...ເອົານໍ້າໃຈໄລ່ນໍ້າຖ້ວມ...

6.259 13 ກ.ຍ. 2019 ນານາສາລະ

    ຕົກ​ຢູ່​ໃນ​ສະ­ພາບ​ເສດ­ຖະ­ກິດ​ຝືດ­ເຄືອງ​ຍັງ​ບໍ່​ແລ້ວ ແຕ່​ຜັດ​ມາ​ຖືກ​ນ້ຳ​ຖ້ວມ​ອີກ ແລະ ບາງ​ບ່ອນ​ແມ່​ຄ້າ​ຊາວ​ຂາຍ​ຜັດ​ມາ​ສວຍ­ໂອ­ກາດ​ຂຶ້ນ​ລາ­ຄາ​ສິນ­ຄ້າ ໝາກ­ເຜັດ ປາ­ແດກ ແປ້ງ​ນົວ... ນີ້​ຄື​ສະ­ພາບ​ແລ້ງ​ນ້ຳ­ໃຈ​ຂອງ​ຄົນ​ຄ້າ­ຂາຍ.

    ຜູ້​ຂຽນ​ຄິດ​ວ່າ: ຢູ່​ໃນ​ສະ­ພາບ​ອັດ­ຕະ­ຄັດ​ຝືດ­ເຄືອງ​ແບບ​ນີ້ ​ຫຼຽວ​ເຫັນ​ພຽງ​ແຕ່​ນ້ຳ­ໃຈ​ໂອບ​ເອື້ອ​ອາ­ລີ​ເທົ່າ​ນັ້ນ ທີ່​ຈະ​ຢຶດ​ໜ່ຽວ​ໃຫ້​ຄົນ​ລາວ​ຮັກ­ຫອມ​ກັນ​ໄວ້ ເຊິ່ງ​ພະ­ພຸດ­ທະ­ເຈົ້າ​ໄດ້​ສອນ​ໄວ້ 4 ປະ­ການ.

    ຫຼັກ​ທຳ​ມະ​ທີ່​ຄົນ​ລາວ​ຕ້ອງ​ໄດ້​ນຳ​ມາ​ປະ­ຕິ­ບັດ ບໍ່​ວ່າ​ຍາມ​ສະ­ຫງົບ ຫຼື ຝືດ­ເຄືອງ ເອີ້ນ​ວ່າ: ຫຼັກ​ສົງ­ເຄາະ 4 ປະ­ການ ເຊິ່ງ​ພະ­ພຸດ­ທະ­ເຈົ້າ​ໄດ້​ເນັ້ນ​ສອນ​ໃຫ້​ມະ­ນຸດ​ຮູ້­ຈັກ​ຮັກ­ແພງ​ແບ່ງ­ປັນ​ນ້ຳ­ໃຈ ແລະ ຊ່ວຍ­ເຫຼືອ​ທາງ​ດ້ານ​ວັດ­ຖຸ ລະ­ຫວ່າງ​ຄົນ​ມີ​ກັບ​ຄົນ​ຈົນ ຄື: 1. ທານ ຄື: ການ​ໃຫ້​ຊ່ວຍ­ເຫຼືອ​ແບ່ງ­ປັນ​ດ້ວຍ​ວັດ­ຖຸ​ສິ່ງ​ຂອງ​ໃນ​ຍາມ​ຂາດ­ເຂີນ 2. ປິ­ຍະ​ວາ­ຈາ ຄື: ການ​ເວົ້າ​ຈາ​ສຸ­ພາບ​ອ່ອນ­ໂຍນ ເປັນ​ການ​ປຸກ​ປອບ​ໃຈ​ໃນ​ຍາມ​ເກີດ​ວິ​ກິດ ທັງ​ຜູ້​ເວົ້າ ແລະ ຜູ້​ໄດ້​ຟັງ​ກໍ​ຈະ​ຮູ້­ສຶກ​ມີ​ກຳ­ລັງ​ໃຈ ຖ້າ­ວ່າ​ຄຳ​ເວົ້າ​ຈາ​ອ່ອນ­ໂຍນ​ເກີດ​ຈາກ​ຜູ້​ມີ​ນຳ​ໃຈ​ເສຍ­ສະ­ຫຼະ 3. ອັດ­ຖະ​ຈະ­ລິ­ຍາ ຄື: ການ​ປະ­ພຶດ​ໃຫ້​ເກີດ​ປະ­ໂຫຍດ ເຊັ່ນ: ຂົນ­ຂວາຍ​ຊ່ວຍ­ເຫຼືອ ເພື່ອນ​ມະ­ນຸດ​ດ້ວຍ​ກັນ​ໃນ​ຍາມ​ປະ­ສົບ​ໄພ​ນ້ຳ​ຖ້ວມ 4. ສະ​ມາ­ນັດ​ຕະ​ຕາ ຄື: ມີ​ຕົນ​ສະ­ເໝີ​ຕົ້ນ​ສະ­ເໝີ​ປາຍ ໝາຍ​ຄວາມ​ວ່າ ອະ​ດິດ​ເປັນ​ແນວ­ໃດ ປັດ­ຈຸ­ບັນ​ກໍ​ແນວ​ນັ້ນ ຫຼື ວ່າ​ຕໍ່­ໜ້າ ແລະ ລັບ­ຫຼັງ​ກໍ​ອັນ​ດຽວ​ກັນ.

    ຫຼັກ​ທຳ​ມະ​ທີ່​ເປັນ​ຫຼັກ​ສັງ­ຄົມ​ສົງ­ເຄາະ 4 ປະ­ການ​ນີ້ ສາ­ມາດ​ເປັນ​ຫຼັກ­ການ​ໃຫ້​ຄົນ​ທົ່ວ​ສັງ­ຄົມ​ຢຶດ​ຖື​ປະ­ຕິ­ບັດ​ສະ­ໝານ​ສາ­ມັກ­ຄີ​ກັນ​ໄວ້ ເພາະ​ເຮົາ​ສາ­ມາດ​ສັງ­ເກດ​ໄດ້​ວ່າ ການ​ສອນ​ໃຫ້​ຄົນ​ປະ­ພຶດ​ຕົນ​ສະ­ເໝີ​ຕົ້ນ​ສະ­ເໝີ​ປາຍ​ນັ້ນ ສະ­ແດງ​ອອກ​ຫຼາຍ​ດ້ານ ເຊັ່ນ: ບາງ​ຄົນ​ບໍ່​ຄວນ​ສວຍ­ໂອ­ກາດ​ຂຶ້ນ​ລາ­ຄາ​ສິນ­ຄ້າ​ໃນ​ຍາມ​ມີ​ໄພ ເປັນ​ການ​ຂາດ​ນ້ຳ­ໃຈ ຂາດ​ຄຸນ​ນະ​ທຳ​ຄວາມ​ເປັນ​ມະ­ນຸດ ຫຼຸດ​ນ້ອຍ​ຖອຍ​ລົງ ການ​ສອນ​ໃຫ້​ມີ​ນ້ຳ­ໃຈ​ແບ່ງ­ປັນ​ວັດ­ຖຸ​ສິ່ງ​ຂອງ​ດ້ວຍ​ນ້ຳ­ໃຈ​ເສຍ­ສະ­ຫຼະ ເຊິ່ງ​ເຫັນ​ວ່າ ຫຼັກ​ທຳ​ມະ 4 ປະ­ການ​ນີ້​ຄົນ​ລາວ​ເຮົາ​ຈະ​ສາ­ມາດ​ຄິດ​ຂຶ້ນ​ມາ​ໄດ້​ວ່າ ຕົນ​ເອງ​ເປັນ​ຊາວ​ພຸດ ບໍ່​ຫຼົງ​ສວມ​ວິນ​ຍານ​ນັກ​ຄ້າ­ຂາຍ​ສວຍ­ໂອ­ກາດ.

    ສັງ​ລວມ​ວ່າ: ຕົກ​ໃນ​ສະ­ພາບ​ປະ­ສົບ​ໄພ​ຕ່າງໆ​ນັ້ນ ທາງ​ລັດ­ຖະ­ບານ ກໍ​ໄດ້​ປະ­ກາດ​ແຈ້ງ​ເຕືອນ​ແລ້ວ​ບໍ່​ໃຫ້​ຊາວ​ຄ້າ­ຂາຍ​ສວຍ­ໂອ­ກາດ​ຂຶ້ນ​ລາ­ຄາ​ສິນ­ຄ້າ ແຕ່​ຈະ​ໃຫ້​ຄັກ​ແທ້ ຝ່າຍ​ກ່ຽວ­ຂ້ອງ​ຄວນ​ລົງ​ຕິດ­ຕາມ​ໃນ​ຕະ­ຫຼາດ​ຕື່ມ ເພື່ອ​ຄວບ​ຄຸມ​ລາ­ຄາ​ໃຫ້​ປົກ­ກະ­ຕິ ສິ່ງ​ສຳ­ຄັນ​ສຸດ​ທ້າຍ​ກໍ​ແມ່ນ ນ້ຳ­ໃຈ​ເສຍ­ສະ­ຫຼະ​ແບ່ງ­ປັນ​ແກ່​ຜູ້​ຂາດ­ເຂີນ ປະ­ສົບ​ໄພ​ບໍ່​ໃຫ້​ພວກ​ຫົວ​ໃສ​ສວຍ­ໂອ­ກາດ ຕ້ອງ​ຊ່ວຍ​ກັນ​ຢ່າງ​ຈິງ​ໃຈ !.

ຂ່າວທີ່ກ່ຽວຂ້ອງ