ຕວກ​ກີ-ຣັດ​ເຊຍ-ອີ​ຣານ ປຶກສາ​ຫາລື​ກ່ຽວ​ກັບ​ບັນຫາ​ຊີ​ຣີ

145 18 ກ.ຍ. 2019 ຂ່າວຕ່າງປະເທດ
ຕວກ​ກີ-ຣັດ​ເຊຍ-ອີ​ຣານ ປຶກສາ​ຫາລື​ກ່ຽວ​ກັບ​ບັນຫາ​ຊີ​ຣີ

    ສື່ສານ​ໃນ​ຕາເວັນ​ອອກ​ກາງ ອ້າງ​ຕາມ​ຄຳ​ປາ​ໄສ​ຂອງ​ປະທານາທິບໍດີ​ຕວກ​ກີ ຣີ​ເຊບ ເທ​ຢິບ ເອີ​ໂດ​ການ ທີ່​ມີ​ອອກ​ມາ​ເມື່ອ​ວັນ​ທີ 16 ກັນຍາ​ນີ້ ໃຫ້​ຮູ້​ວ່າ ສະພາບ​ການ​ຢູ່​ໃນ​ເຂດ ຫຼຸດຜ່ອນ​ຄວາມ​ຮຸນ​ແຮງ ຢູ່​ໃນ​ແຂວງ ອິດ​ລິບ ຂອງ​ຊີ​ຣີ ແລະ ການ​ສ້າງຕັ້ງ​ຄະນະ​ກຳມະການ ລັດ​ຖະ​ທຳ​ມະນູນ​ຊີ​ຣີ ນັ້ນ​ເປັນ​ຫົວຂໍ້​ຕົ້ນຕໍ ທີ່​ຜູ້ນຳ​ຕວກ​ກີ ຣັດ​ເຊຍ ແລະ ອີ​ຣານ ປຶກສາ​ຫາລື​ກັນ ຢູ່​ໃນ​ຂອບ​ຂອງ​ກອງ​ປະຊຸມ​ສຸດ​ຍອດ ຂອງ​ບັນດາ​ປະເທດ​ຜູ້​ໃຫ້ການ​ອຸປະຖຳ​ຕໍ່​ຄຳ​ສັ່ງ​ຢຸດ​ຍິງ​ຢູ່​ໃນ​ຊີ​ຣີ ຊຶ່ງ​ຈັດ​ຂຶ້ນ​ໃນ​ວັນ​ທີ 16 ກັນຍາ​ນີ້ ທີ່​ນະຄອນຫຼວງ ອັງກາ​ຣາ (ປະເທດ​ຕວກ​ກີ).

   ປະທານາທິບໍດີ ເອີ​ໂດ​ການ ກ່າວ​ຕໍ່​ກອງ​ປະຊຸມ​ຖະແຫຼງ​ຂ່າວ​ຮ່ວມ ຫຼັງ​ຈາກ​ການ​ເຈລະຈາ ດັ່ງກ່າວ​ວ່າ ສາມ​ປະເທດ​ໄດ້​ເຫັນ​ດີ​ເປັນ​ເອກະສັນ ກ່ຽວ​ກັບ​ວິທີ​ການ​ເຂົ້າ​ເຖິງ​ຢ່າງ​ຄ່ອງ​ຕົວ ຕາມ​ພາຫະນະ​ການ​ຊຸກຍູ້ ຄວາມ​ພະຍາຍາມ​ສ້າງ​ສັນຕິພາບ​ຢູ່​ໃນ​ຊີ​ຣີ ໂດຍ​ຜ່ານ​ບັນດາ​ວິທີ​ການ​ແກ້​ໄຂ ທາງ​ການເມືອງ. ທຸກໆ​ບັນຫາ​ທີ່​ພວມ​ກີດຂວາງ​ຕໍ່​ການ​ສ້າງຕັ້ງ ຄະນະ​ກຳມະການ ລັດ​ຖະ​ທຳ​ມະນູນ​ໃຫ້​ແກ່​ຊີ​ຣີ ຕ່າງ​ກໍ​ໄດ້​ຖືກ​ຍົກເລີກ​ໄປ.

    ປະທານາທິບໍດີ ເອີ​ໂດ​ການ ເຫັນ​ວ່າ ຈະ​ມີ​ຜູ້​ລີ້​ໄພ​ຊາວ​ຊີ​ຣີ ສູງ​ສຸດ 3 ລ້ານ​ຄົນ ສາມາດ​ກັບ​ຄືນ​ໄປ​ຍັງ “ເຂດ​ຄວາມ​ປອດ​ໄພ” ຢູ່​ທາງ​ພາກ​ເໜືອ​ຊີ​ຣີ ຖ້າ​ຫາ​ກວ່າ “ເຂດ​ຄວາມ​ປອດ​ໄພ” ນັ້ນ​ໄດ້​ຮັບ​ການ​ເປີດ​ກວ້າງ​ຈາກ​ຊາຍ​ແດນ​ຕວກ​ກີ ໄປ​ຮອດ​ເຂດ ດີ ອາ​​ລ ຊໍ ແລະ ຣັກ​ກາ. ດັ່ງນັ້ນ ສິ່ງ​ຈຳເປັນ​ກໍ​ແມ່ນ​ການ​ສ້າງຕັ້ງ​ຕົວ​ເມືອງ​ໜຶ່ງ​ຂຶ້ນ​ມາ ເພື່ອ​ໃຫ້​ຜູ້​ລີ້​ໄພ​ສາມາດ​ດຳລົງ​ຊີວິດ​ຢູ່​ທີ່​ນັ້ນ​ໄດ້.

ຂ່າວທີ່ກ່ຽວຂ້ອງ