ຂ່າວຫຼ້າສຸດ

ສະຫວັນນະເຂດ ຈັດງານລະດົມທຶນຊ່ວຍເຫຼືອຜູ້ປະສົບໄພນ້ຳຖ້ວມ

215 13 ກ.ຍ. 2019 ຂ່າວໜ້າ​ໜຶ່ງ

    ແຂວງ​ສະ­ຫວັນ​ນະ​ເຂດ ໄດ້​ຈັດ​ງານ​ການ​ກຸ­ສົນ​ຮ່ວມ​ໃຈ​ຊ່ວຍ­ເຫຼືອ​ຜູ້​ປະ­ສົບ​ໄພ­ພິ­ບັດ​ນ້ຳ​ຖ້ວມ ທີ່​ແຂວງ​ສະ­ຫວັນ​ນະ​ເຂດ ຈັດ​ຂຶ້ນ​ໃນ​ວັນ​ທີ 11 ກັນ­ຍາ 2019 ຢູ່​ທີ່​ພັດ​ຕະ​ຄານ​ດາວ​ຮຸ່ງ 1 ນະ­ຄອນ​ໄກ­ສອນ ພົມ­ວິ­ຫານ ໂດຍ​ການ​ເຂົ້າ​ຮ່ວມ​ຂອງ​ທ່ານ ສັນ­ຕິ­ພາບ ພົມ­ວິ­ຫານ ເຈົ້າ­ແຂວງ​ສະ­ຫວັນ​ນະ​ເຂດ ພ້ອມ​ຄະ­ນະ ມີ​ບັນ­ດາ​ທ່ານ​ຫົວ­ໜ້າ​ພະ­ແນກ­ການ ແລະ ນັກ­ທຸ­ລະ­ກິດ​ຈາກ​ຫຼາຍ​ພາກ­ສ່ວນ​ເຂົ້າ​ຮ່ວມ.

    ທ່ານ ສັນ­ຕິ­ພາບ ພົມ­ວິ­ຫານ ໄດ້​ກ່າວ​ເປີດ​ງານ​ພ້ອມ​ທັງ​ລາຍ​ງານ​ສະ­ພາບ​ນ້ຳ​ຖ້ວມ​ຢູ່​ພາຍ​ໃນ​ແຂວງ​ສະ­ຫວັນ​ນະ​ເຂດ​ວ່າ ຍັງ​ມີ​ນ້ຳ​ຖ້ວມ​ສູງ​ຢູ່​ເຂດ​ເມືອງ​ສອງ​ຄອນ ຈຳ​ພອນ ແລະ ຊົນ​ນະ​ບູ​ລີ ເຮືອນ​ຊານ​ຂອງ​ປະ­ຊາ­ຊົນ​ຫຼາຍ​ຫຼັງ­ຄາ​ເຮືອນ​ຍັງ​ຈົມ​ຢູ່​ໃຕ້​ນ້ຳ ແລະ ຄາດ​ວ່າ​ຍັງ​ອີກ​ຫຼາຍ​ມື້​ກວ່າ​ທີ່​ນ້ຳ​ຈະ​ຫຼຸດ​ລົງ​ເຂົ້າ​ສູ່​ປົກ­ກະ­ຕິ ເຊິ່ງ​ຜົນ​ເສຍ​ຫາຍ​ຈາກ​ນ້ຳ​ຖ້ວມ​ໃນ​ຄັ້ງ​ນີ້ ມີ​ຜົນ​ກະ­ທົບ​ຕໍ່​ບ່ອນ­ຢູ່​ອາ­ໄສ​ມີ 10 ເມືອງ 165 ບ້ານ 13.736 ຄອບ­ຄົວ 30.637 ຄົນ ໃນ​ນັ້ນ ຕ້ອງ​ຍົກ­ຍ້າຍ​ປະ­ຊາ­ຊົນ​ອອກ​ໄປ​ຢູ່​ບ່ອນ​ທີ່​ປອດ​ໄພ​ມີ 81 ບ້ານ 7.433 ຄອບ­ຄົວ 27.252 ຄົນ ບາງ​ຄອບ­ຄົວ​ໄດ້​ສູນ​ເສຍ​ສະ­ມາ­ຊິກ​ໃນ​ຄອບ­ຄົວ ເສຍ​ຊີ­ວິດ 4 ຄົນ ຜົນ​ກະ­ທົບ​ຕໍ່​ເນື້ອ­ທີ່​ທຳ​ການ​ຜະ­ລິດ​ຂອງ​ປະ­ຊາ­ຊົນ​ໃນ 14 ເມືອງ 1 ນະ­ຄອນ ມີ 463 ບ້ານ 34.910 ຄອບ­ຄົວ ເນື້ອ­ທີ່​ນາ­ປີ​ຖືກ​ນ້ຳ​ຖ້ວມ 49.274 ເຮັກ­ຕາ ເນື້ອ­ທີ່​ສວນ​ປູກ​ພືດ 2.585 ເຮັກ­ຕາ ອ່າງ­ເກັບ­ນ້ຳ 11 ແຫ່ງ ຄູ​ກັນ​ນ້ຳ 4 ແຫ່ງ ປະ­ຕູ​ນ້ຳ 12 ແຫ່ງ ແລະ ສາ​ຖາ​ນີ​ຈັກ­ສູບ­ນ້ຳ 9 ແຫ່ງ ໜອງ​ປາ​ຖືກ​ນ້ຳ​ຖ້ວມ 1.819 ໜອງ ສັດ­ລ້ຽງ​ຕາຍ ແລະ ສູນ­ຫາຍ 3.202 ໂຕ.

    ນອກ­ຈາກ​ນັ້ນ ກໍ​ຍັງ​ມີ​ຜົນ​ກະ­ທົບ​ຕໍ່​ພື້ນ­ຖານ​ໂຄງ​ລ່າງ​ຄື: ເສັ້ນ­ທາງ​ເສຍ​ຫາຍ​ຫຼາຍ​ກວ່າ 54 ເສັ້ນ ບາງ​ບ່ອນ​ທາງ​ຂາດ ນ້ຳ​ເຊາະ​ເຈື່ອນ ຂົວ​ເປ່​ເພ​ຍຸບ​ລົງ ເສັ້ນ­ທາງ​ຫຼາຍ​ບ່ອນ​ຖືກ​ຕັດ­ຂາດ​ບໍ່​ສາ­ມາດ​ສັນ­ຈອນ​ໄປ-ມາ​ໄດ້ ການ​ເຂົ້າ​ເຖິງ​ປະ­ຊາ­ຊົນ​ຜູ້​ປະ­ສົບ​ໄພ​ພົບ​ຄວາມ​ຫຍຸ້ງ­ຍາກ ມູນ​ຄ່າ​ຄວາມ​ເສຍ​ຫາຍ​ເສັ້ນ­ທາງ ແລະ ຂົວ​ຫຼາຍ​ກວ່າ 72 ຕື້​ກີບ ເສົາ​ໄຟ­ຟ້າ​ຫຼາຍ​ບ່ອນ​ຫັກ​ລົ້ມ​ໃນ​ບາງ​ເຂດ​ພື້ນ​ທີ່​ບໍ່​ສາ­ມາດ​ກະ­ຈາຍ​ກະ­ແສ​ໄຟ­ຟ້າ​ໄດ້ ໝໍ້​ແປງ​ໄຟ ກົງ​ເຕີ​ໄຟ ເຄື່ອງ­ໃຊ້​ໄຟ­ຟ້າ​ຂອງ​ປະ­ຊາ­ຊົນ​ຈຳ­ນວນ​ຫຼາຍ​ຖືກ​ນ້ຳ​ຖ້ວມ​ເສຍ​ຫາຍ ເຊິ່ງ​ຍັງ​ບໍ່​ສາ­ມາດ​ສັງ​ລວມ​ຂໍ້​ມູນ​ໄດ້ ມີ​ໂຮງ­ຮຽນ 165 ແຫ່ງ​ຖືກ​ນ້ຳ​ຖ້ວມ ແລະ 187 ໂຮງ­ຮຽນ​ບໍ່​ສາ­ມາດ​ເປີດ​ໄຂ​ສົກ­ຮຽນ ໃໝ່​ທັນ ມາ​ຮອດ​ປັດ­ຈຸ­ບັນ​ມີ 81 ໂຮງ­ຮຽນ​ໃນ​ບ່ອນ​ທີ່​ຖືກ​ນ້ຳ​ຖ້ວມ​ບໍ່​ສາ­ມາດ​ເປີດ​ການ​ຮຽນ-ການ​ສອນ​ໄດ້ ມີ​ສຸກ­ສາ­ລາ 8 ແຫ່ງ​ຖືກ​ນ້ຳ​ຖ້ວມ​ບໍ່​ສາ­ມາດ​ບໍ­ລິ­ການ​ປະ­ຊາ­ຊົນ​ໄດ້ ນ້ຳ­ສ້າງ ນ້ຳ​ບາ​ດານ 659 ໜ່ວຍ ແລະ ວິດ­ຖ່າຍ​ຫຼາຍ​ພັນ​ໜ່ວຍ​ຖືກ​ຖ້ວມ.

    ຈາກ​ນັ້ນ ບັນ­ດາ​ແຂກ​ທີ່​ເຂົ້າ​ຮ່ວມ​ພາຍ​ໃນ​ງານ ກໍ​ໄດ້​ຮັບ​ຊົມ​ການ­ສະ­ແດງ​ສິ­ລະ​ປະ​ວັນ­ນະ­ຄະ­ດີ ພ້ອມ​ທັງ​ຮັບ​ປະ­ທານ​ອາ­ຫານ​ຮ່ວມ​ພາ­ເຂົ້າ​ສາ­ມັກ­ຄີ ແລະ ຮ່ວມ​ກັນ​ບໍ­ລິ­ຈາກ​ຊ່ວຍ­ເຫຼືອ​ຜູ້​ປະ­ສົບ​ໄພ­ພິ­ບັດ​ນ້ຳ​ຖ້ວມ​ຢູ່​ແຂວງ​ສະ­ຫວັນ​ນະ​ເຂດ​ໄດ້ ໃນ​ມູນ​ຄ່າ 2 ຕື້ 87 ລ້ານ​ກວ່າ​ກີບ ກັບ 52.000 ໂດ​ລາ ແລະ ເປັນ​ວັດ­ຖຸ​ລວມ​ມູນ​ຄ່າ 211 ລ້ານ​ກວ່າ​ກີບ.

ຂ່າວທີ່ກ່ຽວຂ້ອງ