ເຄນ​ຢາ ​ແລະ ​ ອູ​ກັນ​ດາ ລົງ​ນາມ​ຂໍ້​ຕົກລົງ​ວ່າ​ດ້ວຍ​ການ​ຢຸດ​ຕິ​ການ​ພິພາດ​ຂ້າມ​ຊາຍ​ແດນ

638 17 ກ.ຍ. 2019 ຂ່າວຕ່າງປະເທດ
ເຄນ​ຢາ ​ແລະ ​ ອູ​ກັນ​ດາ ລົງ​ນາມ​ຂໍ້​ຕົກລົງ​ວ່າ​ດ້ວຍ​ການ​ຢຸດ​ຕິ​ການ​ພິພາດ​ຂ້າມ​ຊາຍ​ແດນ

    ປະທານາທິບໍດີ ອູ​ຮູ​ຣູ ເຄນ​ຢັດ​ຕາ ຜູ້ນຳ​ເຄນ​ຢາ ແລະ ປະທານາທິບໍດີ ໂຢ​ເວ​ຣີ ມູ​ເຊ​ເວ​ນີ ຜູ້ນຳ​ອູ​ກັນ​ດາ ຕ່າງ​ກໍ​ໄດ້​ເຂົ້າ​ຮ່ວມ​ເປັນ​ສັກຂີ​ພິຍານ ໃນ​ພິທີ​ລົງ​ນາມ​ຂໍ້​ຕົກລົງ​ສັນຕິພາບ​ຄັ້ງ​ປະຫວັດສາດ ເພື່ອ​ຊຸກຍູ້​ການ​ພັດທະນາ​ຢູ່​ໃນ​ເຂດ ຕູ​ກາ​ນາ-ໂປ​ກອດ-ກຣາ​ໂມ​ຈາ ທີ່​ຕັ້ງ​ຢູ່​ລຽບ​ຕາມ​ຊາຍ​ແດນ​ລະຫວ່າງ​ສອງ​ປະເທດ​ດັ່ງກ່າວ.

    ພິທີ​ລົງ​ນາມ​ຂໍ້​ຕົກລົງ​ດັ່ງກ່າວ ຊຶ່ງ​ເປັນ​ບົດ​ບັນທຶກ​ຊ່ວຍ​ຈຳ ກ່ຽວ​ກັບ​ສັນຕິພາບ​ຂ້າມ​ຊາຍ​ແດນ ແລະ ພັດທະນາ​ຊາຍ​ແດນ​ນັ້ນ ມີ​ຂຶ້ນ​ເມື່ອ​ວັນ​ທີ 14 ກັນຍາ​ນີ້ ຢູ່​ທີ່​ປະເທດ​ອູ​ກັນ​ດາ.

    ລັດຖະມົນຕີ​ກະຊວງ​ພາຍ​ໃນ​ເຄນ​ຢາ ແລະ ລັດຖະມົນຕີ​ກ່ຽວ​ກັບ​ບັນຫາ​ຂອງ​ເຂດ ກາ​ຣາ​ໂມ​ຈາ ຂອງ​ອູ​ກັນ​ດາ ໄດ້​ຮ່ວມ​ກັນ​ລົງ​ນາມ​ສົນທິສັນຍາ​ຕ່າງໆ​ທີ່​ກ່ຽວຂ້ອງ ໂດຍ​ຊ່ອງ​ໜ້າ​ຜູ້ນຳ ແລະ ເຈົ້າ​ໜ້າທີ່​ຈາກ​ລັດຖະບານ​ຂອງ​ທັງ​ສອງ​ປະເທດ ຈຳນວນ​ຫຼາຍ​ຮ້ອຍ​ຄົນ.

    ປະທານາທິບໍດີ ເຄນ​ຢັດ​ຕາ ເວົ້າ​ວ່າ ຂໍ້​ຕົກລົງ​ທີ່​ໄດ້​ລົງ​ນາມ​ໂດຍ​ສອງ​ປະເທດ​ນັ້ນ ຈະ​ຊ່ວຍ​ຮັບປະກັນ​ສັນຕິພາບ​ຍາວ​ນານ​ໃຫ້​ແກ່​ປະຊາຊົນ​ຢູ່​ໃນ​ເຂດ​ຊາຍ​ແດນ ພ້ອມ​ກັນ​ນັ້ນ​ກໍ​ຊຸກຍູ້​ການ​ພັດທະນາ​ແບບ​ຍືນ​ຍົງ. ທາງ​ດ້ານ​ປະທານາທິບໍດີ ມູ​ເຊ​ເວ​ນີ ເວົ້າ​ວ່າ ທາງ​ການ​ອູ​ກັນ​ດາ ໄດ້​ເລີ່ມ​ດຳເນີນ​ຫຼາຍ​ໂຄງການ ເພື່ອ​ແກ້​ໄຂ​ເງື່ອນໄຂ​ທາງ​ດ້ານ​ເສດຖະກິດ ຂອງ​ທ້ອງຖິ່ນ​ຕ່າງໆ ຢູ່​ໃນ​ເຂດ​ຊາຍ​ແດນ.

   ໃນ​ຫຼາຍ​ປີ​ທີ່​ຜ່ານ​ມາ ບັນດາ​ຊຸມ​ຊົນ​ຊົນ​ເຜົ້າ​ຢູ່​ໃນ​ເຂດ​ຊາຍ​ແດນ ຂອງ​ສອງ​ປະເທດ​ດັ່ງກ່າວ ໄດ້​ຍິງ​ຕໍ່ສູ້​ກັນ ເພື່ອ​ຍາດ​ເອົາ​ທົ່ງ​ຫຍ້າ ມາ​ນຳ​ໃຊ້​ໃຫ້​ແກ່​ການ​ລ້ຽງສັດ. ການ​ພິພາດ​ດ້ວຍ​ຄວາມ​ຮຸນ​ແຮງ​ຢູ່​ທີ່​ນັ້ນ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ​ໄປ​ແລ້ວ​ຈຳນວນ​ຫຼາຍ.

ຂ່າວທີ່ກ່ຽວຂ້ອງ