ຂ່າວຫຼ້າສຸດ

ໄຂນຳໃຊ້ອາຄານສຳນັກງານໃຫຍ່ ທະນາຄານຫວຽດຕິນລາວ

284 19 ກ.ຍ. 2019 ຂ່າວໜ້າ​ໜຶ່ງ
ໄຂນຳໃຊ້ອາຄານສຳນັກງານໃຫຍ່ ທະນາຄານຫວຽດຕິນລາວ

    ພິ­ທີ​ໄຂ​ນຳ​ໃຊ້​ອາ­ຄານ​ສຳ­ນັກ­ງານ​ໃຫຍ່​ທະ­ນາ­ຄານ​ຫວຽດ​ຕິນ​ລາວ​ຈຳ­ກັດ ຈັດ​ຂຶ້ນ​ວັນ​ທີ 17 ກັນ­ຍາ 2019 ຢູ່​ອາ­ຄານ​ດັ່ງ­ກ່າວ (ບ້ານ​ຫັດ­ສະ­ດີ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ) ໂດຍ​ມີ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ ຫງວ​ຽນ ບ໋າ​ຮຸ່ງ ເອກ​ອັກ​ຄະ​ລັດ​ຖະ​ທູດ ສສ ຫວຽດ­ນາມ ປະ­ຈຳ ສປປ ລາວ ພ້ອມ​ດ້ວຍ​ຄະ­ນະ​ສະ­ພາ​ບໍ­ລິ­ຫານ​ທະ­ນາ­ຄານ​ຫວຽດ​ຕິນ ການ​ນຳ​ຂັ້ນ​ສູນ​ກາງ ນະ­ຄອນ­ຫຼວງ​ວຽງ​ຈັນ ແລະ ແຂກ​ຖືກ​ເຊີນ ເຂົ້າ​ຮ່ວມ.

    ອາ­ຄານ​ສຳ­ນັກ­ງານ​ໃຫຍ່​ຫວຽດ​ຕິນ​ລາວ ຈຳ­ກັດ ຖືກ​ອອກ​ແບບ­ຢ່າງ​ທັນ​ສະ­ໄໝ ຕາມ​ມາດ­ຕະ­ຖານ​ສາ ກົນ ໃນ​ເນື້ອ­ທີ່​ດິນ 3.609 ຕາ​ແມັດ ໃນ​ນີ້ ມີ​ເນື້ອ­ທີ່​ປຸກ​ສ້າງ​ອາ­ຄານ 18.522 ຕາ​ແມັດ ປະ­ກອບ​ມີ 9 ຊັ້ນ (2 ຊັ້ນ​ໃຕ້​ດິນ ແລະ 7 ຊັ້ນ​ເທິງ​ໝ້າ​ດິນ) ເພື່ອ​ສະ­ໜອງ​ຄວາມ​ຕ້ອງ­ການ​ດ້ານ​ການ​ບໍ­ລິ­ການ​ເງິນ ຍົກ​ສູງ​ຄຸນ​ນະ​ພາບ​ການ​ບໍ­ລິ­ການ​ກາ​ໝາຍ​ທີ່​ມີ​ຊື່​ສຽງ ແລະ ການ​ບໍ­ລິ­ການ​ແບບ​ມື​ອາ­ຊີບ​ໃຫ້​ລູກ​ຄ້າ ໂດຍ​ໄດ້​ດຳ­ເນີນ​ທຸ ລະ​ກິດ​ແຕ່​ເດືອນ​ກຸມ­ພາ 2012 ປັດ­ຈຸ­ບັນ​ມີ 2 ສາ­ຂາ 1 ໜ່ວຍ​ບໍ­ລິ­ການ ມາ​ຮອດ​ເດືອນ​ສິງ­ຫາ 2015 ໄດ້​ຍົກ​ເປັນ​ທະ­ນາ­ຄານ​ຮຸ້ນ​ສ່ວນ​ອຸດ­ສາ­ຫະ­ກຳ​ການ​ຄ້າ​ຫວຽດ­ນາມ ສາ­ຂາ​ລາວ ໃນ​ຮູບ​ແບບ​ການ​ດຳ­ເນີນ​ທຸ­ລະ​ກິດ ເປັນ​ທະ­ນາ­ຄານ​ລູກ​ຂອງ​ລະ­ບົບ​ທະ­ນາ­ຄານ​ຫວຽດ​ຕິນ ໂດຍ​ໄດ້​ກໍ່­ສ້າງ​ພັດ­ທະ­ນາ ແລະ ເປີດ​ກວ້າງ​ເຄືອ​ຄ່າຍ​ຢ່າງ​ວ່ອງ­ໄວ ໃນ​ນີ້ ໄດ້​ເປີດ​ສາ­ຂາ​ໃໝ່​ຢູ່​ແຂວງ​ຈຳ­ປາ​ສັກ ປີ 2016 ດ້ວຍ​ການ​ຊ່ວຍ­ເຫຼືອ​ຢ່າງ​ບໍ່​ຢຸດ​ຢັ້ງ​ຂອງ​ທະ­ນາ­ຄານ​ແຫ່ງ ສປປ ລາວ ບັນ­ດາ​ກະ­ຊວງ ກົມ ຂະ­ແໜງ­ການ​ກ່ຽວ­ຂ້ອງ​ຂອງ​ລາວ ກັບ​ບັນ­ດາ​ວິ​ສາ​ຫະ​ກິດ​ຂອງ​ຫວຽດ­ນາມ​ຢູ່​ລາວ ປະ­ຊາ­ຊົນ​ຫວຽດ​ກ້ຽວ ແລະ ວິ​ສາ​ຫະ​ກິດ​ຂອງ​ປະ­ເທດ​ເພື່ອນ​ບ້ານ​ລາວ ການ​ຊີ້​ນຳ​ຢ່າງ​ໃກ້­ຊິດ ທັນ​ເວ­ລາ​ຂອງ​ຄະ­ນະ​ນຳ​ທະ­ນາ­ຄານ​ຫວຽດ​ຕິນ ແລະ ສະ­ມາ­ຊິກ​ສະ­ພາ​ບໍ­ລິ­ຫານ ທະ­ນາ­ຄານ​ຫວຽດ​ຕິນ​ລາວ​ຈຳ­ກັດ ໄດ້​ບັນ­ລຸ​ຜົນ​ການ​ຂະ­ຫຍາຍ­ຕົວ​ດ້ານ​ທຸ­ລະ​ກິດ​ຢ່າງ​ຕໍ່​ເນື່ອງ ສະ­ແດງ​ອອກ​ປີ 2018 ຊັບ​ສິນ​ລວມ​ບັນ­ລຸ​ຫຼາຍ​ກວ່າ 358 ລ້ານ​ໂດ​ລາ​ສະ­ຫະ­ລັດ ລວມ​ຍອດ​ໜີ້​ປ່ອຍ​ກູ້​ຫຼາຍ​ກວ່າ 249 ລ້ານ​ໂດ​ລາ​ສະ­ຫະ­ລັດ ແລະ ລະ­ດົມ​ທຶນ​ຈາກ​ປະ­ຊາ­ຊົນ ສະ​ຖາ​ບັນ​ການ​ເງິນ​ບັນ­ລຸ​ຫຼາຍ​ກວ່າ 279 ລ້ານ​ໂດ​ລາ​ສະ­ຫະ­ລັດ ບັນ­ດາ​ຕົວ​ຊີ້​ວັດ​ດ້ານ​ການ​ເງິນ ROA ແມ່ນ 1,32% ແລະ ROE 7,29% ກຳ­ໄລ​ບັນ­ລຸ 5,87 ລ້ານ​ໂດ​ລາ​ສະ­ຫະ­ລັດ ເທົ່າ​ກັບ 104% ຂອງ​ແຜນ­ການ ໄດ້​ຮັບ​ນາມ­ມະ­ຍົດ​ດີ­ເດັ່ນ 6 ປີ​ຊ້ອນ ຮອດ​ເດືອນ​ມິ­ຖຸ­ນາ 2019 ກຳ­ໄລ​ອາ­ກອນ​ບັນ­ລຸ 4,3 ລ້ານ​ໂດ​ລາ​ສະ­ຫະ­ລັດ ເທົ່າ​ກັບ 53% ຂອງ​ແຜນ­ການ ຄາດ​ວ່າ​ທ້າຍ​ປີ 2019 ຈະ​ບັນ­ລຸ​ໄດ້ 9 ລ້ານ​ໂດ​ລາ​ສະ­ຫະ­ລັດ (100%) ເພີ່ມ​ຂຶ້ນ 55% ທຽບ­ໃສ່​ປີ 2018.

    ທ່ານ ເລ ດຶກ ເທາະ ປະ­ທານ​ສະ­ພາ​ບໍ­ລິ­ຫານ​ທະ­ນາ­ຄານ​ຫວຽດ​ຕິນ​ແບັງ ກ່າວ​ວ່າ: ນັບ​ແຕ່​ມື້​ສ້າງ ຕັ້ງ ແລະ ເຄື່ອນ​ໄຫວ​ມາ​ຮອດ​ປັດ­ຈຸ­ບັນ​ທະ­ນາ­ຄານ​ຫວຽດ​ຕິນ​ລາວ​ຈຳ­ກັດ ໄດ້​ຕັ້ງ­ໜ້າ​ພັດ­ທະ­ນາ​ການ​ເຄື່ອນ ໄຫວ​ມີ​ຄຸນ​ນະ​ພາບ ປອດ​ໄພ ມີ​ໝາກ­ຜົນ ເປັນ​ທຳ ເປັນ​ທະ­ນາ­ຄານ​ທີ່​ໃຫຍ່​ໃນ ສປປ ລາວ ແລະ ໄດ້​ປະ ກອບ​ສ່ວນ​ຊຸກ­ຍູ້​ເສດ­ຖະ­ກິດ ການ​ຄ້າ ການ​ລົງ­ທຶນ ພ້ອມ​ທັງ​ຊຸກ­ຍູ້​ສາຍ​ພົວ­ພັນ​ມິດ­ຕະ­ພາບ​ອັນ​ດີ­ງາມ​ລະ ຫວ່າງ ຫວຽດ­ນາມ-ລາວ ນອກ​ນີ້ ຍັງ​ໄດ້​ປະ­ກອບ­ສ່ວນ​ຢ່າງ​ຕັ້ງ­ໜ້າ​ໃນ​ວຽກ​ງານ​ສະ­ຫວັດ­ດີ​ການ​ສັງ­ຄົມ ເປັນ­ຕົ້ນ ວຽກ​ງານ​ສາ­ທາ­ລະ­ນະ​ສຸກ ເຊັ່ນ: ໄດ້​ຊ່ວຍ­ເຫຼືອ​ອຸ­ປະ­ກອນ​ການ​ແພດ ແລະ ຊ່ວຍ­ເຫຼືອ​ຜູ້​ທຸກ​ຍາກ.

    ໂອ­ກາດ​ນີ້ ທ່ານ ເລ ດຶກ ເທາະ ຍັງ​ໄດ້​ມອບ​ເງິນ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ​ຢູ່​ພາກ​ກາງ ແລະ ພາກ​ໃຕ້​ລາວ 100.000 ໂດ​ລາ​ສະ­ຫະ­ລັດ ຫຼື ປະ­ມານ 880 ລ້ານ​ກີບ ເຊິ່ງ​ຮັບ​ໂດຍ​ທ່ານ ສົມ​ດີ ດວງ​ດີ.

ຂ່າວທີ່ກ່ຽວຂ້ອງ