ຂ່າວຫຼ້າສຸດ

ເຕະບານນັກຮຽນສາມັນ ໂຄປາ ໂຄຄາ-ໂຄລາ ກຽມຈັດທ້າຍເດືອນນີ້

666 20 ກ.ຍ. 2019 ວົງຈອນກີລາ
ເຕະບານນັກຮຽນສາມັນ ໂຄປາ ໂຄຄາ-ໂຄລາ ກຽມຈັດທ້າຍເດືອນນີ້

    ພິ­ທີ​ຖະ­ແຫຼງ​ຂ່າວ​ການ​ຈັດ​ແຂ່ງ­ຂັນ​ເຕະ­ບານ​ເຍົາ­ວະ​ຊົນ ນັກ­ຮຽນ​ສາ­ມັນ​ສຶກ​ສາ ຮຸ່ນ​ອາ­ຍຸ​ບໍ່​ເກີນ 16 ປີ  ລາຍ­ການ ໂຄ​ປາ ໂຄ​ຄາ-ໂຄ​ລາ ຄັ້ງ​ທີ III ປີ 2019 ໄດ້​ມີ​ຂຶ້ນ​ວັນ​ທີ 18 ກັນ­ຍາ 2019 ຢູ່​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ (ນວ) ມີ​ທ່ານ ຊົມ​ພູ ແກ້ວ​ປັນ­ຍາ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ  ທ່ານ Diego Lima ຜູ້​ຈັດ­ການ​ທົ່ວ​ໄປ​ຂອງ​ບໍ­ລິ­ສັດ ລາວ ໂຄ​ຄາ-ໂຄ​ລາ ບ໊ອດ​ຕຼິງ ຈຳ­ກັດ ພ້ອມ​ດ້ວຍ​ຄະ­ນະ ແລະ ບັນ­ດາ​ພະ­ນັກ­ງານ​ທີ່​ກ່ຽວ­ຂ້ອງ ຕະ­ຫຼອດ​ຮອດ​ບັນ­ດາ​ສື່​ມວນ​ຊົນ​ທຸກ​ຂະ­ແໜງ­ການ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ສົມ​ພູ ແກ້ວ​ປັນ­ຍາ ກ່າວ​ວ່າ: ການ​ແຂ່ງ­ຂັນ​ຄັ້ງ​ນີ້ ຈັດ​ຂຶ້ນ​ເປັນ​ຄັ້ງ​ທີ 3 ໂດຍ​ເປັນ​ລາຍ­ການ​ທີ່​ມີ​ຄວາມ​ໝາຍ​ຄວາມ​ສຳ­ຄັນ​ຢ່າງ​ເລີກ​ເຊິ່ງ ຕໍ່​ຂະ​ບວນ​ການ​ພັດ­ທະ­ນາ​ກີ­ລາ​ບານ­ເຕະ ນະ­ຄອນ­ຫຼວງ​ວຽງ​ຈັນ ແລະ ໄດ້​ມີ​ການ​ເຕີບ​ໃຫຍ່​ຂະ­ຫຍາຍ­ຕົວ​ຢ່າງ​ກວ້າງ ເຫັນ​ໄດ້​ການ​ຈັດ​ແຂ່ງ­ຂັນ​ໃນ​ຄັ້ງ​ທຳ​ອິດ ເມື່ອ​ປີ 2016 ແລະ ຄັ້ງ​ທີ 2 ໃນ​ປີ 2018 ມີ​ນັກ­ກີ­ລາ​ເພີ່ມ​ຂຶ້ນ 113 ທີມ​ຈາກ 9 ຕົວ​ເມືອງ​ທົ່ວ ນວ ຕົກ​ມາ​ປີ​ນີ້ ກໍ​ເພີ່ມ​ສູງ​ຂຶ້ນ​ກວ່າ​ເກົ່າ ເປັນ 119 ທີມ ເຊື່ອ​ວ່າ​ລາຍ­ການ​ນີ້ ຈະ​ເປັນ​ເວ­ທີ​ແຈ້ງ​ເກີດ​ຂອງ​ນັກ­ກີ­ລາ​ລາວ ກໍ​ຄື ນະ­ຄອນ­ຫຼວງ​ຫຼາຍ​ຄົນ ເພື່ອ​ກ້າວ​ຂຶ້ນ​ໄປ​ເປັນ​ນັກ­ກີ­ລາ​ທີມ​ຊາດ​ໃນ­ຕໍ່­ໜ້າ ເນື່ອງ​ຈາກ​ໃນ​ໄລ­ຍະ​ຜ່ານ​ມາ ທີມ​ຊາດ​ຍິງ​ລາວ ສ່ວນ​ຫຼາຍ​ແມ່ນ​ເປັນ​ນັກ­ກີ­ລາ​ລູກ​ຫຼານ​ຂອງ​ຊາວ ນວ ທັງ​ໝົດ ສາ­ມາດ​ສ້າງ​ຊື່​ສຽງ ແລະ ກຽດ​ສັກ​ສີ​ໃຫ້​ແກ່​ປະ­ເທດ​ຊາດ​ໃນ​ເວ­ທີ​ອາ​ຊຽນ​ທີ່​ຜ່ານ​ມາ.

    ທ່ານ Diego Lima ກ່າວ​ວ່າ: ສຳ­ລັບ​ເຫດ­ຜົນ​ໃນ​ການ​ປ່ຽນ​ຈາກ​ການ​ແຂ່ງ­ຂັນ​ແບບ 11 ຄົນ​ມາ​ແຂ່ງ­ຂັນ​ແບບ 7 ຄົນ ເຊື່ອ​ວ່າ​ຈະ​ເຮັດ​ໃຫ້​ເດັກ­ນ້ອຍ​ໄດ້​ມາ​ຫຼິ້ນ​ບານ​ນຳ​ກັນ​ຫຼາຍ​ຂຶ້ນ​ໃນ​ອີກ​ຮູບ​ແບບ​ໜຶ່ງ ເພາະ​ການ​ຫຼິ້ນ​ແບບ 11 ຄົນ ແມ່ນ​ການ​ແຂ່ງ­ຂັນ​ແບບ​ມື​ອາ­ຊີບ ແຕ່​ການ​ແຂ່ງ­ຂັນ 7 ຄົນ ຈະ​ສາ­ມາດ​ເຮັດ​ໃຫ້​ສາຍ​ພົວ­ພັນ​ໃຫ້​ແກ່​ນັກ­ກີ­ລາ​ໄດ້​ແລກ­ປ່ຽນ​ໃຫ້​ເຊິ່ງ​ກັນ​ແລະ​ກັນ ອີກ​ດ້ານ​ໜຶ່ງ​ກໍ​ຈະ​ເຮັດ​ໃຫ້​ຜູ້​ປົກ­ຄອງ​ທີ່​ມາ​ຊົມ​ມາ​ເຊຍ​ໄດ້​ຕິດ​ແທດ​ໃກ້­ຊິດ​ກັບ​ລູກ​ຫຼາຍ​ຂຶ້ນ ພິ­ເສດ​ປີ​ນີ້​ທາງ ບໍ­ລິ­ສັດ ລາວ ໂຄ​ຄາ-ໂຄ​ລາ ຍັງ​ມີ​ເງິນ​ລາ­ງວັນ​ສຳ­ລັບ​ແຊັມ ແລະ ຮອງ​ແຊັມ ທັງ​ທີມ​ຍິງ ແລະ ຊາຍ ເພື່ອ​ພັດ­ທະ­ນາ​ໂຄງ­ການ​ໃດ​ໜຶ່ງ​ຂອງ​ໂຮງຮຽນ ລວມ​ມູນ​ຄ່າ 261 ລ້ານ​ກີບ.

    ສຳ­ລັບ​ຮູບ​ແບບ​ການ​ແຂ່ງ­ຂັນ ໄດ້​ມີ​ການ​ຈັບ​ສະ­ຫຼາກ​ປະ​ກົບ​ຄູ່​ເສຍ​ຕົກ​ຮອບ​ທັນ­ທີ ເພື່ອ​ເອົາ​ທີມ​ທີ​ດີ​ທີ່​ສຸດ​ຕົວ​ແທນ​ຂອງ​ແຕ່​ລະ​ເມືອງໆ​ລະ 1 ທີມ ຈາກ 9 ຕົວ​ເມືອງ​ຈະ​ໄດ້ ທີມ​ຍິງ 9 ທີມ ແລະ ທີມ​ຊາຍ 9 ທີມ ເຂົ້າ​ມາ​ແຂ່ງ­ຂັນ​ຮອບ​ສຸດ​ທ້າຍ ໂດຍ​ໃຊ້ 3 ສະ­ໜາມ​ຈັດ​ແຂ່ງ­ຂັນ​ເປັນ​ຫຼັກ ຄື: ລະ­ຫວ່າງ​ວັນ​ທີ 28 ກັນ­ຍາ-4 ຕຸ­ລາ 2019 ແຂ່ງ­ຂັນ​ຂັ້ນ​ເມືອງ​ໃຊ້​ສະ­ໜາມ​ເຕະ­ບານ​ຫຍ້າ​ທຽມ​ກູດ​ໄລ້ ເມືອງ​ສີ​ໂຄດ​ຕະ­ບອງ ແລະ ສະ­ໜາມ​ເຕະ­ບານ​ຫຍ້າ​ທຽມ​ນິວ​ອາ­ລີ​ນາ ເມືອງ​ສີ​ສັດ­ຕະ​ນາກ ລະ­ຫວ່າງ​ວັນ​ທີ 7-8 ຕຸ­ລາ ແຂ່ງ­ຂັນ​ຂັ້ນ​ນະ­ຄອນ­ຫຼວງ ແລະ ວັນ​ທີ 11 ຕຸ­ລາ 2019 ນັດ​ຊີງ​ອັນ​ດັບ 3 ແລະ ຊີງ​ຊະ­ນະ​ເລີດ ໃຊ້​ສະ­ໜາມ​ລ້ານ​ຊ້າງ ບ້ານ​ໜອງ​ໄຮ ເມືອງ​ຫາດ​ຊາຍ​ຟອງ.

ຂ່າວທີ່ກ່ຽວຂ້ອງ