ລາວ-ລຸກຊຳບວກ ສືບຕໍ່ຮ່ວມມືໂຄງການຍົກສູງຄຸ້ມຄອງການຊ່ວຍເຫຼືອ

353 12 ກ.ຍ. 2019 ຂ່າວໜ້າ​ໜຶ່ງ
ລາວ-ລຸກຊຳບວກ ສືບຕໍ່ຮ່ວມມືໂຄງການຍົກສູງຄຸ້ມຄອງການຊ່ວຍເຫຼືອ

    ກອງ​ປະ­ຊຸມ​ຄະ­ນະ​ກຳ­ມາ​ທິ​ການ​ຮ່ວມ​ມື​ລະ­ຫວ່າງ​ລັດ­ຖະ­ບານ​ລາວ ແລະ ລຸກ​ຊຳ​ບວກ ຄັ້ງ​ທີ 12 ຈັດ​ຂຶ້ນ​ວັນ​ທີ 11 ກັນ­ຍາ 2019 ຢູ່​ນະ­ຄອນ­ຫຼວງ​ວຽງ​ຈັນ ຝ່າຍ​ລາວ​ນຳ​ໂດຍ​ທ່ານ ສຸ­ພັນ ແກ້ວ​ມີ​ໄຊ ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ແລະ ຝ່າຍ​ລຸກ​ຊຳ​ບວກ​ນຳ​ໂດຍ​ທ່ານ​ນາງ Paulette Lenert ລັດ­ຖະ­ມົນ­ຕີ​ກະ­ຊວງ​ຮ່ວມ​ມື​ເພື່ອ​ການ​ພັດ­ທະ­ນາ ແລະ ມະ­ນຸດ­ສະ­ທຳ ເພື່ອ​ທົບ​ທວນ​ຄວາມ​ຄືບ​ໜ້າ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ໂຄງ­ການ​ຕ່າງໆ​ສົກ​ປີ 2018-2019 ແລະ ແຜນ­ການ​ຮ່ວມ​ມື​ໄລ­ຍະ​ຍາວ ຄັ້ງ​ທີ IV ປີ 2016-2020.

    ນັບ​ແຕ່​ສ້າງ­ຕັ້ງ​ສາຍ​ພົວ­ພັນ​ທາງ​ການ​ທູດ ແລະ ການ​ຮ່ວມ​ມື​ກັບ​ລຸກ​ຊຳ​ບວກ​ປີ 1997 ເປັນ­ຕົ້ນ​ມາ ລາວ​ເຮົາ​ໄດ້​ກາຍ­ເປັນ​ປະ­ເທດ​ບຸ­ລິ­ມະ­ສິດ​ທີ່​ໄດ້​ຮັບ​ການ​ຊ່ວຍ­ເຫຼືອ​ທາງ​ການ ເພື່ອ​ການ​ພັດ­ທະ­ນາ​ຂອງ​ລຸກ​ຊຳ​ບວກ ເຊິ່ງ​ມາ​ຮອດ​ແຜນ­ການ​ຮ່ວມ​ມື​ໄລ­ຍະ​ຍາວ​ລາວ-ລຸກ​ຊຳ​ບວກ ຄັ້ງ​ທີ IV ມີ​ງົບ­ປະ­ມານ 75 ລ້ານ​ເອີ​ໂຣ ຫຼື ປະ­ມານ 727 ຕື້​ກີບ ໂດຍ​ສຸມ​ໃສ່​ຂົງ­ເຂດ​ສາ­ທາ­ລະ­ນະ​ສຸກ ພັດ­ທະ­ນາ​ຊົນ­ນະ­ບົດ ອາ­ຊີ­ວະ​ສຶກ​ສາ ຂະ­ແໜງ​ທ່ອງ​ທ່ຽວ-ການ​ໂຮງ­ແຮມ ແລະ ການ​ປົກ­ຄອງ ໃນ​ນີ້ ລຸກ​ຊຳ​ບວກ​ເປັນ​ໜຶ່ງ​ໃນ​ປະ­ເທດ​ຄູ່​ຮ່ວມ​ພັດ­ທະ­ນາ​ທີ່​ສຳ­ຄັນ​ຂອງ​ລາວ ເຊິ່ງ​ໄດ້​ມີ​ພາ­ລະ​ບົດ­ບາດ ນຳ​ໜ້າ​ໃນ​ແຜນ​ງານ​ຮ່ວມ​ສະ­ຫະ­ພາບ​ເອີ​ຣົບ​ສຳ­ລັບ​ລາວ​ພ້ອມ​ທັງ​ເປັນ​ປະ­ທານ​ຮ່ວມ​ໃນ​ໜ່ວຍ​ງານ​ຍ່ອຍ ຂະ­ແໜງ​ພັດ­ທະ­ນາ​ຊົນ­ນະ­ບົດ.

    ໃນ​ການ​ແລກ­ປ່ຽນ​ທາງ​ດ້ານ​ນະ­ໂຍ­ບາຍ ສອງ​ຝ່າຍ​ໄດ້​ປຶກ­ສາ​ຫາ­ລື​ກ່ຽວ​ກັບ​ການ​ຮ່ວມ​ມື​ເພື່ອ​ການ​ພັດ­ທະ­ນາ ການ​ເສີມ​ຂະ­ຫຍາຍ​ສາຍ​ພົວ­ພັນ ຄວາມ​ຄືບ​ໜ້າ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຄັ້ງ​ທີ VIII ປີ 2016-2020 ແລະ ການ​ຫຼຸດ​ພົ້ນ​ອອກ​ຈາກ​ສະ­ພາບ​ປະ­ເທດ​ດ້ອຍ​ພັດ­ທະ­ນາ​ຂອງ​ລາວ ກອງ​ປະ­ຊຸມ​ໄດ້​ຍົກ​ໃຫ້​ເຫັນ​ຜົນ­ສຳ­ເລັດ​ຫຼາຍ​ດ້ານ​ຂອງ​ແຜນ­ການ​ຮ່ວມ​ມື ລາວ-ລຸກ​ຊຳ​ບວກ ເຊິ່ງ​ສອງ​ຝ່າຍ​ໄດ້​ປະ­ກອບ­ສ່ວນ ແລະ ປະ­ຕິ­ບັດ​ພັນ ທະ​ຂອງ​ຕົນ​ຢ່າງ​ເຕັມ​ສ່ວນ​ໃນ​ຂົງ­ເຂດ​ການ​ຮ່ວມ​ມື​ດັ່ງ­ກ່າວ ໄດ້​ສະ­ໜັບ­ສະ­ໜູນ​ຢ່າງ​ຕັ້ງ­ໜ້າ​ເຂົ້າ​ໃນ​ການ­ຈັດ­ຕັ້ງ​ປະ­ຕິ ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຢູ່​ລາວ ໂດຍ​ຜ່ານ​ແຜນ​ງານ​ໂຄງ­ການ​ຮ່ວມ​ມື​ສອງ​ຝ່າຍ ຫຼາຍ​ຝ່າຍ ແລະ ການ​ຮ່ວມ​ມື​ພາກ​ພື້ນ ພ້ອມ​ທັງ​ຜ່ານ​ທາງ​ອົງ​ການ­ຈັດ­ຕັ້ງ​ທີ່​ບໍ່​ສັງ­ກັດ​ລັດ­ຖະ­ບານ ແລະ ການ​ຊ່ວຍ­ເຫຼືອ​ດ້ານ​ມະ­ນຸດ­ສະ­ທຳ.

    ກອງ​ປະ­ຊຸມ​ຍັງ​ໄດ້​ຮ່ວມ​ກັນ​ລົງ​ນາມ​ສັນ­ຍາ 3 ສະ­ບັບ ຄື: ໂຄງ­ການ​ຍົກ​ສູງ​ປະ​ສິດ­ທິ​ຜົນ​ໃຫ້​ແກ່​ວຽກ​ງານ​ຄຸ້ມ​ຄອງ​ການ​ຊ່ວຍ­ເຫຼືອ​ທາງ​ການ ເພື່ອ​ການ​ພັດ­ທະ­ນາ (ລາວ/033) ມູນ​ຄ່າ 1,3 ລ້ານ​ເອີ​ໂຣ ຫຼື ປະ­ມານ 12 ຕື້​ກີບ ໄລ­ຍະ​ການ­ຈັດ­ຕັ້ງ​ປະ­ຕິ­ບັດ 4 ປີ (2019-2022) ສັນ­ຍາ​ເງິນ​ເພີ່ມ​ໃຫ້​ແກ່​ໂຄງ­ການ​ຄຸ້ມ​ຄອງ​ການ­ຈັດ­ຕັ້ງ​ປະ­ຕິ­ບັດ​ແຜນ​ງານ​ພັດ­ທະ­ນາ​ທ້ອງ­ຖິ່ນ (ລາວ/030) ມູນ​ຄ່າ 6.996.439 ເອີ​ໂຣ ຫຼື ປະ­ມານ 67 ຕື້​ກີບ ແລະ ໂຄງ­ການ​ສະ­ໜັບ­ສະ­ໜູນ​ຂະ­ແໜງ​ສາ­ທາ­ລະ­ນະ​ສຸກ (ລາວ/027) ມູນ​ຄ່າ 3,5 ລ້ານ​ເອີ​ໂຣ ຫຼື ປະ­ມານ 33 ຕື້​ກີບ.

ຂ່າວທີ່ກ່ຽວຂ້ອງ