ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 19-09-2019

1.205 19 ກ.ຍ. 2019 ຫົວຂໍ້ຂ່າວອື່ນໆ

    ຄໍ​ລຳ​ສຳ­ລັບ​ມື້­ນີ້ ມີ​ເລື່ອງ​ກ່ຽວ​ກັບ​ກົດ­ໝາຍ​ວ່າ​ດ້ວຍ​ນ້ຳ­ມັນ​ເຊື້ອ​ໄຟ (ປີ​ໂຕຼ​ລຽມ) ທີ່​ກຳ­ປູ­ເຈຍ ເລື່ອງ​ຊາຍ​ເຖົ້າ​ຢູ່ ສ ອາ​ເມ​ຣິ​ກາ ເລືອກ​ເຂົ້າ​ຄຸກ​ດີ​ກວ່າ​ຈະ​ຢູ່​ກັບ​ເມຍ ແລະ ສຸດ​ທ້າຍ ແມ່ນ​ກ່ຽວ​ກັບ​ຄວາມ​ເສຍ​ຫາຍ​ຈາກ​ການ​ຕົ້ມ​ຕຸນ​ທາງ​ອິນ​ເຕີ​ເນັດ ຢູ່​ມາ​ເລ​ເຊຍ.

    ທີ່ ກຳ­ປູ­ເຈຍ: ເຊັ່ນ​ດຽວ​ກັບ​ປະ­ເທດ​ລາວ​ພວກ​ເຮົາ ກຳ­ປູ­ເຈຍ ຕ້ອງ​ໄດ້​ອີງ​ອາ­ໄສ​ການ​ນຳ​ເຂົ້າ​ນ້ຳ­ມັນ​ເຊື້ອ​ໄຟ​ຈາກ​ຕ່າງ­ປະ­ເທດ ສູງ​ເຖິງ 2,5 ໂຕນ​ຕໍ່​ປີ ຈາກ​ສິງ­ກະ­ໂປ ໄທ ຫວຽດ­ນາມ ແລະ ປະ­ເທດ​ອື່ນໆ ດັ່ງ­ນັ້ນ ທາງ​ການ​ຂອງ​ປະ­ເທດ​ນີ້ ຈຶ່ງ​ມີ​ຄວາມ​ພະ­ຍາ­ຍາມ ເພື່ອ​ຊອກ​ກຸ້ມ​ຕົນ​ເອງ​ດ້ານ​ນ້ຳ­ມັນ​ເຊື້ອ​ໄຟ ນັບ​ແຕ່​ປີ 1996 ເປັນ­ຕົ້ນ​ມາ ໂດຍ​ໄດ້​ລິ​ເລີ່ມ​ຮ່າງ​ກົດ­ໝາຍ​ວ່າ​ດ້ວຍ​ນ້ຳ­ມັນ​ປີ​ໂຕຼ​ລຽມ (ກໍ​ຄື ນ້ຳ­ມັນ​ເຊື້ອ​ໄຟ) ຕໍ່​ຈາກ​ນັ້ນ​ມາ​ເປັນ​ເວ­ລາ 23 ປີ ຈຶ່ງ​ມີ​ຂ່າວ ຮ່າງ​ກົດ­ໝາຍ​ສະ­ບັບ​ດັ່ງ­ກ່າວ ໄດ້​ຜ່ານ​ການ​ຮັບ­ຮອງ​ເອົາ​ຢ່າງ​ເປັນ​ທາງ​ການ ໃນ​ວັນ​ທີ 17 ມິ­ຖຸ­ນາ​ປີ​ນີ້ ຢູ່​ກອງ​ປະ­ຊຸມ​ສະ­ພາ​ແຫ່ງ​ຊາດ ກຳ­ປູ­ເຈຍ ກົດ­ໝາຍ​ສະ­ບັບ​ທີ່​ມີ 9 ໝວດ 72 ມາດ­ຕາ​ນີ້ ມີ​ເປົ້າ​ໝາຍ​ຕົ້ນ­ຕໍ ເພື່ອ​ຊຸກ­ຍູ້​ສົ່ງ­ເສີມ​ການ​ພັດ­ທະ­ນາ​ອຸດ­ສາ­ຫະ­ກຳ ປີ​ໂຕຼ​ລຽມ ພາຍ​ໃນ​ປະ­ເທດ ແບບ​ຍືນ​ຍົງ ແລະ ມີ​ປະ­ສິດ­ທິ­ພາບ ຕິດ​ພັນ​ກັບ​ການ​ສົ່ງ­ເສີມ​ການ​ພັດ­ທະ­ນາ​ເສດ­ຖະ­ກິດ ແລະ ສັງ­ຄົມ​ຂອງ​ປະ­ເທດ ໃນ​ໄລ­ຍະ​ຍາວ ນອກ­ຈາກ​ນັ້ນ ກົດ­ໝາຍ​ຍັງ​ມີ​ເປົ້າ​ໝາຍ​ດຶງ​ດູດ ແລະ ສ້າງ​ຄວາມ​ໝັ້ນ​ໃຈ​ໃຫ້​ແກ່​ເຫຼົ່າ​ນັກ​ລົງ­ທຶນ​ໃນ​ຂະ­ແໜງ​ນ້ຳ­ມັນ​ເຊື້ອ​ໄຟ ປີ​ໂຕຼ​ລຽມ ອີກ​ດ້ວຍ.

    ທີ່ ສ ອາ​ເມ​ຣິ​ກາ: ຂ່າວ​ນີ້​ເຖິງ​ຈະ​ອ່າວ​ເກົ່າ (The Nation 9 ກັນ­ຍາ 2016) ແຕ່​ຍັງ​ຮັກ­ສາ​ຄວາມ​ແປກ​ປະ­ຫຼາດ ເຊິ່ງ​ຫຼາຍ​ຄົນ​ອາດ​ຈະ​ເຊື່ອ​ວ່າ ມັນ​ເປັນ​ພຽງ​ນິ­ຍາຍ ແຕ່​ມັນ​ພັດ​ມີ​ຄວາມ​ຈິງ​ແທ້ໆ ເລື່ອງ​ມີ​ຢູ່​ວ່າ ຊາຍ​ອາ­ຍຸ 70 ປີ ຊື່​ທ້າວ ລໍ​ເຣັນ ຣິບ​ເປິນ (Lawrence Ripple) ໄດ້​ເຂົ້າ­ປຸ້ນ​ທະ­ນາ­ຄານ​ແຫ່ງ​ໜຶ່ງ​ຢູ່​ນະ­ຄອນ​ແຄນ​ຊັດ ເພື່ອ​ວ່າ​ໃຫ້​ຕົນ​ເອງ​ໄດ້​ຖືກ​ຈັບ ແລະ ຖືກ​ສັ່ງ​ເຂົ້າ​ໄປ​ນອນ​ຢູ່​ໃນ​ຄຸກ ເພາະ​ຜູ້­ກ່ຽວ​ອອກ­ປາກ​ຢູ່​ສະ­ເໝີ​ວ່າ: “ຂ້ອຍ​ຂໍ​ໄປ​ຕິດ​ຄຸກ​ດີ​ກວ່າ ຈະ​ໃຊ້​ຊີ­ວິດ​ຢູ່​ກັບ​ເມຍ​ໃນ​ເຮືອນ​ຫຼັງ​ນີ້!” ຂ່າວ​ບອກ​ວ່າ ຊາຍ​ເຖົ້າ​ຄົນ​ນີ້​ເຂົ້າ​ໄປ​ທະ­ນາ­ຄານ​ແຫ່ງ​ໜຶ່ງ ແລ້ວ​ໃຊ້​ປືນ​ຈີ້​ບັງ­ຄັບ​ໃຫ້​ພະ­ນັກ­ງານ​ມອບ​ເງິນ​ໃຫ້​ເຂົາ ຖ້າ​ບໍ່​ຢາກ​ຕາຍ ແຕ່​ແປກ ເມື່ອ​ໄດ້​ເງິນ​ຈຳ­ນວນ 3.000 ໂດ​ລາ​ແລ້ວ ເຂົາ​ພັດ​ບໍ່​ຍອມ​ໜີ ເຂົາ​ລໍ​ໃຫ້​ຖືກ​ຈັບ ແລະ ເຂົາ​ກໍ​ຖືກ​ຈັບ​ສົມ​ດັ່ງ​ຕັ້ງ­ໃຈ ເຂົາ​ໄດ້​ບອກ​ເຈົ້າ​ໜ້າ­ທີ່​ຕຳ­ຫຼວດ​ວ່າ ເຂົາ​ທົນ​ຢູ່​ກັບ​ນາງ​ເມຍ​ຕໍ່​ໄປ​ບໍ່​ໄດ້​ອີກ​ແລ້ວ ຂ່າວ​ບອກ​ວ່າ ເຖົ້າ ລໍ​ເຣັນ ໄດ້​ໄປ​ນອນ​ຢູ່​ຄຸກ​ຕາມ​ຄວາມ​ຕັ້ງ­ໃຈ ເຂົາ​ມີ​ເພື່ອນ​ໃໝ່ໆ​ຮ່ວມ​ຄຸກ ມີ​ອາ­ຫານ​ກິນ​ທຸກ​ຄາບ ທັງ​ໄດ້​ຮັບ​ການ​ເບິ່ງ­ແຍງ​ສຸ­ຂະ­ພາບ ຊຶ່ງ​ຊາວ​ອາ​ເມ​ຣິ​ກາ​ຈຳ­ນວນ​ຫຼາຍ​ລ້ານ​ຄົນ​ຍັງ​ຢື້​ບໍ່​ເຖິງ​ອີກ​ດ້ວຍ!.

    ທີ່ ມາ​ເລ​ເຊຍ: ແຫຼ່ງ​ຂ່າວ​ໜັງ­ສື­ພິມ​ວຽງ​ຈັນ​ທາມ (ວັນ​ທີ 18 ສິງ­ຫາ 2019) ໃຫ້​ຮູ້​ວ່າ ມາ​ເລ​ເຊຍ ເປັນ​ປະ­ເທດ​ໜຶ່ງ​ທີ່​ປະ​ເຊີນ​ກັບ​ບັນ­ຫາ​ແກ້ງ​ຕົ້ມ​ຕຸນ ຜ່ານ​ເຄືອ​ຄ່າຍ​ລະ­ບົບ​ສື່​ສັງ­ຄົມ (ອິນ​ເຕີ​ເນັດ) ຊຶ່ງ​ມີ​ຜົນ​ເສຍ​ຫາຍ​ນັ້ນ ມີ​ມູນ​ຄ່າ​ເປັນ​ເງິນ​ໂດຍ​ສະ­ເລ່ຍ​ຈຳ­ນວນ 2 ຕື້​ຣິງ​ກິດ​ຕໍ່​ປີ ເວົ້າ​ໄດ້​ວ່າ­ຄວາມ​ເສຍ​ຫາຍ​ຈາກ​ການ​ຕົ້ມ​ຕຸນ ແລະ ການ​ປອມ​ແປງ​ຜ່ານ​ເຄືອ​ຄ່າຍ​ໂທລະ​ຄົມ­ມະ­ນາ­ຄົມ ແລະ ການ​ຄ້າ​ເອ​ເລັກ​ໂຕຼ​ນິກ​ນັ້ນ ເປັນ​ໜຶ່ງ​ໃນ​ການ​ສູນ​ເສຍ​ທີ່​ໜັກ­ໜ່ວງ​ທີ່​ສຸດ ດັ່ງ­ນັ້ນ ທາງ​ການ​ຂອງ​ມາ​ເລ​ເຊຍ ຈຶ່ງ​ໄດ້​ແນະ­ນຳ​ໃຫ້​ບັນ­ດາ​ທະ­ນາ­ຄານ​ເຂັ້ມ​ວຽກ​ຄຸ້ມ​ຄອງ​ຂໍ້​ມູນ​ກ່ຽວ​ກັບ​ລະ­ບົບ​ບັນ­ຊີ​ເງິນ​ຝາກ​ຢ່າງ​ເຄັ່ງ​ຄັດ ເພື່ອ​ບໍ່​ໃຫ້​ຂໍ້​ມູນ​ສ່ວນ​ບຸກ­ຄົນ​ຮົ່ວ​ໄຫຼ​ໄປ​ເຂົ້າ​ມື​ພວກ​ຕົ້ມ​ຕຸນ ຂ່າວ​ໃຫ້​ຮູ້​ຕື່ມ​ວ່າ ຜ່ານ​ບັ້ນ​ປະ­ຕິ­ບັດ​ງານ 2 ອາ­ທິດ ເພື່ອ​ປາບ​ປາມ​ຂະ​ບວນ​ການ​ຕົ້ມ​ຕຸນ ຊຶ່ງ​ສິ້ນ​ສຸດ​ລົງ​ໃນ​ວັນ​ທີ 31 ເດືອນ​ກໍ­ລະ­ກົດ​ຜ່ານ​ມາ​ນັ້ນ ເຈົ້າ​ໜ້າ­ທີ່​ມາ​ເລ​ເຊຍ ສາ­ມາດ​ຈັບ​ກຸມ​ຜູ້​ມີ​ຄວາມ​ຜິດ​ໄດ້ 501 ກໍ­ລະ­ນີ ໃນ​ທົ່ວ​ປະ­ເທດ.

ຂ່າວທີ່ກ່ຽວຂ້ອງ