ຂ່າວຫຼ້າສຸດ

ມຊ ສ້າງບຸຄະລາກອນອອກຮັບໃຊ້ສັງຄົມໄດ້ຫຼາຍລະດັບ

308 13 ກ.ຍ. 2019 ຂ່າວໜ້າ​ໜຶ່ງ
ມຊ ສ້າງບຸຄະລາກອນອອກຮັບໃຊ້ສັງຄົມໄດ້ຫຼາຍລະດັບ

    ວັນ​ທີ 9 ກັນ­ຍາ 2019 ຄະ­ນະ​ວິ­ທະ­ຍາ­ສາດ​ປ່າ­ໄມ້ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ຄປມ ມຊ) ໄດ້​ຈັດ​ພິ­ທີ​ສະ­ຫຼຸບ​ສົກ­ຮຽນ 2015-2019 ມີ​ທ່ານ ສົມ​ສີ ຍໍ​ພັນ​ໄຊ ອະ­ທິ­ການ​ບໍ­ດີ ມຊ ທ່ານ​ນາງ ລັດ­ສະ­ໝີ ບຸບ­ຜາ ຄະ­ນະ­ບໍ­ດີ ຄປມ ບັນ­ດາ​ຄະ­ນະ ຄະ­ນະ­ບໍ­ດີ ພະ­ນັກ­ງານ ຄູ-ອາ­ຈານ ແລະ ນັກ​ສຶກ​ສາ​ເຂົ້າ​ຮ່ວມ.

    ທ່ານ​ນາງ ລັດ­ສະ­ໝີ ບຸບ­ຜາ ໄດ້​ຂຶ້ນ​ຜ່ານ​ບົດ​ສະ­ຫຼຸບ​ເຫັນ​ວ່າ ຄປມ ໄດ້​ສ້າງ​ນັກ​ສຶກ​ສາ​ທີ່​ຮຽນ​ຈົບ​ຫຼັກ­ສູດ​ການ​ຮຽນ-ການ​ສອນ​ຂອງ ມຊ ໄດ້​ຫຼາຍ​ລະ­ດັບ ໃນ​ນີ້ ມີ​ນັກ​ສຶກ​ສາ​ທີ່​ສຳ­ເລັດ​ການ​ສຶກ​ສາ​ໃນ​ລະ­ດັບ​ປະ­ລິນ­ຍາ​ເອກ 6 ຄົນ ຍິງ 1 ຄົນ ລະ­ດັບ​ປະ­ລິນ­ຍາ​ໂທ 39 ຄົນ ຍິງ 11 ຄົນ ລະ­ດັບ​ປະ­ລິນ­ຍາ​ຕີ 192 ຄົນ ຍິງ 80 ຄົນ ນັກ​ສຶກ​ສາ​ລະ­ບົບ​ຕໍ່​ເນື່ອງ 76 ຄົນ ຍິງ 24 ຄົນ ແລະ ນັກ​ສຶກ​ສາ​ລະ­ດັບ​ອະ­ນຸ​ປະ­ລິນ­ຍາ 43 ຄົນ ຍິງ 19 ຄົນ ພິ­ເສດ ມີ​ນັກ​ສຶກ​ສາ​ທີ່​ໄດ້​ຮັບ​ປະ​ກາ​ສະ​ນິ​ຍະ​ບັດ​ແດງ (ກຽດ​ນິ­ຍົມ) 1 ຄົນ.

    ຕະ­ຫຼອດ​ໄລ­ຍະ​ສົກ­ຮຽນ 2015-2019 ຄປມ ໄດ້​ສ້າງ​ຜົນ­ງານ​ອັນ​ພົ້ນ​ເດັ່ນ​ຫຼາຍ​ດ້ານ ໂດຍ​ສະ ເພາະ​ວຽກ​ງານ​ການ​ຮຽນ-ການ​ສອນ​ອັນ​ໄດ້​ເຮັດ​ໃຫ້​ບົດ­ບາດ ແລະ ອິດ​ທິ​ພົນ​ຂອງ​ຄະ­ນະ​ວິ­ຊາ​ເປັນ​ທີ່​ຍອມ­ຮັບ​ໃນ​ລະ­ດັບ​ຊາດ ແລະ ສາ­ກົນ ເຊິ່ງ​ເຫັນ​ໄດ້​ເຖິງ​ຜົນ­ສຳ­ເລັດ​ຄື: ນັກ​ສຶກ​ສາ​ໄດ້​ຮັບ​ໃບ​ຍ້ອງ­ຍໍ​ດີ­ເດັ່ນ​ຮອບ­ດ້ານ 138 ຄົນ ໄດ້​ຮັບ​ໃບ​ຍ້ອງ­ຍໍ​ດີ­ເດັ່ນ​ດ້ານ​ການ​ຮຽນ 47 ຄົນ ໄດ້​ຮັບ​ໃບ​ຍ້ອງ­ຍໍ​ດີ­ເດັ່ນ​ທາງ​ດ້ານ​ກິດ­ຈະ­ກຳ 53 ຄົນ ພ້ອມ​ນັ້ນ ຍັງ​ມີ​ນັກ​ສຶກ​ສາ 21 ຄົນ ມີ​ຜົນ​ການ​ຮຽນ​ດີ-ຮຽນ​ເກ່ງ ໄດ້​ຮັບ​ທຶນ​ມຸນ​ນິ­ທິ​ການ​ສຶກ​ສາ ໃນ​ນັ້ນ ນັກ​ສຶກ​ສາ​ທີ່​ໄດ້​ຮັບ​ທຶນ ASIA 6 ຄົນ ໄດ້​ຮັບ​ທຶນ​ນາ​ກາ​ໂອະ 9 ຄົນ ໄດ້​ຮັບ​ທຶນ​ບໍ­ລິ­ສັດ ເບຍ​ລາວ 2 ຄົນ ໄດ້​ຮັບ​ທຶນ​ແລ່ນ 2 ຄົນ ໄດ້​ຮັບ​ທຶນ​ຈາກ​ສະ­ຖານ­ທູດ​ຈີນ 1 ຄົນ ແລະ ທຶນ​ຈາກ​ຫວຽດ­ນາມ 1 ຄົນ ນອກ​ນັ້ນ ຍັງ​ມີ​ຜົນ­ສຳ­ເລັດ​ຫຼາຍ​ດ້ານ ເປັນ­ຕົ້ນ ດ້ານ​ການ­ເມືອງ-ແນວ​ຄິດ​ວຽກ​ງານ​ທາງ​ດ້ານ​ວິ­ຊາ​ການ ການ­ເຄື່ອນ­ໄຫວ​ກິດ­ຈະ­ກຳ​ນອກ​ຫຼັກ­ສູດ ແລະ ອື່ນໆ.

    ນອກ​ນີ້ ວັນ​ທີ 6 ກັນ­ຍາ ຜ່ານ​ມາ ຄະ­ນະ​ວິ­ທະ­ຍາ­ສາດ​ທຳ​ມະ​ຊາດ (ຄວ​ທ ມຊ) ໄດ້​ຈັດ​ພິ­ທີ​ສະ­ຫຼຸບ​ສົກ​ສຶກ​ສາ 2015-2019 ແລະ ແຜນ​ສົກ​ສຶກ​ສາ 2019-2020 ມີ​ທ່ານ​ນາງ ສົມ​ຈັນ ບຸນ​ພັນ​ມີ ຮອງ​ອະ­ທິ­ການ​ບໍ­ດີ ມຊ ທ່ານ ບຸນ​ຜັນ ຕົ້ນ​ແພງ ຄະ­ນະ­ບໍ­ດີ​ຄະ­ນະ​ວິ­ທະ­ຍາ­ສາດ​ທຳ​ມະ​ຊາດ ພ້ອມ​ດ້ວຍ​ຄູ-ອາ­ຈານ ແລະ ນັກ​ສຶກ​ສາ​ເຂົ້າ​ຮ່ວມ.

    ໃນ​ສົກ​ສຶກ​ສາ 2018-2019 ຄວ​ທ ໄດ້​ສ້າງ​ບຸ​ຄະ­ລາ​ກອນ​ອອກ​ມາ​ຮັບ​ໃຊ້​ສັງ­ຄົມ​ໄດ້​ທັງ​ໝົດ 455 ຄົນ ຍິງ 174 ຄົນ ໃນ​ນັ້ນ ມີ​ນັກ​ສຶກ​ສາ​ທີ່​ໄດ້​ຮັບ​ປະ­ກາ­ສະ­ນີ­ຍະ­ບັດ​ກຽດ​ນິ­ຍົມ​ມີ 8 ຄົນ.

ຂ່າວທີ່ກ່ຽວຂ້ອງ