ຂ່າວຫຼ້າສຸດ

ມີ​ຜູ້​ເສຍ​ຊີວິດ​ຫຼາຍ​ສິບ​ຄົນ​ຈາກ​ເຫດການ​ຢຽບ​ກັນ​ຢູ່​ໃນ​ອີຣັກ

269 12 ກ.ຍ. 2019 ຂ່າວຕ່າງປະເທດ
ມີ​ຜູ້​ເສຍ​ຊີວິດ​ຫຼາຍ​ສິບ​ຄົນ​ຈາກ​ເຫດການ​ຢຽບ​ກັນ​ຢູ່​ໃນ​ອີຣັກ

    ກະຊວງ​ສາທາລະນະ​ສຸກ​ອີ​ຣັກ ແຈ້ງ​ໃຫ້​ຮູ້ເມື່ອ​ວັນ​ທີ 10 ກັນຍາ​ນີ້​ວ່າ ມີ​ຜູ້​ເສຍ​ຊີວິດ​ຢ່າງ​ໜ້ອຍ 31 ຄົນ ແລະ ບາດເຈັບ​ອີກ​ປະມານ 100 ຄົນ ​ຈາກ​ເຫດການ​ຢຽບ​ກັນ​ຢູ່​ໃນ​ວິຫານ​ແຫ່ງ​ໜຶ່ງ ໃນ​ນະຄອນ ຄາ​ບາ​ລາ (ທາງ​ທິດໃຕ້​ນະຄອນຫຼວງ​ແບກ​ແດດ) ຊຶ່ງ​ເກີດ​ຂຶ້ນ​ໃນ​ຂະນະ​ທີ່​ຜູ້​ຄົນ​ຈຳນວນ​ຫຼາຍ ເຂົ້າ​ຮ່ວມ​ເທດສະການ ອາ​ຊູ​ຣູ (Ashuru).

    ໂຄສົກ​ຂອງ​ກະຊວງ​ສາທາລະນະ​ສຸກ​ອີ​ຣັກ ແຈ້ງ​ໃຫ້​ຮູ້​ວ່າ ເຫດການ​ດັ່ງກ່າວ​ເກີດ​ຂຶ້ນ​ຢູ່​ໃນ​ວິຫານ ອີ​ມາມ ຮຸ​​ສ​ເຊນ ໃນ​ນະຄອນ ຄາ​ບາ​ລາ ຫ່າງ​ຈາກ​ນະຄອນຫຼວງ​ແບກ​ແດດ 100 ​ກມ ໄປ​ທາງ​ທິດໃຕ້ ໂດຍ​ເກີດ​ຂຶ້ນ​ໃນ​ຂະນະ​ທີ່​ຊາວ​ມຸ​ສລິມ ນິກາຍ​ຊີ​ໄອ ຈຳນວນ​ຫຼາຍ​ພັນ​ຄົນ ພະຍາຍາມ​ແຫຍ່​ເຂົ້າ​ໄປ​ໃນ​ວິຫານ​ດັ່ງ​ຫ່າວ.

    ໃນ​ຊຸມ​ມື້ນີ້ ຊາວ​ມຸ​ສລິມ ນິກາຍ​ຊີ​ໄອ ໃນ​ທົ່ວ​ໂລກ ພາກັນ​ໄປ​ສະແຫວງ​ບຸນ​ຢູ່​ທີ່​ນະຄອນ​ຄາ​ບາ​ລາ ເພື່ອ​ລ້ຳ​ລຶກ​ເຖິງ​ການ​ຕາຍ​ຂອງ ອີ​ມາມ ຮຸ​​ສ​ເຊນ ຜູ້​ເປັນ​ຫຼາຍ​ຊາຍ​ຂອງ​ພະ​ສາດສະດາ ມໍ​ຮາມ​ເມັດ.

   ຢ້ອນ​ຄືນ​ຫຼັງ ເມື່ອ​ປີ 2005 ກໍ​ໄດ້​ເກີດ​ເຫດການ​ຢຽບ​ກັນ​ຕາຍ​ເກີດ​ຂຶ້ນ ຫຼັງ​ຈາກ​ທີ່​ມີ​ຂ່າວ​ລື​ກ່ຽວ​ກັບ​ມື​ວາງ​ລະເບີດ​ສະລະ​ຊີບ ຢູ່​ໃນ​ພິທີກຳ​ທາງ​ສາສະໜາ​ລາຍ​ໜຶ່ງ ທີ່​ວິຫານ ອີ​ມາມ ຄາ​ດິມ ໃນ​ນະຄອນຫຼວງ​ແບກ​ແດດ ສົ່ງ​ຜົນ​ໃຫ້​ຜູ້​ທີ່​ໄປ​ສະແຫວງ​ບຸນ​ເສຍ​ຊີວິດ​ຢ່າງ​ໜ້ອຍ 965 ຄົນ.

ຂ່າວທີ່ກ່ຽວຂ້ອງ