ທະນາຄານເອັສທີ ໄດ້ຮັບການຍ້ອງຍໍຈາກຜົນງານດີເດັ່ນ

269 12 ກ.ຍ. 2019 ຂ່າວໜ້າ​ໜຶ່ງ
ທະນາຄານເອັສທີ ໄດ້ຮັບການຍ້ອງຍໍຈາກຜົນງານດີເດັ່ນ

    ພິ­ທີ​ຍ້ອງ­ຍໍ​ຜົນ­ງານ​ທະ­ນາ­ຄານ​ເອັສ​ທີ​ຈຳ­ກັດ (ທອທ) ໂອ­ກາດ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ທະ­ນາ­ຄານ​ແຫ່ງ ສປປ ລາວ ຄົບ­ຮອບ 50 ປີ ຈັດ​ຂຶ້ນ​ວັນ​ທີ 7 ກັນ­ຍາ 2019 ຢູ່​ສຳ­ນັກ­ງານ​ໃຫຍ່ ທອທ ມີ​ທ່ານ ສອນ​ໄຊ ສິດ​ພະ​ໄຊ ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ທ່ານ ໄຊ​ຍາ ໄຊ​ສຸ​ລິ​ວົງ ຮອງ​ປະ­ທານ​ສະ­ພາ​ບໍ­ລິ­ຫານ ທອທ ພ້ອມ​ດ້ວຍ​ຄະ­ນະ​ອຳ­ນວຍ​ການ ພະ­ນັກ­ງານ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.  

    ທ່ານ ບົວ​ສອນ ບຸນ​ເຮືອງ​ຮຸ່ງ ຮອງ​ຜູ້­ອຳ­ນວຍ­ການ ທອທ ກ່າວ​ວ່າ: ທອທ ສ້າງ­ຕັ້ງ​ວັນ​ທີ 22 ພຶດ ສະ­ພາ 2009 ໄດ້​ເຄື່ອນ​ໄຫວ​ທຸ­ລະ​ກິດ​ເຕັມ​ຮູບ​ແບບ​ໃນ​ຮູບ​ແບບ​ບໍ­ລິ­ສັດ​ລົງ­ທຶນ​ໂດຍ​ນັກ­ທຸ­ລະ­ກິດ​ພາຍ​ໃນ 100% ວັນ​ທີ 3 ກໍ­ລະ­ກົດ 2009 ມີ​ສຳ­ນັກ­ງານ​ໃຫຍ່​ຕັ້ງ​ຢູ່​ບ້ານ​ເມືອງ​ວາ​ທ່າ ເມືອງ​ສີ​ໂຄດ​ຕະ­ບອງ ນະ­ຄອນ ຫຼວງ​ວຽງ​ຈັນ ໄລ­ຍະ​ຜ່ານ​ມາ ທອທ ໄດ້​ປະ­ຕິ­ບັດ​ພາ­ລະ​ບົດ­ບາດ​ລະ­ດົມ​ທຶນ​ປ່ອຍ​ສິນ​ເຊື່ອ​ສະ­ໜອງ​ຜະ­ລິດ​ຕະ​ພັນ​ການ​ທະ­ນາ­ຄານ​ໃຫ້​ສັງ­ຄົມ​ດ້ວຍ​ຫຼາຍ​ຮູບ​ແບບ​ເປັນ​ລະ­ບົບ ແລະ ເງື່ອນ­ໄຂ​ເໝາະ​ສົມ​ເຊິ່ງ​ໄດ້​ດຶງ​ດູດ​ເອົາ​ອົງ​ການ­ຈັດ­ຕັ້ງ​ພັກ-ລັດ ເອ­ກະ​ຊົນ ປະ­ຊາ­ຊົນ​ມາ​ນຳ​ໃຊ້​ບໍ­ລິ­ການ​ອັນ​ທັນ​ສະ­ໄໝ​ຢ່າງ​ປະ​ທັບ​ໃຈ​ດ້ວຍ​ທ່າ­ແຮງ​ອັນ​ໂດດ​ເດັ່ນ ພາຍ​ໃຕ້​ຄຳ​ຂວັນ: ‘‘ໝັ້ນ­ຄົງ ໂປ່ງ​ໃສ ບໍ­ລິ­ການ​ດ້ວຍ​ຫົວ­ໃຈ ຮັບ​ໃຊ້​ສັງ­ຄົມ’’ ເຮັດ​ໃຫ້ ທອທ ເຕີບ​ໃຫຍ່​ຂະ­ຫຍາຍ­ຕົວ​ດ້ານ​ປະ­ລິ­ມານ ແລະ ຄຸນ​ນະ​ພາບ ມີ​ຄວາມ​ໝັ້ນ­ຄົງ ສາ­ມາດ​ສະ­ໜອງ​ທຶນ​ໃຫ້​ລູກ​ຄ້າ​ພາຍ​ໃນ ແລະ ຕ່າງ­ປະ­ເທດ​ຢ່າງ​ພຽງ­ພໍ ຍອດ​ຊັບ​ສິນ-ໜີ້​ສິນ​ປີ 2009 ມີ 244 ຕື້​ກີບ ປີ 2015 ມີ 2.528 ຕື້​ກີບ ເພີ່ມ​ຂຶ້ນ 2.284 ຕື້​ກີບ ຍອດ​ເງິນ​ຝາກ 145 ຕື້​ກີບ ປະ­ຕິ­ບັດ​ໄດ້ 2.073 ຕື້​ກີບ ເພີ່ມ​ຂຶ້ນ 1.928 ຕື້​ກີບ ຍອດ​ເງິນ​ກູ້ 49 ຕື້​ກີບ ປະ­ຕິ­ບັດ​ໄດ້ 1.420 ຕື້​ກີບ ເພີ່ມ​ຂຶ້ນ 1.371 ຕື້​ກີບ ກຳ­ໄລ​ກ່ອນ​ອາ­ກອນ​ປີ 2009 ຂາດ­ທຶນ 4,33 ຕື້​ກີບ ປີ 2015 ປະ­ຕິ­ບັດ​ໄດ້ 30,7 ຕື້​ກີບ ບຸ​ຄະ­ລາ​ກອນ​ເພີ່ມ​ຂຶ້ນ​ຈາກ 31 ຄົນ ປີ 2009 ເປັນ 371 ຄົນ ປີ 2015 ໄດ້​ຂະ­ຫຍາຍ​ຈາກ​ສຳ­ນັກ­ງານ​ໃຫຍ່ 1 ແຫ່ງ 5 ໜ່ວຍ​ບໍ­ລິ­ການ ປີ 2009 ເປັນ 4 ສາ­ຂາ 28 ໜ່ວຍ​ບໍ­ລິ­ການ ປີ 2016 ນອກ​ນີ້ ຍັງ​ໄດ້​ເອົາ­ໃຈ­ໃສ່​ຊ່ວຍ­ເຫຼືອ​ສັງ­ຄົມ ມູນ​ຄ່າ 1,75 ຕື້​ກີບ.

    ດ້ວຍ​ຜົນ­ງານ​ການ​ປະ­ກອບ­ສ່ວນ​ປົກ​ປັກ​ຮັກ­ສາ ແລະ ສ້າງ­ສາ​ປະ­ເທດ​ຊາດ ທອທ ຈຶ່ງ​ໄດ້​ຮັບ​ການ​ຍ້ອງ­ຍໍ​ລະ­ດັບ​ຕ່າງໆ ເຊັ່ນ: ສົກ​ປີ 2013-2014 ໄດ້​ຖືກ​ຮັບ­ຮອງ​ເປັນ​ໜ່ວຍ​ພັກ ສົກ​ປີ 2014-2015 ເປັນ​ໜ່ວຍ​ພັກ​ເຂັ້ມ­ແຂງ ແລະ ສົກ​ປີ 2015-2016 ເປັນ​ໜ່ວຍ​ພັກ​ເຂັ້ມ­ແຂງ-ຮູ້​ນຳ­ພາ​ຮອບ­ດ້ານ ນອກ​ນີ້ ຍັງ​ໄດ້​ຮັບ​ຫຼຽນ​ໄຊ​ແຮງ​ງານ​ຊັ້ນ III ງານ​ສະ­ເຫຼີມ­ສະ­ຫຼອງ​ວຽງ​ຈັນ​ຄົບ­ຮອບ 450 ປີ ຫຼຽນ​ໄຊ​ແຮງ​ງານ​ຊັ້ນ II ປະ­ກອບ­ສ່ວນ​ກອງ​ປະ­ຊຸມ​ໃຫຍ່​ຄັ້ງ​ທີ IX ຂອງ​ພັກ ຫຼຽນ​ໄຊ​ພິ­ລະ​ອາດ​ຫານ​ຊັ້ນ III ວຽກ​ງານ​ກໍ່­ສ້າງ​ຮາກ​ຖານ​ການ­ເມືອງ​ພັດ­ທະ­ນາ​ຊົນ­ນະ­ບົດ​ຮອບ­ດ້ານ ຕິດ​ພັນ​ກັບ​ວຽກ​ງານ​ສາມ​ສ້າງ 5 ປີ ຄັ້ງ​ທີ IV ຫຼຽນ​ໄຊ​ພິ­ລະ​ອາດ​ຫານ​ຊັ້ນ II ປະ­ກອບ­ສ່ວນ​ກອງ​ປະ­ຊຸມ​ລັດ­ຖະ­ມົນ­ຕີ​ປ້ອງ​ກັນ​ປະ­ເທດ​ອາ​ຊຽນ ຄັ້ງ​ທີ 10 ສຳ­ລັບ​ການ​ຍ້ອງ­ຍໍ​ຄັ້ງ​ນີ້​ໄດ້​ປະ­ດັບ​ຫຼຽນ​ໄຊ​ແຮງ​ງານ ຊັ້ນ III ໃຫ້​ກົມ​ກອງ ຫຼຽນ​ໄຊ​ແຮງ​ງານ ຊັ້ນ II ໃຫ້ 2 ທ່ານ ຫຼຽນ​ໄຊ​ແຮງ​ງານ ຊັ້ນ III ໃຫ້ 1 ທ່ານ ຫຼຽນ​ກາ​ທີ່​ລະ­ນຶກ 50 ປີ 7 ທ່ານ ໃບ​ຍ້ອງ­ຍໍ ແລະ ໃບ​ຊົມ­ເຊີຍ​ຂັ້ນ​ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ຈຳ­ນວນ​ໜຶ່ງ.

ຂ່າວທີ່ກ່ຽວຂ້ອງ