ່າວທີ່ກ່ຽວຂ້ອງ