ຂ່າວຫຼ້າສຸດ

ລາວ-ກຳປູເຈຍ ຍົກລະດັບການພົວພັນ ເປັນຄູ່ຮ່ວມຍຸດທະສາດຮອບດ້ານ ແລະ ໝັ້ນຄົງຍາວນານ

510 13 ກ.ຍ. 2019 ຂ່າວໜ້າ​ໜຶ່ງ
ລາວ-ກຳປູເຈຍ ຍົກລະດັບການພົວພັນ ເປັນຄູ່ຮ່ວມຍຸດທະສາດຮອບດ້ານ ແລະ ໝັ້ນຄົງຍາວນານ

    ໂດຍ​ຕອບ​ສະ­ໜອງ​ຕາມ​ຄຳ​ເຊີນ​ຂອງ​ສົມ­ເດັດ ອັກ­ຄະ­ມະ­ຫາ­ເສ­ນາ​ບໍ­ດີ ເຕ​ໂຈ ຮຸນ​ແຊນ ນາ­ຍົກ ລັດ­ຖະ­ມົນ­ຕີ ແຫ່ງ​ຣາ​ຊະ​ອາ­ນາ­ຈັກ​ກຳ­ປູ­ເຈຍ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ຄະ­ນະ​ຜູ້​ແທນ​ລາວ ເດີນ­ທາງ​ໄປ​ຢ້ຽມ­ຢາມ​ຣາ​ຊະ​ອາ­ນາ­ຈັກ​ກຳ­ປູ­ເຈຍ​ຢ່າງ​ເປັນ​ທາງ​ການ ວັນ​ທີ 12-13 ກັນ­ຍາ​ນີ້ ເພື່ອ​ຮັດ​ແໜ້ນ​ສາຍ​ພົວ­ພັນ​ມິດ­ຕະ­ພາບ​ຄວາມ​ສາ­ມັກ­ຄີ​ອັນ​ເປັນ​ມູນ­ເຊື້ອ​ທີ່​ມີ​ມາ​ແຕ່​ດົນ​ນານ ແລະ ເສີມ​ຂະ­ຫຍາຍ​ການ​ຮ່ວມ​ມື​ລະ­ຫວ່າງ ລາວ-ກຳ­ປູ­ເຈຍ.

    ຄະ­ນະ​ຜູ້​ແທນ​ຂັ້ນ​ສູງ​ລາວ​ເດີນ­ທາງ​ເຖິງ​ນະ­ຄອນ­ຫຼວງ​ພະ­ນົມ​ເປັນ ໃນ​ວັນ​ທີ 12 ກັນ­ຍາ 2019 ໄດ້​ມີ​ພິ­ທີ​ຕ້ອນ­ຮັບ​ຢ່າງ​ເປັນ​ທາງ​ການ ແລະ ສົມ​ກຽດ ໂດຍ​ສົມ­ເດັດ ເຕ​ໂຈ ຮຸນ​ແຊນ ນາ­ຍົກ­ລັດ­ຖະ­ມົນ­ຕີ​ແຫ່ງ ຣາ​ຊະ​ອາ­ນາ­ຈັກ​ກຳ­ປູ­ເຈຍ ທີ່​ຫໍ​ສັນ­ຕິ­ພາບ ຫຼັງ​ຈາກ​ສອງ​ຝ່າຍ​ໄດ້​ພົບ​ປະ ໂອ­ກາດ​ນີ້ ທ່ານ ທອງ​ລຸນ ສີ​ສຸ​ລິດ ໄດ້​ສະ­ແດງ​ຄວາມ​ຂອບ­ໃຈ​ຕໍ່​ການ​ຕ້ອນ­ຮັບ​ຢ່າງ​ອົບ​ອຸ່ນ ແລະ ສົມ​ກຽດ​ຈາກ​ລັດ­ຖະ­ບານ ແລະ ປະ­ຊາ­ຊົນ​ກຳ­ປູ­ເຈຍ ໂດຍ​ສະ­ເພາະ​ສົມ­ເດັດ ຮຸນ​ແຊນ ເຊິ່ງ​ເປັນ​ການ​ຢ້ຽມ­ຢາມ​ກຳ­ປູ­ເຈຍ​ຢ່າງ​ເປັນ​ທາງ​ການ​ຄັ້ງ​ທີ 2 ໃນ​ຕຳ­ແໜ່ງ​ນາ­ຍົກ­ລັດ­ຖະ­ມົນ­ຕີ​ອັນ​ມີ​ຄວາມ​ໝາຍ​ສຳ­ຄັນ​ທີ່​ສຸດ​ຕໍ່​ການ​ເສີມ​ຂະ­ຫຍາຍ​ສາຍ​ພົວ­ພັນ​ສອງ​ຝ່າຍ​ລາວ-ກຳ­ປູ­ເຈຍ​ໃນ​ຖາ­ນະ​ເປັນ​ເພື່ອນ​ມິດ​ສະ­ໜິດ­ສະ­ໜົມ ເປັນ​ບ້ານ​ໃກ້​ເຮືອນ​ຄຽງ ບ້ານ​ພີ່​ເມືອງ​ນ້ອງ ບ້ານ​ແກ່ວ​ເມືອງ​ດອງ ມາ​ແຕ່​ບູ­ຮານ​ນະ​ການ ພ້ອມ​ນັ້ນ ໄດ້ສະ­ແດງ​ຄວາມ​ຊົມ­ເຊີຍ​ຕໍ່​ຜົນ­ສຳ­ເລັດ​ຂອງ​ການ​ເລືອກ​ຕັ້ງ​ສະ­ພາ​ທ້ອງ­ຖິ່ນ​ຂັ້ນ​ນະ­ຄອນ­ຫຼວງ ແຂວງ ນະ­ຄອນ ແລະ ເມືອງ ໃນ​ເດືອນ​ພຶດ­ສະ­ພາ 2019 ເຊິ່ງ​ສະ­ແດງ​ໃຫ້​ເຫັນ​ເຖິງ​ຄວາມ​ເຊື່ອ​ໝັ້ນ ແລະ ຄວາມ​ສັດ­ທາ​ຂອງ​ປະ­ຊາ­ຊົນ​ກຳ­ປູ­ເຈຍ​ຕໍ່​ພັກ​ປະ­ຊາ­ຊົນ​ກຳ­ປູ­ເຈຍ ໂດຍ​ລວມ ແລະ ໂດຍ​ສະ­ເພາະ​ຕໍ່​ການ​ຊີ້​ນຳ-ນຳ­ພາ​ຂອງ ສົມ­ເດັດ ຮຸນ​ແຊນ ຕະ­ຫຼອດ​ໄລ­ຍະ​ຜ່ານ​ມາ​ທີ່​ໄດ້​ນຳ​ຄວາມ​ສີ­ວິ­ໄລ​ຈະ­ເລີນ​ກ້າວ­ໜ້າ​ມາ­ສູ່​ປະ­ເທດ​ຊາດ​ໃຫ້​ທົ່ວ​ປະ­ເທດ​ມີ​ສະ­ຖຽນ​ລະ​ພາບ​ດ້ານ​ການ­ເມືອງ ເສດ­ຖະ­ກິດ​ມີ​ການ​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ໄດ້​ຮັບ​ການ​ປົວ­ແປງ​ດີ​ຂຶ້ນ​ເປັນ​ກ້າວໆ ແລະ ບົດ­ບາດ​ອິດ​ທິ​ພົນ​ຊື່​ສຽງ​ຂອງ​ກຳ­ປູ­ເຈຍ​ນັບ​ມື້​ນັບ​ໄດ້​ຮັບ​ການ​ຍົກ​ສູງ​ຂຶ້ນ​ໃນ​ເວ­ທີ​ພາກ​ພື້ນ ແລະ ສາ­ກົນ.

    ໃນ​ການ​ພົບ​ປະ​ສອງ​ຝ່າຍ​ໄດ້​ຮ່ວມ​ກັນ​ທົບ​ທວນ­ຄືນ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ເອ­ກະ­ສານ​ຮ່ວມ​ມື​ສອງ​ຝ່າຍ​ກໍ​ຄື ການ​ຕົກ­ລົງ​ຂອງ​ການ​ນຳ​ຂັ້ນ​ສູງ​ສອງ​ປະ­ເທດ​ໃນ​ທຸກ​ດ້ານ​ຕະ­ຫຼອດ​ໄລ­ຍະ​ຜ່ານ​ມາ ແລະ ວາງ​ແຜນ­ການ​ຮ່ວມ​ມື​ໃນ­ຕໍ່­ໜ້າ ເປັນ­ຕົ້ນ ການ​ຮ່ວມ​ມື​ດ້ານ​ການ­ເມືອງ ການ​ຕ່າງ­ປະ­ເທດ ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ການ​ຮ່ວມ​ມື​ດ້ານ​ຊາຍ​ແດນ ການ​ຮ່ວມ​ມື​ດ້ານ​ເສດ­ຖະ­ກິດ​ການ​ຄ້າ ການ​ລົງ­ທຶນ​ໂຍ­ທາ​ທິ​ການ ແລະ ຂົນ­ສົ່ງ ພະ­ລັງ­ງານ ກະ­ສິ­ກຳ ແລະ ການ​ປະ­ມົງ ການ​ຮ່ວມ​ມື​ດ້ານ​ສັງ­ຄົມ-ວັດ­ທະ­ນະ­ທຳ ສຶກ​ສາ ແລະ ກີ­ລາ ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ວັດ­ທະ­ນະ­ທຳ ແລະ ທ່ອງ​ທ່ຽວ ສາ­ທາ­ລະ­ນະ​ສຸກ ຕະ­ຫຼອດ​ຮອດ​ການ​ພົວ­ພັນ​ຮ່ວມ​ມື​ໃນ​ລະ­ດັບ​ທ້ອງ­ຖິ່ນ​ແຂວງ​ແຮກ­ສ່ຽວ ກໍ​ຄື​ການ​ຮ່ວມ​ມື​ໃນ​ຂອບ​ພາກ​ພື້ນ ແລະ ອາ​ນຸ​ພາກ​ພື້ນ ສອງ​ຝ່າຍ​ໄດ້​ແລກ­ປ່ຽນ​ຄຳ​ຄິດ​ຄຳ​ເຫັນ​ແບບ​ກົງ​ໄປ​ກົງ​ມາ ຈິງ​ໃຈ ແລະ ເປັນ​ເອ­ກະ​ພາບ​ກັນ​ສູງ ໂດຍ​ສອງ​ນາ­ຍົກ­ລັດ­ຖະ­ມົນ­ຕີ​ໄດ້​ຊີ້​ນຳ​ບັນ­ດາ​ຂະ­ແໜງ­ການ​ທີ່​ກ່ຽວ­ຂ້ອງ ຈົ່ງ​ເອົາ­ໃຈ­ໃສ່​ຮ່ວມ​ກັນ​ຈັດ​ຕັ້ງ​ປະ­ຕິ­ບັດ​ບັນ­ດາ​ຂໍ້​ຕົກ­ລົງ​ທີ່​ສອງ​ຝ່າຍ​ໄດ້​ມີ​ຮ່ວມ​ກັນ ກໍ​ຄື​ການ​ຕົກ­ລົງ​ຂັ້ນ​ສູງ​ຂອງ​ການ​ນຳ​ສອງ​ປະ­ເທດ​ໃຫ້​ປາ­ກົດ​ຜົນ​ເປັນ​ຈິງ ແກ້​ໄຂ​ບັນ­ຫາ​ການ​ກຳ­ນົດ​ຊາຍ​ແດນ​ທີ່​ຍັງ​ຄົງ​ຄ້າງ​ໃຫ້​ສຳ­ເລັດ​ຢ່າງ​ສົມ­ບູນ​ໂດຍ​ໄວ ແລະ ສືບ­ຕໍ່​ຮັກ­ສາ​ກົນ​ໄກ​ການ​ພົບ​ປະ ແລະ ປະ­ສານ​ງານ​ກັນ​ໃນ​ແຕ່​ລະ​ລະ­ດັບ ເພື່ອ​ຊຸກ­ຍູ້​ໃຫ້­ການ​ຮ່ວມ​ມື​ໃນ​ແຕ່​ລະ​ດ້ານ​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ມີ​ປະ­ສິດ​ຕິ​ພາບ.

    ໂອ­ກາດ​ຢ້ຽມ­ຢາມ​ຄັ້ງ​ນີ້ ສອງ​ນາ­ຍົກ­ລັດ­ຖະ­ມົນ­ຕີ​ໄດ້​ຮ່ວມ​ລົງ​ນາມ ແລະ ເປັນ​ສັກ­ຂີ​ພິ­ຍານ​ໃນ​ການ​ລົງ​ນາມ​ເອ­ກະ­ສານ​ຮ່ວມ​ມື​ສອງ​ຝ່າຍ 6 ສະ­ບັບ​ຄື: ຖະ­ແຫຼງ­ການ​ຮ່ວມ​ລະ­ຫວ່າງ​ນາ­ຍົກ­ລັດ­ຖະ­ມົນ­ຕີ​ລາວ​ກັບ ນາ­ຍົກ­ລັດ­ຖະ­ມົນ­ຕີ​ກຳ­ປູ­ເຈຍ ສັນ­ຍາ​ວ່າ​ດ້ວຍ​ການ​ຮ່ວມ​ມື​ຂະ­ແໜງ​ພະ­ລັງ­ງານ​ໄຟ­ຟ້າ (ປັບ­ປຸງ​ປ່ຽນ​ແທນ​ສະ­ບັບ​ທີ່​ໄດ້​ລົງ​ນາມ​ປີ 1999) ສັນ­ຍາ​ຊື້​ຂາຍ​ສະ­ໜອງ​ໄຟ­ຟ້າ 500 MW ແບບ​ລະ­ບົບ​ສູ່​ລະ­ບົບ​ລະ­ຫວ່າງ​ລັດ​ວິ​ສາ​ຫະ​ກິດ​ໄຟ­ຟ້າ​ລາວ ແລະ ລັດ​ວິ​ສາ​ຫະ​ກິດ​ໄຟ­ຟ້າ​ກຳ­ປູ­ເຈຍ ສັນ­ຍາ​ຊື້​ຂາຍ​ໄຟ­ຟ້າ​ໂຄງ­ການ​ໄຟ­ຟ້າ​ຖ່ານ​ຫີນ​ກະ­ລຶມ ເພື່ອ​ຂາຍ​ໄຟ­ຟ້າ​ໃຫ້​ລັດ​ວິ​ສາ​ຫະ​ກິດ​ໄຟ­ຟ້າ​ກຳ­ປູ­ເຈຍ ສັນ­ຍາ​ຊື້​ຂາຍ​ໄຟ­ຟ້າ​ໂຄງ­ການ​ໄຟ­ຟ້າ​ຖ່ານ​ຫີນ​ລະ​ມານ ເພື່ອ​ຂາຍ​ໄຟ­ຟ້າ​ໃຫ້​ລັດ​ວິ​ສາ​ຫະ​ກິດ​ໄຟ­ຟ້າ​ກຳ­ປູ­ເຈຍ ແລະ ບົດ​ບັນ­ທຶກ​ຄວາມ​ເຂົ້າ­ໃຈ​ວ່າ​ດ້ວຍ​ການ​ຮ່ວມ​ມື​ດ້ານ​ແຮງ​ງານ.

    ພາຍ­ຫຼັງ​ສຳ­ເລັດ​ການ​ພົບ​ປະ​ທາງ​ການ ແລະ ພິ­ທີ​ລົງ​ນາມ ສອງ​ນາ­ຍົກ­ລັດ­ຖະ­ມົນ­ຕີ​ໄດ້​ຖະ­ແຫຼງ​ຂ່າວ​ຮ່ວມ ເຊິ່ງ​ທັງ​ສອງ​ຝ່າຍ​ໄດ້​ຢືນ­ຢັນ​ຄືນ​ເຖິງ​ຄວາມ​ມຸງ​ໝັ້ນ​ໃນ​ການ​ສືບ­ຕໍ່​ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ ຄວາມ​ສາ­ມັກ­ຄີ​ຊ່ວຍ­ເຫຼືອ​ເຊິ່ງ​ກັນ ແລະ ກັນ ຖານ​ບ້ານ​ໃກ້​ເຮືອນ​ຄຽງ ບ້ານ​ພີ່​ເມືອງ​ນ້ອງ ບ້ານ​ແກ່ວ​ເມືອງ​ດອງ ທີ່​ເປັນ​ມູນ­ເຊື້ອ​ອັນ​ດີ­ງາມ​ມາ​ແຕ່​ດົນ​ນານ​ລະ­ຫວ່າງ​ສອງ​ປະ­ເທດ ກໍ​ຄື​ສອງ​ລັດ­ຖະ­ບານ ໃຫ້​ນັບ​ມື້​ແໜ້ນ​ແຟ້ນ​ຍິ່ງ​ຂຶ້ນ​ບົນ​ພື້ນ­ຖານ​ເຄົາ­ລົບ​ອະ­ທິ­ປະ​ໄຕ​ຄວາມ​ສະ­ເໝີ­ພາບ ຕ່າງ​ຝ່າຍ​ຕ່າງ​ມີ​ຜົນ​ປະ­ໂຫຍດ​ຮ່ວມ​ກັນ ພິ­ເສດ ໃນ​ໂອ­ກາດ​ການ​ຢ້ຽມ­ຢາມ​ຄັ້ງ​ນີ້ ສອງ​ຝ່າຍ​ຍັງ​ໄດ້​ຕົກ­ລົງ​ຍົກ​ລະ­ດັບ​ການ​ພົວ­ພັນ​ສອງ​ຝ່າຍ​ລະ­ຫວ່າງ​ລາວ ແລະ ກຳ­ປູ­ເຈຍ​ຂຶ້ນ​ເປັນ​ຄູ່​ຮ່ວມ​ຍຸດ​ທະ​ສາດ​ຮອບ­ດ້ານ ແລະ ໝັ້ນ­ຄົງ​ຍາວ​ນານ ສອງ​ຝ່າຍ​ເຫັນ​ດີ​ໃຫ້​ບັນ­ດາ​ກະ­ຊວງ ແລະ ຂະ­ແໜງ­ການ​ກ່ຽວ­ຂ້ອງ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ຕາມ​ເນື້ອ​ໃນ​ສັນ­ຍາ​ຂໍ້​ຕົກ­ລົງ​ຕ່າງໆ​ທີ່​ສອງ​ຝ່າຍ​ໄດ້​ເຊັນ​ກັນ ກໍ​ຄື​ການ​ຕົກ­ລົງ​ຂອງ​ການ​ນຳ​ຂັ້ນ​ສູງ​ສອງ​ປະ­ເທດ​ໃຫ້​ນັບ​ມື້​ແຕກ​ດອກ​ອອກ​ຜົນ​ຫຼາຍ​ຂຶ້ນ​ໂດຍ​ຜ່ານ​ກົນ​ໄກ​ການ​ຮ່ວມ​ມື​ສອງ​ຝ່າຍ​ຄື: ຄະ­ນະ​ກຳ­ມະ­ການ​ຮ່ວມ​ມື​ວ່າ​ດ້ວຍ​ການ​ຮ່ວມ​ມື​ສອງ​ຝ່າຍ​ລາວ-ກຳ­ປູ­ເຈຍ (JC) ກໍ​ຄື ກົນ​ໄກ​ຮ່ວມ​ມື​ອື່ນໆ ສອງ​ຝ່າຍ​ໄດ້​ເປັນ​ເອ­ກະ​ພາບ​ກັນ ແລະ ຢືນ­ຢັນ​ວ່າ​ບໍ­ລິ­ເວນ​ແກ້ງ​ຕໍ​ມໍ​ຄອຍ-ຫ້ວຍ​ຕະ​ເງົາ ເປັນ​ບໍ­ລິ­ເວນ​ຄົງ​ຄ້າງ​ທີ່​ຍັງ​ບໍ່​ທັນ​ໄດ້​ຮັບ​ການ​ແກ້​ໄຂ ດັ່ງ­ນັ້ນ ຈຶ່ງ​ໄດ້​ເຫັນ​ດີ​ເປັນ​ເອ­ກະ​ພາບ​ກັນ​ວ່າ ໄລ­ຍະ​ທີ່​ກຳ­ລັງ​ສືບ­ຕໍ່​ແກ້​ໄຂ​ນີ້​ແມ່ນ: ບໍ່​ໃຫ້​ມີ​ກຳ­ລັງ​ທະ­ຫານ​ຢູ່​ໃນ​ບໍ­ລິ­ເວນ​ນີ້ ບໍ່​ໃຫ້​ມີ​ປະ­ຊາ­ຊົນ​ອາ­ໄສ​ຢູ່ ຫຼື ດຳ­ເນີນ​ກິດ­ຈະ­ກຳ​ໃດໆຢູ່​ບໍ­ລິ­ເວນ​ດັ່ງ­ກ່າວ ແລະ ໃຫ້​ມີ​ການ​ກວດ­ກາ​ຮ່ວມ​ກັນ ທັງ​ທາງ­ບົກ​ທາງ­ນ້ຳ ແລະ ທາງ​ອາ­ກາດ ການ​ກວດ­ກາ​ຮ່ວມ​ສອງ​ຝ່າຍ​ສາ­ມາດ​ກວດ­ກາ​ໂດຍ​ການ​ໃຊ້​ກຳ­ລັງ​ຄົນ ຫຼື ການ​ໃຊ້​ເຮືອ­ບິນ​ບໍ່​ມີ​ຄົນ​ຂັບ (Drone) ສອງ​ຝ່າຍ​ເຫັນ​ດີ​ໃຫ້​ຮັກ­ສາ​ສະ­ຖາ­ນະ​ພາບ​ເດີມ​ບໍ­ລິ­ເວນ​ຊາຍ​ແດນ​ທີ່​ຍັງ​ຄົງ​ຄ້າງ ໂດຍ​ປາ­ສະ­ຈາກ​ສິ່ງ​ປຸກ​ສ້າງ​ຕ່າງໆ​ທີ່​ພາ­ໃຫ້​ມີ​ການ​ປ່ຽນ­ແປງ​ສະ­ພາບ​ບໍ­ລິ­ເວນ​ດັ່ງ­ກ່າວ​ຈົນ​ກວ່າ​ສອງ​ຝ່າຍ​ຈະ​ສຳ­ເລັດ​ການ​ສຳ​ຫຼວດ ແລະ ປັກ​ຫຼັກ​ໝາຍ​ຊາຍ​ແດນ​ໃຫ້​ສຳ­ເລັດ ສອງ​ຝ່າຍ​ເຫັນ​ດີ​ຕົກ­ລົງ​ກັນ​ຮ່າງ​ສົນ­ທິ­ສັນ­ຍາ​ວ່າ​ດ້ວຍ​ການ​ກຳ­ນົດ​ເສັ້ນ​ຊາຍ​ແດນ​ລະ­ຫວ່າງ​ລາວ​ກັບ​ກຳ­ປູ­ເຈຍ​ໃນ​ບໍ­ລິ­ເວນ​ທີ່​ທັງ​ສອງ​ຝ່າຍ​ໄດ້​ສຳ​ຫຼວດ ແລະ ໄດ້​ຕົກ­ລົງ​ເອ­ກະ​ພາບ​ກັນ​ແລ້ວ​ໃນ  86% ຂອງ​ແລວ​ເຂດ​ຊາຍ​ແດນ​ລະ­ຫວ່າງ​ສອງ​ປະ­ເທດ ເພື່ອ​ດຳ­ເນີນ​ການ​ປັກ​ຫຼັກ​ໝາຍ​ຊາຍ​ແດນ​ໃຫ້​ສຳ­ເລັດ​ໂດຍ​ໄວ ພາຍ­ຫຼັງ​ສຳ­ເລັດ​ສົນ­ທິ­ສັນ­ຍາ​ແລ້ວ​ສອງ​ຝ່າຍ​ເປັນ​ເອ­ກະ​ພາບ​ກັນ​ຈະ​ດຳ­ເນີນ​ການ​ປັກ​ຫຼັກ​ໝາຍ​ຖີ່ ແລະ ຍົກ​ລະ­ດັບ​ຫຼັກ​ໝາຍ​ຊາຍ​ແດນ​ທີ່​ມີ​ຢູ່​ແລ້ວ​ນັ້ນ​ໃຫ້​ໄດ້​ມາດ­ຕະ­ຖານ ແລະ ມີ​ຄວາມ​ແຂງ​ແກ່ນ​ຕື່ມ ສຳ­ລັບ​ບໍ­ລິ­ເວນ​ຊາຍ​ແດນ​ທີ່​ຄົງ​ຄ້າງ​ມິດ­ຕະ­ພາບ ທັງ​ສອງ​ຝ່າຍ​ເຫັນ​ດີ​ຈະ​ສືບ­ຕໍ່​ປຶກ­ສາ​ຫາ­ລື ເພື່ອ​ຊອກ​ຊ່ອງ​ທາງ​ແກ້​ໄຂ​ຮ່ວມ​ກັນ​ຕໍ່​ໄປ​ໃຫ້​ສຳ­ເລັດ​ໂດຍ​ສົມ­ບູນ.

    ໃນ​ຕອນ​ຄ່ຳ​ວັນ​ດຽວ​ກັນ ທ່ານ ທອງ​ລຸນ ສີ​ສຸ​ລິດ ພ້ອມ​ຄະ­ນະ ໄດ້​ເຂົ້າ​ຮ່ວມ​ງານ​ລ້ຽງ​ອາ­ຫານ​ຄ່ຳ​ຈັດ​ເປັນ​ກຽດ​ໂດຍ ສົມ­ເດັດ ນາ­ຍົກ­ລັດ­ຖະ­ມົນ­ຕີ ເຕ​ໂຈ ຮຸນ​ແຊນ ມີ​ການ​ນຳ​ຂັ້ນ​ສູງ​ກຳ­ປູ­ເຈຍ​ທີ່​ຫໍ​ສັນ­ຕິ­ພາບ.

    ໂອ­ກາດ​ຢ້ຽມ­ຢາມ​ກຳ­ປູ­ເຈຍ​ຄັ້ງ​ນີ້ ທ່ານ ທອງ​ລຸນ ສີ​ສຸ​ລິດ ຍັງ​ໄດ້​ເຂົ້າ​ຢ້ຽມ​ຄຳ­ນັບ ສົມ­ເດັດ ຊາຍ ຊຸມ ປະ­ທານ​ສະ­ພາ​ສູງ ແລະ ຮັກ­ສາ​ການ​ປະ­ມຸກ​ລັດ ແລະ ສົມ­ເດັດ ເຮັງ ຊຳ​ຣິນ ປະ­ທານ​ສະ­ພາ​ແຫ່ງ​ຊາດ ກຳ­ປູ­ເຈຍ ແລະ ໄດ້​ວາງ​ພວງ­ມາ­ລາ​ທີ່​ອາ​ນຸ​ສາ​ວະ­ລີ​ເອ­ກະ­ລາດ ແລະ ອະ­ນຸ­ສາ­ວະ­ລີ​ເຈົ້າ​ໂນ​ໂຣ​ດົມ ສີ​ຫາ​ນຸ.

ຂ່າວທີ່ກ່ຽວຂ້ອງ