ຂ່າວຫຼ້າສຸດ

ມສສ ຊ່ວຍເຫຼືອພະສົງສາມະເນນ ທີ່ດ້ອຍໂອກາດດ້ານການສຶກສາພະທຳວິໄນ

239 20 ກ.ຍ. 2019 ຂ່າວໜ້າ​ໜຶ່ງ
ມສສ ຊ່ວຍເຫຼືອພະສົງສາມະເນນ ທີ່ດ້ອຍໂອກາດດ້ານການສຶກສາພະທຳວິໄນ

    ພິ­ທີ​ໄຂ​ມູນ​ນິ­ທິ​ສົ່ງ­ເສີມ​ການ​ສຶກ​ສາ​ສົງ (ມສສ) ແລະ ທອດ​ຜ້າ­ປ່າ​ສາ­ມັກ­ຄີ​ສົມ­ທົບ​ປັດ​ໄຈ​ເຂົ້າ​ເປັນ­ຕົ້ນ​ທຶນ​ຂອງ​ມູນ​ນິ­ທິ​ດັ່ງ­ກ່າວ ຈັດ​ຂຶ້ນ​ວັນ​ທີ 18 ກັນ­ຍາ 2019 ຢູ່​ນະ­ຄອນ­ຫຼວງ​ວຽງ​ຈັນ ໂດຍ​ມີ​ພະ​ເຖ​ລາ​ນຸ​ເຖ ລະ ພະ​ອາ­ຈານ​ໃຫຍ່ ມະ­ຫາ​ງ່ອນ ດຳ­ລົງ​ບຸນ ປະ­ທານ​ອົງ­ການ​ພຸດ​ທະ​ສາ­ສະ­ໜາ​ສຳ­ພັນ​ລາວ (ອພສ) ທ່ານ ຄຳ​ມູນ ວິ​ພົງ​ໄຊ ຮອງ​ລັດ­ຖະ­ມົນ­ຕີ​ກະ­ຊວງ​ພາຍ​ໃນ ທ່ານ ສົມ​ອົກ ກິ່ງ​ສະ​ດາ ຮອງ​ປະ­ທານ​ສູນ​ກາງ​ແນວ​ລາວ​ສ້າງ​ຊາດ ຜູ້​ຊີ້​ນຳ​ສາ­ສະ­ໜາ ທ່ານ​ນາງ ນາ­ລີ ສີ​ສຸ​ລິດ ພັນ​ລະ​ຍາ​ນາ­ຍົກ­ລັດ­ຖະ­ມົນ­ຕີ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ມສສ ມີ​ສຳ­ນັກ­ງານ​ຕັ້ງ​ຢູ່​ວັດ​ຈອມ​ທອງ​ວະ​ນາ​ຣາມ ບ້ານ​ສວນ​ມອນ ເມືອງ​ສີ​ສັດ­ຕະ​ນາກ ນະ­ຄອນຫຼວງ​ວຽງ​ຈັນ ໂດຍ​ມີ​ພະ ບຸນ​ທະ­ວີ ປະ​ສິດ­ທິ​ສັກ ເປັນ​ປະ­ທານ ທ່ານ​ນາງ ບົວ​ວຽງ ເພັດ​ທະ​ລານ​ຄຳ ທ່ານ ສູນ​ທອນ ພົມ​ມະ​ຈັກ ທ່ານ​ນາງ ເກ­ສອນ ບົວ​ຫອມ ທ່ານ ປະ­ກາ­ສິດ ຈັນ­ທະ​ປັນ­ຍາ ແລະ ທ່ານ ສົມ​ພະ​ວັນ ເສິກ​ປັນ­ຍາ ເປັນ​ຮອງ​ປະ­ທານ ຈຸດ­ປະ­ສົງ​ການ​ສ້າງ­ຕັ້ງ ມສສ ເພື່ອ​ຊ່ວຍ ແລະ ສະ­ໜັບ­ສະ­ໜູນ​ພະ­ສົງ​ສາ­ມະ­ເນນ ທີ່​ດ້ອຍ​ໂອ­ກາດ​ດ້ານ​ການ​ສຶກ​ສາ​ພະ​ທຳ​ວິ­ໄນ ແລະ ຄວາມ​ຮູ້​ທາງ​ໂລກ​ທີ່­ຢູ່​ເຂດ​ຊົນ­ນະ­ບົດ ໃຫ້ ເຂົ້າ​ເຖິງ​ການ​ສຶກ​ສາ​ຢ່າງ​ເທົ່າ​ທຽມ​ກັນ ເປັນ­ຕົ້ນ ການ​ສະ­ໜອງ​ວັດ­ຖຸ ອຸ­ປະ­ກອນ​ການ​ຮຽນ ແລະ ການ​ໃຫ້​ທຶນ​ການ​ສຶກ​ສາ​ໃນ​ສາຍ​ພະ­ສົງ​ສາ­ມະ­ເນນ ສ້າງ ແລະ ສົ່ງ­ເສີມ​ພະ­ສົງ​ສາ­ມະ­ເນນ​ໃຫ້​ມີ​ຄວາມ​ຮູ້-ເຂົ້າ­ໃຈ​ໃນ​ຫຼັກ​ສິນ​ລະ​ທຳ ເພື່ອ​ພັດ­ທະ­ນາ​ຊຸມ​ຊົນ ສັງ­ຄົມ​ໃຫ້​ມີ​ຄວາມ​ເຂັ້ມ­ແຂງ ບໍ່​ໄປ​ພົວ­ພັນ​ກັບ​ຢາ​ເສບ​ຕິດ.

    ມສສ ເປັນ​ອົງ​ການ­ຈັດ­ຕັ້ງ​ທາງ​ສັງ­ຄົມ​ໜຶ່ງ ທີ່​ບໍ່​ຫວັງ​ຜົນ​ກຳ­ໄລ ເຄື່ອນ​ໄຫວ​ໃນ​ທົ່ວ​ປະ­ເທດ ຕາມ​ແນວ ທາງ​ນະ­ໂຍ­ບາຍ​ຂອງ​ພັກ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ລະ­ບຽບ​ກົດ­ໝາຍ​ຂອງ​ລັດ ແລະ ກົດ​ລະ ບຽບ​ຂອງ ມສສ ປະ­ສານ​ສົມ­ທົບ​ກັບ​ກະ­ຊວງ ອົງ​ການ­ຈັດ­ຕັ້ງ​ທຽບ​ເທົ່າ ແລະ ພະ­ແນກ­ການ​ຕ່າງໆ​ຂັ້ນ​ແຂວງ ຫ້ອງ­ການ​ຂັ້ນ​ເມືອງ ທີ່​ພົວ­ພັນ​ກັບ​ຂົງ­ເຂດ ແລະ ຂະ­ແໜງ­ການ​ທີ່​ມູນ​ນິ­ທິ​ເຄື່ອນ​ໄຫວ​ໃນ​ການ​ຂຶ້ນ​ແຜນ ແລະ ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຂອງ​ຕົນ​ຢູ່​ທ້ອງ­ຖິ່ນ ລາຍ​ງານ​ສະ­ພາບ​ການ­ເຄື່ອນ­ໄຫວ ແລະ ລາຍ​ຮັບ -ລາຍ​ຈ່າຍ​ໃຫ້​ກະ­ຊວງ​ພາຍ​ໃນ ແລະ ຂະ­ແໜງ­ການ​ເງິນ ຊາບ 1 ຄັ້ງ​ຕໍ່​ປີ ຫຼື ຕາມ​ຄວາມ​ຕ້ອງ­ການ​ໃນ​ເວ­ລາ​ຈຳ­ເປັນ ລະ­ດົມ​ຂົນ­ຂວາຍ​ຮັບ​ເອົາ​ການ​ສະ­ໜັບ­ສະ­ໜູນ ການ​ຊ່ວຍ­ເຫຼືອ ການ​ບໍ­ລິ­ຈາກ​ທຶນ ຊັບ​ສິນ​ຈາກ​ບຸກ­ຄົນ ນິ­ຕິ­ບຸກ­ຄົນ ທັງ​ພາຍ​ໃນ ແລະ ຕ່າງ­ປະ­ເທດ ບົນ​ພື້ນ­ຖານ​ລະ­ບຽບ​ກົດ­ໝາຍ.

    ນັບ​ແຕ່​ມີ​ການ­ເຄື່ອນ­ໄຫວ​ຮອດ​ປັດ­ຈຸ­ບັນ ມສສ ມີ​ເງິນ​ກອງ​ທຶນ​ສົ່ງ­ເສີມ​ການ​ສຶກ​ສາ​ສົງ​ທີ່​ໄດ້​ຈາກ​ການ​ບໍລິ​ຈາກ ແລະ ປະ­ກອບ­ສ່ວນ​ຈາກ​ບຸກ­ຄົນ ນິ­ຕິ­ບຸກ­ຄົນ 753 ລ້ານ​ກີບ ໃນ​ນີ້ ໄດ້​ກ່ອນ​ໜ້າ​ນີ້ 500 ລ້ານ​ກີບ ແລະ ໃນ​ພິ­ທີ​ໄຂ ມສສ ທ່ານ ສູນ​ທອນ ພົມ​ມະ​ຈັກ ໄດ້​ປະ­ກອບ­ສ່ວນ 100 ລ້ານ​ກີບ ແລະ 10.000 ໂດ​ລາ​ສະ­ຫະ­ລັດ ທ່ານ​ນາງ ບົວ​ວຽງ ເພັດ​ທະ​ລານ​ຄຳ ທອດ​ຜ້າ­ປ່າ​ສາ­ມັກ­ຄີ​ສົມ­ທົບ​ທຶນ 30 ລ້ານ​ກີບ ນອກ​ນີ້ ຜູ້​ເຂົ້າ​ຮ່ວມ​ພິ­ທີ​ຍັງ​ໄດ້​ສົມ­ທົບ​ທຶນ​ຈຳ­ນວນ​ໜຶ່ງ.

ຂ່າວທີ່ກ່ຽວຂ້ອງ