ຂ່າວຫຼ້າສຸດ

ຫຼາຍພາກສ່ວນ ບໍລິຈາກເລືອດເພື່ອຊ່ວຍເຫຼືອສັງຄົມ

222 20 ກ.ຍ. 2019 ຂ່າວໜ້າ​ໜຶ່ງ
ຫຼາຍພາກສ່ວນ ບໍລິຈາກເລືອດເພື່ອຊ່ວຍເຫຼືອສັງຄົມ

    ສູນ​ເລືອດ​ແຫ່ງ​ຊາດ ອົງ­ການ​ກາ­ແດງ​ລາວ ຈັດ​ກິດ­ຈະ­ກຳ​ຮັບ​ບໍ­ລິ­ຈາກ​ເລືອດ​ແບບ​ເປີດ​ກວ້າງ ເພື່ອ​ສ້າງ​ຂະບວນ​ການ​ຊ່ວຍ­ເຫຼືອ​ຄົນ​ເຈັບ​ທີ່​ເປັນ​ພະ­ຍາດ​ໄຂ້­ເລືອດ­ອອກ ແລະ ຜູ້​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ ພາຍ​ໃຕ້​ຫົວ­ຂໍ້ “ຄົນ​ລາວ​ບໍ່​ຖິ້ມ​ກັນ” ຈັດ​ຂຶ້ນ​ວັນ​ທີ 19 ກັນ­ຍາ 2019 ຢູ່​ສູນ​ການ​ຄ້າ​ລາວ-ໄອ​ເຕັກ ໂດຍ​ມີ​ທ່ານ ຄຳ​ຮຸ່ງ ເຮືອງ​ວົງ​ສີ ປະ­ທານ​ອົງ­ການ​ກາ­ແດງ​ລາວ ພ້ອມ​ດ້ວຍ​ຮອງ​ປະ­ທານ​ອົງ­ການ​ກາ­ແດງ​ລາວ ແລະ ຜູ້­ຕາງ­ໜ້າ​ຈາກ​ພາກ­ສ່ວນ​ຕ່າງໆ ເຂົ້າ​ຮ່ວມ.

    ທ່ານ ສິງ ເມ​ໂນ​ລາດ ຮອງ​ປະ­ທານ​ອົງ­ການ​ກາ­ແດງ​ລາວ ໄດ້​ຍົກ​ໃຫ້​ເຫັນ​ຄວາມ​ສຳ­ຄັນ​ຂອງ​ການ​ບໍ­ລິ­ຈາກ​ເລືອດ ໂດຍ​ສະ­ເພາະ ພະ­ຍາດ​ໄຂ້­ເລືອດ­ອອກ​ມີ​ການ​ລະ­ບາດ ການ​ປະ​ເຊີນ​ກັບ​ໄພ​ນ້ຳ​ຖ້ວມ​ປັດ­ຈຸ­ບັນ ເຊິ່ງ​ເຮັດ​ໃຫ້ ພົບ​ໃນ​ການ​ຮັບ​ບໍ­ລິ­ຈາກ​ເລືອດ ການ​ສະ­ໜອງ​ເລືອດ​ພົບ​ຄວາມ​ຫຍຸ້ງ­ຍາກ ປີ 2018 ບັນ­ດາ​ສູນ​ເລືອດ​ທົ່ວ​ປະ­ເທດ ຮັບ​ບໍ­ລິ­ຈາກ​ເລືອດ​ໄດ້​ຫຼາຍ​ກວ່າ 1.570 ຄັ້ງ ມີ​ຜູ້​ບໍ­ລິ­ຈາກ​ເລືອດ 96.845 ຄົນ ແຕ່​ໄດ້​ຮັບ​ເລືອດ​ຕົວ​ຈິງ 49.070 ຄົນ ເທົ່າ​ກັບ 98,14% ຂອງ​ແຜນ­ການ​ປີ ໃນ​ນີ້ ຜູ້​ບໍ­ລິ­ຈາກ​ເລືອດ​ແບບ​ສະ­ໝັກ​ໃຈ ກວມ 94% ສຳ­ລັບ​ປີ 2019 ຄາດ­ໝາຍ​ສູ້​ຊົນ​ທົ່ວ​ປະ­ເທດ​ໃຫ້​ບັນ­ລຸ 55.000 ຖົງ ໂດຍ​ແບ່ງ​ໃຫ້​ແຕ່​ລະ​ແຂວງ​ຈັດ​ຕັ້ງ​ປະ­ຕິ­ບັດ ໃນ​ນີ້ 8 ເດືອນ​ຜ່ານ​ມາ ປະ­ຕິ­ບັດ​ໄດ້ 34.382 ຖົງ ເທົ່າ​ກັບ 62,5% ເວ­ລາ​ທີ່​ຍັງ​ເຫຼືອ​ຈະ​ຕ້ອງ​ໄດ້​ສູ້​ຊົນ​ໃຫ້​ບັນ­ລຸ.

    ການ​ຮັບ​ບໍ­ລິ­ຈາກ​ເລືອດ​ຄັ້ງ​ນີ້ ນອກ­ຈາກ​ເປັນ​ການ­ຈັດ­ຕັ້ງ​ປະ­ຕິ­ບັດ​ແຜນ​ຍຸດ​ທະ​ສາດ​ວຽກ​ງານ​ການ​ປຸກ­ລະ­ດົມ​ຜູ້​ບໍ ລິ​ຈາກ​ເລືອດ​ຂອງ​ສູນ​ເລືອດ​ແຫ່ງ​ຊາດ​ແລ້ວ ຍັງ​ເປັນ​ການ​ປະ­ກອບ­ສ່ວນ​ສຳ­ຄັນ​ໃນ​ການ​ຊ່ວຍ­ເຫຼືອ​ເພື່ອນ​ມະ­ນຸດ​ດ້ວຍ​ກັນ ທັງ​ເປັນ​ການ​ສ້າງ​ຂະ​ບວນ​ການ​ຕ້ອນ­ຮັບ​ວັນ​ສຳ­ຄັນ​ຂອງ​ພັກ ຂອງ​ຊາດ​ທີ່​ຈະ​ມີ​ຂຶ້ນ​ໃນ­ຕໍ່­ໜ້າ ໂອ­ກາດ​ນີ້ ກໍ​ຂໍ​ເຊີນ ຊວນ​ພະ­ນັກ­ງານ ລັດ­ຖະ­ກອນ ທະ­ຫານ ຕຳ­ຫຼວດ ນັກ­ຮຽນ-ນັກ​ສຶກ​ສາ ປະ­ຊາ­ຊົນ ແລະ ທຸກ​ຊັ້ນ​ຄົນ ທົ່ວ​ປະ­ເທດ ເຂົ້າ​ຮ່ວມ​ກິດ­ຈະ­ກຳ​ຮັບ​ບໍ­ລິ­ຈາກ​ເລືອດ​ຢູ່​ແຂວງ ນວ ແລະ ສູນ​ເລືອດ​ໃນ​ຂອບ​ເຂດ​ທົ່ວ​ປະ­ເທດ ເພື່ອ​ຊ່ວຍ­ເຫຼືອ​ເພື່ອນ​ມະ­ນຸດ​ດ້ວຍ​ກັນ ພຽງ​ແຕ່​ມີ​ອາ­ຍຸ 17-60 ປີ ນ້ຳ­ໜັກ 45 ກິ​ໂລ ມີ​ສຸ­ຂະ­ພາບ​ແຂງ­ແຮງ​ດີ ກໍ​ສາ­ມາດ​ຮ່ວມ​ບໍ­ລິ­ຈາກ​ເລືອດ​ໄດ້.

ຂ່າວທີ່ກ່ຽວຂ້ອງ