ຂ່າວຫຼ້າສຸດ

ຄຸນ​ນະພາ​​ບ​ອາກາດ​ຢູ່​ໃນ​ສິງ​ກະ​ໂປ ຕ່ຳ​ສຸດ​ໃນ​ຮອບ​ຫຼາຍ​ປີ​ຜ່ານ​ມາ

123 17 ກ.ຍ. 2019 ຂ່າວຕ່າງປະເທດ
ຄຸນ​ນະພາ​​ບ​ອາກາດ​ຢູ່​ໃນ​ສິງ​ກະ​ໂປ ຕ່ຳ​ສຸດ​ໃນ​ຮອບ​ຫຼາຍ​ປີ​ຜ່ານ​ມາ

    ອົງການ​ສິ່ງແວດລ້ອມ​ແຫ່ງ​ຊາດ (NEA) ຂອງ​ສິງກະໂປ ແຈ້ງ​ໃຫ້​ຮູ້ເມື່ອ​ວັນ​ທີ 14 ກັນຍາ​ນີ້​ວ່າ ຄຸນ​ນະ​ພາບ​ອາກາດ​ຂີ້ຮ້າຍ​ລົງ​ໄປ ຍ້ອນ​ຜົນ​ກະທົບ​ຈາກ​ຝຸ່ນ​ຄວັນ​ທີ່​ເກີດ​ຈາກ​ໄຟ​ໄໝ້​​ປ່​າຢູ່​ໃນ​ເກາະສຸ​ມາ​ຕຣາ ຂອງ​ອິນ​ໂດ​ເນ​ເຊຍ.

    ໃນ​ຕອນ​ແລງ​ຂອງ​ວັນ​ທີ 14 ກັນຍາ​ນີ້ ດັດ​ສະ​ນີ​ມາດຖານ​ມົນ​ລະ​ພິດ (PSI) ທີ່​ແທກ​ໄດ້​ຢູ່​ໃນ​ສິງກະໂປ ແມ່ນ​ຢູ່​ທີ່ 108. ຕາມ​ການ​ກຳນົດ​ແລ້ວ ດັດ​ສະ​ນີ​ແຕ່ 100 ຂຶ້ນ​ໄປ ແມ່ນ​ເປັນ​ຜົນ​ຮ້າຍ​ຕໍ່​ສຸຂະພາບ ແລະ​ປະຊາຊົນ​ໄດ້​ຮັບ​ການ​ແຈ້ງ​ເຕືອນ ໃຫ້​ງົດ​ການເຄື່ອນໄຫວ​ຢູ່​ກາງແຈ້ງ.

    NEA ແຈ້ງ​ເຕືອນ​ວ່າ ສະພາບ​ມົນ​ລະ​ພິດ​ໃນ​ອາກາດ​ໃນ​ໄລຍະ​ນີ້  ຍັງ​ຈະ​ແກ່​ໄຍ​​າວ​ໄປ​ອີກ​ຫຼາຍ​ມື້​ໃນຕໍ່ໜ້າ ແລະ ເຕືອນ​ວ່າ ປະຊາຊົນ​ຄວນ​ໃຫ້​ຄວາມ​ໃສ່ໃຈ​ຕໍ່​ມາດ​ຕະການ​ປ້ອງ​ກັນ ເຊັ່ນ​ການ​ໃສ່​ຜ້າ​ປິດ​ປາກ-ດັງ ໃນ​ເວລາ​ທີ່​ອອກ​ໄປ​ສູ່​ທ້ອງ​ຖະໜົນ ຈຳກັດ​ການ​ຢູ່​ກາງແຈ້ງ​ເປັນ​ເວລາ​ດົນ ແລະ​ ອື່ນໆ.

    ເມື່ອ​ປີ 2015 ທີ່​ຜ່ານ​ມາ PSI ຂອງ​ສິງກະໂປ ຢູ່​ໃນ​ລະດັບ​ກວ່າ 300 ຊຶ່ງ​ເປັນ​ລະດັບ​ທີ່​ອັນຕະລາຍ ເຮັດ​ໃຫ້​ທາງ​ການ​ຕ້ອງ​ໄດ້​ປະກາດ​ໃຫ້​ປິດ​ການ​ຮຽນ​ການ​ສອນ ຢູ່​ໃນ​ໂຮງຮຽນ​ແຫ່ງ​ຕ່າງໆ.

    ໃນ​ຂະນະ​ດຽວ​ກັນ ຂ່າວສານ​ຫວຽດນາມ​ລາຍ​ງານ​ວ່າ ສະພາບ​ອາກາດ​ຢູ່​ໃນ​ພື້ນ​ທີ່​ນະຄອນຫຼວງ​ຮ່າ​ໂນ້ຍ ໃນ​ວັນ​ທີ 15 ກັນຍາ​ນີ້ ເກີດ​ມົນ​ລະ​ພິດ​ຮ້າຍ​ແຮງ​ຢູ່​ໃນ​ເກືອບ​ທຸກໆ​ເມືອງ. ການ​ວັດແທກ​ຄຸນ​ນະ​ພາບ​ອາກາດ PAMAir ຢູ່​ໃນ 40 ກວ່າ​ຈຸດ ໃນ​ພື້ນ​ທີ່​ນະຄອນຫຼວງ​ຮ່າ​ໂນ້ຍ ເມື່ອ​ຕອນ​ເຊົ້າ​ຂອງ​ວັນ​ທີ 15 ກັນຍາ​ນີ້ ຕ່າງ​ກໍ​ມີ​ດັດ​ສະ​ນີ​ຄຸນ​ນະ​ພາບ​ອາກາດ AQI ແຕ່ 150-170 ຊຶ່ງ​ຢູ່​ໃນ​ໝວດ​ສີແດງ (ເປັນ​ການ​ວັດແທກ​ລະດັບ 4 ໃນ​ຈຳນວນ 6 ຂັ້ນ ຂອງ​ຄຸນ​ນະ​ພາບ​ອາກາດ ຕາມ​ວິທີ​ຄິດໄລ່​ຂອງ ສ ອາ​ເມ​ຣິ​ກາ).

ຂ່າວທີ່ກ່ຽວຂ້ອງ