ຂ່າວຫຼ້າສຸດ

...ອັງກິດ ອຳລາ ອີຢູ...

2.821 18 ກ.ຍ. 2019 ນານາສາລະ

    ບັນ­ຫາ​ເຄັ່ງ­ຮ້ອນ​ອີກ​ຈຸດ​ໜຶ່ງ​ຂອງ​ໂລກ​ໃນ​ປັດ­ຈຸ­ບັນ ແມ່ນ​ບັນ­ຫາ​ການ​ຖອນ​ຕົວ​ອອກ​ຈາກ​ສະ­ຫະ­ພາບ​ເອີ​ຣົບ (EU) ຂອງ​ປະ­ເທດ​ອັງ­ກິດ ຫຼື ເຮົາ​ຮູ້​ຕາມ​ຂ່າວ​ແມ່ນ Brexit.

    ອີງ​ຕາມ​ແຫຼ່ງ​ຂ່າວ​ຈາກ​ຕ່າງ­ປະ­ເທດ​ໃຫ້​ຮູ້​ວ່າ: ໃນ​ການ​ລົງ​ປະ­ຊາ​ມະ­ຕິ​ເມື່ອ​ເດືອນ​ມິ­ຖຸ­ນາ 2016 ນັ້ນ ປະ­ຊາ­ຊົນ​ອັງ­ກິດ 51,8% ເຫັນ​ດີ​ຖອນ​ຕົວ​ອອກ​ຈາກ EU ຄື​ປະ­ມານ 17 ລ້ານ​ກວ່າ​ຄົນ ແລະ ຜູ້​ຢາກ​ຢູ່​ຕໍ່​ປະ­ມານ 48,2% ຫຼື 16 ລ້ານ​ກວ່າ​ຄົນ ແຕ່​ໃນ​ພາກ​ປະ­ຕິ­ບັດ​ຕົວ​ຈິງ​ໄດ້​ເກີດ​ຂໍ້​ຂັດ​ແຍ້ງ​ກັນ​ໃນ​ພາກ​ປະ­ຕິ­ບັດ​ລະ­ຫວ່າງ​ສະ­ມາ­ຊິກ​ລັດ​ຖະ​ສະ­ພາ​ກັບ​ລັດ­ຖະ­ບານ​ໃນ​ການ Brexit ທີ່​ບັນ­ລຸ​ໄດ້​ກັບ EU ໃນ​ປີ 2018 ຈົນ​ນຳ­ໄປ​ສູ່​ການ​ລາ​ອອກ​ຂອງ​ທ່ານ​ນາງ ເທ​ເລ​ຊາ ເມ (Theresa May) ນາ­ຍົກ​ຄົນ​ກ່ອນ​ຂອງ​ອັງ­ກິດ.

    ເຖິງ​ແມ່ນ​ວ່າ ຫາ​ໄດ້​ຮັບ​ຕຳ­ແໜ່ງ​ນາ­ຍົກ­ລັດ­ຖະ­ມົນ­ຕີ​ຄົນ​ໃໝ່​ໃນ​ເດືອນ​ກໍ­ລະ­ກົດ 2019 ແຕ່​ເບິ່ງ​ຄື​ວ່າ​ທ່ານ Borris Johnson ບໍ່​ສາ­ມາດ​ທົນ​ຕໍ່​ແຮງ​ກົດ​ດັນ​ຂອງ​ສະ­ພາ ດ້ວຍ​ການ​ຕັດ­ສິນ​ໃຈ Brexit ຕາມ​ຄຳ​ສັນ­ຍາ​ກັບ EU ຄື​ໃນ​ວັນ​ທີ 31 ຕຸ­ລາ 2019 ກ່ອນ​ໜ້າ​ນີ້ ອັງ­ກິດ​ເຄີຍ​ເຈລະ­ຈາ​ຂໍ​ເລື່ອນ​ການ​ຖອນ​ຕົວ​ຈາກ EU ມາ​ສອງ​ຄັ້ງ​ແລ້ວ ຄື​ເມື່ອ​ວັນ​ທີ 29 ມີ­ນາ ແລະ 12 ເມ­ສາ 2019 ຍ້ອນ​ວ່າ​ລັດ­ຖະ­ບານ​ສະ­ໄໝ​ນາງ ເທ​ເລ​ຊາ ເມ ບໍ່​ສາ­ມາດ​ນຳ​ສະ­ເໜີ​ຜ່ານ​ສະ­ພາ​ໄດ້ ເຮັດ​ໃຫ້​ຂະ​ບວນ​ການ Brexit ແກ່­ຍາວ​ມາ​ເຖິງ​ທຸກ​ວັນ​ນີ້.

    ສະ­ນັ້ນ ເພື່ອ​ນຳ­ພາ​ປະ­ເທດ​ອອກ​ຈາກ EU ຕາມ​ຂໍ້​ກຳ­ນົດ​ເສັ້ນ​ຕາຍ 31 ຕຸ­ລາ 2019 ນາ­ຍົກ​ຄົນ​ໃໝ່​ຂອງ​ອັງ­ກິດ​ຈຶ່ງ​ນຳ​ຂໍ້​ຕົກ­ລົງ​ເຂົ້າ​ສູ່​ສະ­ພາ​ອີກ​ຄັ້ງ ໂດຍ​ໃນ​ວັນ​ທີ 3 ກັນ­ຍາ 2019 ໄດ້​ນຳ​ເອົາ​ຂໍ້​ຕົກ­ລົງ​ຖອນ​ຕົວ​ຈາກ EU ໃນ​ວັນ​ທີ 31 ຕຸ­ລາ 2019 ໂດຍ​ບໍ່​ມີ​ການ​ເຮັດ​ຂໍ້​ຕົກ­ລົງ ຫຼື ເອີ້ນ​ວ່າ: No-deal Brexit ເປັນ​ກົດ­ໝາຍ​ປ້ອງ​ກັນ​ການ​ແຍກ​ຕົວ ແຕ່​ກໍ​ບໍ່​ສາ­ມາດ​ຜ່ານ​ໄດ້ ສະ­ນັ້ນ ຈຶ່ງ​ເຮັດ​ໃຫ້​ລັດ­ຖະ­ບານ​ອັງ­ກິດ​ຕ້ອງ​ໄປ​ເຈລະ­ຈາ​ເລື່ອນ​ໄປ​ອີກ ຈົນ​ເຖິງ​ວັນ​ທີ 31 ມັງ­ກອນ 2020 ເມື່ອ​ເປັນ​ເຊັ່ນ​ນີ້ ນາ­ຍົກ​ອັງ­ກິດ​ຈຶ່ງ​ພະ­ຍາ­ຍາມ​ຊຸກ​ດັນ​ກົດ­ໝາຍ​ຈັດ­ການ​ເລືອກ​ຕັ້ງ​ທົ່ວ​ໄປ​ຄັ້ງ​ໃໝ່ ໃນ​ວັນ​ທີ 15 ຕຸ­ລາ 2019 ຕໍ່​ສະ­ພາ​ອີກ ເມື່ອ​ວັນ​ທີ 4 ກັນ­ຍາ 2019 ແຕ່​ກໍ​ບໍ່​ສາ­ມາດ​ຜ່ານ​ສະ­ພາ​ໄດ້.

    ບໍ່​ທໍ່​ນັ້ນ ນາ­ຍົກ​ອັງ­ກິດ​ຍັງ​ເສຍ​ໄຊ​ໃຫ້​ແກ່​ພັກ​ຝ່າຍ​ຄ້ານ ໃນ​ການ​ເຂົ້າ​ຄວບ​ຄຸມ​ຂະ​ບວນ​ການ​ນິ­ຕິ­ບັນ­ຍັດ​ຂອງ​ລັດ​ຖະ​ສະ­ພາ ສົ່ງ​ຜົນ​ໃຫ້​ຝ່າຍ​ຄ້ານ​ສະ­ກັດ​ກັ້ນ​ຄວາມ​ພະ­ຍາ­ຍາມ​ຖອນ​ຕົວ​ອອກ​ຈາກ EU ແບບ​ບໍ່​ມີ​ຂໍ້​ຕົກ­ລົງ ໝາຍ​ຄວາມ​ວ່າ ລັດ­ຖະ­ບານ​ເສຍ​ໄຊ​ສາມ​ກົດ­ໝາຍ​ໃນ​ເວ­ລາ​ຕິດ­ຕໍ່​ກັນ ເຖິງ​ປານ​ນັ້ນ ນາ­ຍົກ​ອັງ­ກິດ ຍັງ​ນຳ​ເອົາ​ກົດ­ໝາຍ​ເລືອກ​ຕັ້ງ​ມາ​ຜ່ານ​ສະ­ພາ​ອີກ​ຄັ້ງ​ໃນ​ວັນ​ທີ 9 ກັນ­ຍາ 2019 ແຕ່​ກໍ​ບໍ່​ສາ­ມາດ​ຜ່ານ​ສະ­ພາ​ໄດ້​ອີກ.

  ຕໍ່​ເຫດ​ຮ້ອນ​ຄັ້ງ​ນີ້ ນາ­ຍົກ​ອັງ­ກິດ ກໍ​ໄດ້​ສະ­ແດງ​ອິດ​ທິ​ພົນ​ດ້ວຍ​ການ​ສະ­ເໜີ​ຢັບ​ຢັ້ງ​ການ​ກ່າວ​ເປີດ​ສະ­ພາ​ຂອງ​ພະ​ລາ​ຊີ​ນີ ເອ​ລີ​ຊາ​ເພດ ອອກ​ໄປ 3 ອາ­ທິດ ກາງ​ເດືອນ​ກັນ­ຍາ​ນີ້ ໄປ​ເປັນ​ວັນ​ທີ 14 ຕຸ­ລາ 2019 ຊຶ່ງ​ເປັນ​ການ​ແກ່​ອາ­ຍຸ​ການ​ອຳ​ລາ Brexit ທີ່​ມີ​ເສັ້ນ​ຕາຍ​ໃນ​ວັນ​ທີ 31 ຕຸ­ລາ ເຮັດ​ໃຫ້​ເວ­ລາ​ໃນ​ການ​ຖົກ​ຖຽງ​ກັນ​ໃນ​ສະ­ພາ​ໜ້ອຍ​ລົງ ເພາະ​ສະ­ພາ​ເປີດ 14 ຕຸ­ລາ ມີ​ເວ­ລາ​ສອງ​ອາ­ທິດ​ທໍ່​ນັ້ນ ກໍ​ເຖິງ​ເສັ້ນ​ຕາຍ.

    ນັກ​ສັງ­ເກດ​ການ​ໃຫ້​ຮູ້​ວ່າ: ນາ­ຍົກ​ອັງ­ກິດ​ພວມ​ຢູ່​ໃນ​ຖາ­ນະ​ລຳ­ບາກ ບໍ່​ຮູ້​ຈະ​ແກ້​ໄຂ​ສະ­ຖາ­ນະ​ການ​ຢ່າງ­ໃດ ? ມີ​ແຕ່​ລໍ­ຄອຍ​ວັນ​ເປີດ​ສະ­ພາ​ໃໝ່​ທໍ່​ນັ້ນ ວ່າ​ສະ­ພາ​ຈະ​ຍັງ​ຄົງ​ຢືນ­ຢັນ​ບໍ່​ຮັບ​ການ​ຖອນ​ຈາກ EU ແບບ No-deal Brexit ຫຼື ບໍ່? ແລ້ວ​ເຫດ­ການ​ຈະ​ເປັນ​ຢ່າງ­ໃດ ? ຄົງ​ຕ້ອງ​ລໍ​ເບິ່ງ​ຕໍ່​ໄປ.

ໂດຍ: ແນວ​ລາວ

ຂ່າວທີ່ກ່ຽວຂ້ອງ