ຂ່າວຫຼ້າສຸດ

ນະຄອນຫຼວງ-ແຂວງຮ່າຕິ່ງ ສືບຕໍ່ຮ່ວມມືຂຸດຄົ້ນອັດຖິ

162 19 ກ.ຍ. 2019 ຂ່າວໜ້າ​ໜຶ່ງ

    ວັນ​ທີ 17 ກັນ­ຍາ 2019 ທ່ານ ພົ​ຈວ ສີ​ພອນ ຈັນ​ສົມ​ວົງ ຫົວ­ໜ້າ​ການ­ເມືອງ​ກອງ​ບັນ­ຊາ​ການ​ທະ­ຫານ​ນະ­ຄອນ­ຫຼວງ​ວຽງ​ຈັນ (ນວ) ພ້ອມ​ຄະ­ນະ​ໄດ້​ຕ້ອນ­ຮັບ​ການ​ມາ​ຢ້ຽມ­ຢາມ ແລະ ເຮັດ​ວຽກ​ຂອງ​ທ່ານ ພັນ​ເອກ ຫງວ​ຽນ ເຕິດ ເຍິນ ຫົວ­ໜ້າ​ຄະ­ນະ​ປະ­ຕິ­ບັດ​ງານ​ພິ­ເສດ​ແຂວງ​ຮ່າ​ຕິ່ງ ສສ ຫວຽດ­ນາມ ພ້ອມ​ຄະ­ນະ.

    ໂອ­ກາດ​ນີ້ ທ່ານ ພົ​ຈວ ສີ​ພອນ ຈັນ​ສົມ​ວົງ  ໄດ້​ສະ­ແດງ​ການ​ຕ້ອນ­ຮັບ​ຢ່າງ​ອົບ​ອຸ່ນ ພ້ອມ​ທັງ​ຕີ​ລາ­ຄາ​ສູງ​ຕໍ່​ຄະ­ນະ​ດັ່ງ­ກ່າວ​ທີ່​ມາ​ຢ້ຽມ­ຢາມ ແລະ ເຮັດ​ວຽກ​ຄັ້ງ​ນີ້ ຈາກ​ນັ້ນ ໄດ້​ລາຍ​ງານ​ສະ­ພາບ​ການ​ຊອກ​ຄົ້ນ ຂຸດ​ຄົ້ນ​ອັດ­ຖິ​ໃນ​ສົກ​ປີ 2019-2020 ຂອງ​ສອງ​ໜ່ວຍ​ງານ​ກອງ​ບັນ­ຊາ​ການ ໂດຍ​ປະ­ຕິ­ບັດ​ຕາມ​ສັນ­ຍາ​ຂອງ​ສອງ​ລັດ­ຖະ­ບານ ແລະ ບົດ​ບັນ­ທຶກ​ຊ່ວຍ​ຈຳ​ລະ­ຫວ່າງ​ສອງ​ຄະ­ນະ​ປະ­ຕິ­ບັດ​ງານ​ພິ­ເສດ​ຂັ້ນ​ສູນ​ກາງ ລາວ-ຫວຽດ­ນາມ ແລະ ການ​ພົບ​ປະ​ລະ­ຫວ່າງ​ຄະ­ນະ​ປະ­ຕິ­ບັດ​ງານ​ພິ­ເສດ​ຂອງ ນວ ກັບ​ຄະ­ນະ​ປະ­ຕິ­ບັດ​ງານ​ພິ­ເສດ​ຂອງ​ແຂວງ​ຮ່າ​ຕິ່ງ​ໃນ​ການ​ສຳ​ຫຼວດ​ຊອກ​ຄົ້ນ ແລະ ຂຸດ​ຄົ້ນ​ອັດ­ຖິ​ທະ­ຫານ​ອາ­ສາ​ສະ­ໝັກ ແລະ ຊ່ຽວ­ຊານ​ຫວຽດ­ນາມ​ທີ່​ເສຍ­ສະ­ຫຼະ​ຊີ­ວິດ​ໃນ​ປາງ​ສົງ­ຄາມ​ຢູ່​ລາວ ເວົ້າ​ລວມ ເວົ້າ​ສະ­ເພາະ ຢູ່ ນວ ທັງ​ສອງ​ຝ່າຍ​ໄດ້​ຕົກ­ລົງ​ເລີ່ມ​ຂຸດ​ຄົ້ນ​ນັບ​ແຕ່​ປີ 2000-2019 ສາ­ມາດ​ຂຸດ​ຄົ້ນ​ໄດ້​ທັງ​ໝົດ 122 ອັດ­ຖິ ແລະ ຕາມ​ແຜນ­ການ​ສົກ​ປີ 2019-2020 ຄາດ­ກະ​ວ່າ​ຈະ​ຂຸດ​ຄົ້ນ​ໃຫ້​ໄດ້ 1-2 ອັດ­ຖິ​ຕື່ມ​ອີກ.

    ພ້ອມ​ນີ້ ທ່ານ ພັນ​ເອກ ຫງວ​ຽນ ເຕິດ ເຍິນ ໄດ້​ສະ­ແດງ​ຄວາມ​ຂອບ​ອົກ​ຂອບ­ໃຈ​ເປັນ​ພິ­ເສດ​ຕໍ່​ຄະ­ນະ​ກອງ​ບັນ­ຊາ​ການ​ທະ­ຫານ ນວ ທີ່​ໄດ້​ໃຫ້­ການ​ຕ້ອນ­ຮັບ​ຢ່າງ​ອົບ​ອຸ່ນ ແລະ ໃຫ້­ການ​ຮ່ວມ​ມື​ຊ່ວຍ­ເຫຼືອ​ໃນ​ການ​ຊອກ​ຄົ້ນ ຂຸດ​ຄົ້ນ​ອັດ­ຖິ​ທະ­ຫານ​ອາ­ສາ​ສະ­ໝັກ ແລະ ຊ່ຽວ­ຊານ​ຫວຽດ­ນາມ​ທີ່​ເສຍ­ສະ­ຫຼະ​ຊີ­ວິດ​ໃນ​ປາງ​ສົງ­ຄາມ​ຢູ່​ລາວ​ມາ​ໂດຍ​ຕະ­ຫຼອດ ພ້ອມ​ນັ້ນ ຍັງ​ໄດ້​ຮຽກ­ຮ້ອງ​ໃຫ້​ຄະ­ນະ​ໜ່ວຍ​ປະ­ຕິ­ບັດ​ງານ​ພິ­ເສດ​ທັງ​ສອງ​ກອງ​ບັນ­ຊາ​ການ ຈົ່ງ​ພ້ອມ​ກັນ​ສືບ­ຕໍ່​ເຮັດ​ໜ້າ­ທີ່​ໃນ​ການ​ລົງ​ໂຄ­ສະ­ນາ​ປຸກ­ລະ­ດົມ​ຂົນ­ຂວາຍ​ກັບ​ປະ­ຊາ­ຊົນ​ເພື່ອ​ຊອກ​ຫາ​ແຫຼ່ງ​ຂໍ້​ມູນ​ອັນ​ໃໝ່​ທີ່​ຊັດ​ເຈນ ເພື່ອ​ເຮັດ​ໃຫ້​ໜ່ວຍ​ງານ​ດັ່ງ­ກ່າວ​ໄດ້​ເຮັດ​ໜ້າ­ທີ່​ທຳ​ການ​ຊອກ​ຄົ້ນ ຂຸດ​ຄົ້ນ​ອັດ­ຖິ​ໃຫ້​ໄດ້​ຕາມ​ຄາດ­ໝາຍ​ທີ່​ວາງ​ໄວ້ ພ້ອມ​ທັງ​ເຮັດ​ພິ­ທີ​ຈັດ​ສົ່ງ​ກັບ​ຄືນ​ສູ່​ປະ­ເທດ​ຢ່າງ​ສົມ​ກຽດ.

ຂ່າວທີ່ກ່ຽວຂ້ອງ