ດຶງເຊືອກຍິງລາວ ພ້ອມຮ່ວມຊີງແຊັມອາຊຽນ

1.009 12 ກ.ຍ. 2019 ວົງຈອນກີລາ
ດຶງເຊືອກຍິງລາວ ພ້ອມຮ່ວມຊີງແຊັມອາຊຽນ

    ທ່ານ ໄຕ­ລັດ ຕັ້ງ​ຈິດ​ພຸດ​ທະ​ວົງ ຮອງ​ປະ­ທານ​ສະ­ຫະ­ພັນ​ກີ­ລາ​ດຶງ­ເຊືອກ ແຫ່ງ​ຊາດ​ລາວ ໃຫ້​ຮູ້​ວ່າ: ຕາມ​ຄຳ​ເຊີນ​ຂອງ​ສະ­ຫະ­ພັນ​ດຶງ­ເຊືອກ​ແຫ່ງ​ອາ​ຊຽນ ເຊື້ອ​ເຊີນ​ມາ​ຍັງ​ສະ­ຫະ­ພັນ​ດຶງ​ເຊືອ​ແຫ່ງ​ຊາດ​ລາວ ເພື່ອ​ເຂົ້າ​ຮ່ວມ​ການ​ແຂ່ງ­ຂັນ​ນັກ­ກີ­ລາ​ດຶງ­ເຊືອກ ຊີງ​ແຊັມ​ອາ​ຊຽນ ປະ­ຈຳ​ປີ 2019 ຢູ່​ແຂວງ​ອາ​ຍຸດ​ທະ​ຍາ ປະ­ເທດ​ໄທ ເປັນ​ເຈົ້າ­ພາບ ລະ­ຫວ່າງ​ວັນ​ທີ 13-16 ກັນ­ຍາ ນີ້.

    ການ​ແຂ່ງ­ຂັນ​ຄັ້ງ​ນີ້ ມີ​ນັກ­ກີ­ລາ​ດຶງ­ເຊືອກ​ລະ­ດັບ​ອາ​ຊຽນ​ເຂົ້າ​ຮ່ວມ​ທັງ​ໝົດ 7 ປະ­ເທດ ປະ­ກອບ​ມີ: ສປປ ລາວ ກຳ­ປູ­ເຈຍ ມຽນ​ມາ ມາ​ເລ​ເຊຍ ບຣູ​ໄນ ຕີ​ມໍ ເລ​ສ​ເຕ ຟິ​ລິບ​ປິນ ແລະ ໄທ ເຈົ້າ­ພາບ ເຊິ່ງ ຮູບ​ແບບ​ການ​ແຂ່ງ­ຂັນ​ແມ່ນ​ພົບ​ກັນ​ໝົດ ເພື່ອ​ຄັດ​ເລືອກ​ເອົາ​ທີມ​ທີ່​ມີ​ຄະ­ແນນ​ດີ​ທີ່​ສຸດ (ອັນ​ດັບ 1-2 ເຂົ້າ ໄປ​ຊີງ​ຊະ­ນະ​ເລີດ).

    ສຳ­ລັບ​ການ​ເຝິກ­ຊ້ອມ​ຂອງ​ນັກ­ກີ­ລາ​ຍິງ​ທີມ​ຊາດ​ລາວ ແມ່ນ​ເຝິກ­ຊ້ອມ​ມາ​ຢ່າງ​ຕໍ່​ເນື່ອງ​ຕັ້ງ­ແຕ່​ເດືອນ​ມິ­ຖຸ­ນາ 2019 ເປັນ­ຕົ້ນ​ມາ ຢູ່​ໂຮງ­ຮຽນ​ມັດ­ທະ­ຍົມ​ສຶກ​ສາ​ສົມ­ບູນ​ວຽງ​ຈັນ (ມສ ວຽງ​ຈັນ) ແລະ ໄດ້​ມີ ການ​ພັດ­ທະ­ນາ​ລະ­ບົບ​ການ​ເຝິກ­ຊ້ອມ​ທີ່​ເຂັ້ມ­ແຂງ ນອກ­ຈາກ​ນີ້ ຍັງ​ມີ​ນັກ­ກີ­ລາ​ທີມ​ຊາດ​ຍິງ​ຊຸດ​ເກົ່າ ເຂົ້າ ມາ​ສົມ­ທົບ​ອີກ​ຈຳ­ນວນ 6 ຄົນ ເຊິ່ງ​ປັດ­ຈຸ­ບັນ ນັກ­ກີ­ລາ​ພວກ​ເຮົາ​ມີ​ຄວາມ​ພ້ອມ​ເກືອບ 100% ແລະ ພວກ​ເຮົາ​ຈະ​ສູ້​ຊົນ​ພາ​ນັກ­ກີ­ລາ​ເຂົ້າ​ໄປ​ຫຼິ້ນ​ໃນ​ຮອບ​ຊີງ​ຊະ­ນະ​ເລີດ​ໃຫ້​ໄດ້.

ຂ່າວທີ່ກ່ຽວຂ້ອງ